Job 26

Sumagot si Job

¹Sumagot si Job,

²“Ang akala mo baʼy natulungan mo

ang walang kakayahan at nailigtas ang mahihina?

³Ang akala mo baʼy napayuhan mo

ang kapos sa karunungan

sa pamamagitan ng iyong karunungan?

⁴Saan ba nanggaling

ang mga sinasabi mong iyan?

Sinong espiritu ang nagturo sa iyo

na sabihin iyan?

⁵“Nanginginig sa takot ang mga patay

sa kinalalagyan nila sa ilalim ng tubig.

⁶Lantad sa paningin ng Diyos

ang lugar ng mga patay.

Hindi maitatago ang lugar ng kapahamakan.

⁷Inilatag ng Diyos ang kalawakan sa hilaga

at ibinitin ang mundo sa kawalan.

⁸Ibinabalot niya ang ulan

sa makakapal na ulap,

ngunit hindi ito napupunit

gaano man kabigat.

⁹Tinatakpan niya ng makapal na ulap

ang bilog na buwan.

¹⁰Nilagyan niya ng hangganan

ang langit at dagat

na parang hangganan din

ng liwanag at dilim.

¹¹Sa pagsaway niya

ay nayayanig ang mga haligi ng langit.

¹²Sa kanyang kapangyarihan

ay pinaaalon niya ang dagat;

sa kanyang karunungan

ay tinalo niya si Rahab.

¹³Sa pamamagitan ng pag-ihip niya

ay umaaliwalas ang langit,

at sa kanyang kapangyarihan

pinatay niya ang gumagapang na ahas.

¹⁴Mga simpleng bagay lang ito para sa kanya.

Parang isang bulong lang

na ating napakinggan.

Sino ngayon ang makakaunawa

sa kapangyarihan ng Diyos?”