Job 33

¹“Ngayon, Job, pakinggan mong mabuti

ang sasabihin ko sa iyo.

²Handang-handa na akong magsalita,

at ang mga sasabihin koʼy

nasa dulo na ng aking dila.

³Ang sasabihin koʼy

mula sa tapat kong puso

at tuwiran kong sasabihin

ang aking nalalaman.

⁴Ang espiritu ng Diyos na Makapangyarihan

ang gumawa sa akin at nagbigay buhay.

⁵Sagutin mo ako,

kung kaya mo.

Ihanda mo ang iyong katuwiran

at harapin ako.

⁶Pareho lang tayo sa harapan ng Diyos.

Tulad mo rin akong nagmula sa lupa.

⁷Kaya huwag kang matakot sa akin

at huwag mong isipin na aapihin kita.

⁸“Ito ang mga narinig

kong sinabi mo:

⁹‘Wala akong kasalanan.

Malinis ako at walang ginawang masama.

¹⁰Ngunit naghahanap ang Diyos ng dahilan

upang akoʼy pahirapan.

Itinuturing niya

akong kaaway.

¹¹Kinadenahan niya

ang aking mga paa

at binabantayan ang lahat ng aking kilos.’

¹²“Ngunit Job, mali ka

sa mga sinabi mo.

Hindi baʼt ang Diyos

ay higit kaysa sa tao?

¹³Bakit mo siya pinararatangan

na hindi niya sinasagot

ang daing ng tao?

¹⁴Ang totoo, palaging nagsasalita ang Diyos,[#33:14 : O iba-ibang pamamaraan.]

kaya lang hindi nakikinig ang mga tao.

¹⁵Sa panaginip o sa pangitain,

habang ang mga taoʼy natutulog

nang mahimbing,

habang silaʼy nagpapahinga

sa kanilang mga higaan,

¹⁶bumubulong siya sa kanilang mga tainga

upang magbigay ng babala,

at ito ang nakapagpatakot sa kanila.

¹⁷Ginagawa niya ito upang pigilan ang mga tao

sa paggawa ng kasalanan at pagmamataas,

¹⁸at upang mailigtas sila sa libingan

at hindi mamatay sa talim ng tabak.

¹⁹“Kung minsan naman,

itinutuwid ng Diyos ang tao

sa pamamagitan ng sakit

tulad ng walang tigil na pananakit ng buto,

²⁰kaya nandidiri siya sa pagkain,

at kahit ang pinakamasasarap na handa

ay kinasusuklaman niya.

²¹Kaya pumapayat siya,

at nagiging butoʼt balat na lamang.

²²Malapit na siyang mamatay

at mapunta sa lugar ng mga patay.

²³Ngunit kung may anghel sa tabi niya,

isang tagapamagitan, isa sa isang libo

upang sabihin sa tao

kung paano maging matuwid,

²⁴kahahabagan siya ng Diyos.[#33:24 : O anghel.]

At sasabihin niya

‘Iligtas nʼyo siya sa kamatayan.

Nakatagpo ako ng pantubos sa kanya.’

²⁵Muli siyang magiging malusog.

Lalakas siya tulad noong kanyang kabataan.

²⁶At kapag nanalangin siya sa Diyos,

sasagutin siya ng Diyos

at masayang tatanggapin,

ibabalik ng Diyos

ang matuwid niyang pamumuhay.

²⁷Pagkatapos, sasabihin niya sa mga tao,

‘Nagkasala ako at gumawa ng hindi tama,

ngunit hindi ko natanggap

ang parusang nararapat sa akin.

²⁸Iniligtas niya ako sa kamatayan

at patuloy akong nabubuhay.’

²⁹“Oo, ginagawa ng Diyos ang mga bagay na ito

nang paulit-ulit para sa tao.

³⁰Inililigtas niya ang tao sa kamatayan

upang mabuhay ito.

³¹“Job, pakinggan mo akong mabuti.

Tumahimik kaʼt hayaan akong magsalita.

³²Kung may gusto kang sabihin,

sabihin mo, sapagkat nais kong malaman

kung wala ka talagang kasalanan.

³³Ngunit kung wala ka namang sasabihin,

tumahimik ka na lang

at makinig sa aking karunungan.”