Job 24

Nagtanong si Job tungkol sa Paghatol ng Diyos

¹“Bakit hindi pa itakda

ng Diyos na Makapangyarihan

ang kanyang paghatol?

Bakit hindi makita

ng mga nakakakilala sa kanya

ang panahong iyon ng paghatol?

²Nangangamkam ng lupain

ang masasamang tao

sa pamamagitan ng paglilipat ng muhon.

Nagnanakaw sila ng mga hayop at

isinasama sa sarili nilang kawan.

³Ninanakaw nila ang mga asno ng mga ulila,

at kinukuha nila ang baka ng biyuda

bilang sangla sa utang.

⁴Inaapi nila ang mga dukha

kaya napipilitang magtago ang mga ito.

⁵Naghahanap sila

ng kanilang pagkain sa ilang

na parang mga asnong-gubat,

dahil wala silang ibang lugar

na mapagkukunan ng pagkain

para sa kanilang mga anak.

⁶Namumulot sila ng mga tirang bunga

sa mga bukid,

pati na sa ubasan ng taong masama.

⁷Sa gabiʼy natutulog silang giniginaw

dahil wala silang damit

o kumot man lamang.

⁸Nababasa sila ng ulan sa mga kabundukan,

at sumisiksik na lang sa mga siwang ng bato

dahil walang masilungan.

⁹Kinukuha ang anak ng biyuda

at babaeng dukha

bilang garantiya sa pagkakautang nila.

¹⁰Lumalakad na walang saplot

ang mga dukha;

tagapasan sila ng mga inaning trigo,

ngunit nagugutom pa rin sila.

¹¹Silaʼy pumipiga ng mga olibo

sa loob ng mga pader.

Tinatapakan nila ang mga ubas sa pisaan

subalit nauuhaw pa rin sila.

¹²Naririnig sa lungsod ang daing

ng mga nag-aagaw-buhay

at mga sugatang humihingi ng tulong,

ngunit hindi ginagantihan ng Diyos

ang mga gumawa nito sa kanila.

¹³“May mga taong kumakalaban sa liwanag.

Hindi sila lumalakad sa liwanag

at hindi nila ito nauunawaan.

¹⁴Ang mga mamamatay-tao

ay bumabangon ng maaga

at pinapatay ang mga dukha,

at sa gabi namaʼy nagnanakaw.

¹⁵Ang mangangalunyaʼy

naghihintay na dumilim

upang walang makakita sa kanya.

Tinatakpan niya

ang kanyang mukha

upang walang makakilala sa kanya.

¹⁶Sa gabi, pinapasok

ng mga magnanakaw

ang mga bahay.

Sa araw, nagtatago sila

dahil umiiwas sila sa liwanag.

¹⁷Itinuturing nilang liwanag ang dilim,

dahil gusto nila ang nakakatakot

na kadiliman.”

Ang Sagot ni Zofar

¹⁸“Subalit ang masasama

ay hindi magtatagal,

gaya ng bula sa tubig.

Kahit na ang lupa na kanilang pag-aari

ay isinumpa ng Diyos.

Kaya walang pumaparoon

kahit sa kanilang ubasan.

¹⁹Kung paanong ang yelo

ay natutunaw at nawawala

dahil sa init,

ang makasalanan ay mawawala rin

sa daigdig.

²⁰Lilimutin na sila

at hindi na maaalala

kahit ng kanilang ina.

Lilipulin silang tulad ng pinutol

na punongkahoy

at kakainin sila ng mga uod.

²¹Sapagkat hindi maganda

ang pakikitungo nila

sa mga babaeng baog

at hindi sila nahahabag

sa mga biyuda.

²²Sa pamamagitan ng kapangyarihan ng Diyos,

ibabagsak niya

ang mga taong makapangyarihan.

Kahit na malakas sila,

walang katiyakan ang buhay nila.

²³Maaaring hayaan sila ng Diyos

na mamuhay nang panatag,

ngunit binabantayan niya

ang lahat ng kilos nila.

²⁴Maaari rin silang magtagumpay,

subalit sandali lang iyon

dahil hindi magtatagal

ay mawawala sila

na parang bulaklak na nalalanta

o parang uhay na ginapas.

²⁵“Kung hindi tama ang sinabi ko,

sinong makapagpapatunay

na sinungaling ako?

Sinoʼng makapagsasabing mali ako?”