Job 35

¹Sinabi pa ni Elihu,

²“Sa wari mo baʼy tama ka

kapag sinabi mong, ‘Ako ang tama,

hindi ang Diyos.’

³Ngunit sabi mo rin,

‘Anong pakinabang sa akin,

ano namang makukuha ko

kapag akoʼy hindi gagawa

ng kasalanan?’

⁴“Sasagutin kita pati na

ang iyong mga kaibigan.

⁵Tumingin ka sa langit

at tingnan mo kung gaano kataas ang ulap.

⁶Kung magkasala ka man,

apektado ba ang Diyos?

Kung patuloy ka mang magkasala,

may magagawa ba iyon sa kanya?

⁷Kung matuwid ka,

ano naman ang kabutihang

maibibigay nito sa Diyos?

⁸Ang maaapektuhan lamang

sa ginagawa mong mabuti o masama

ay ang iyong kapwa tao.

⁹“Ang mga inaapi ay humihingi

ng tulong na iligtas sila

sa kamay ng mga makapangyarihang tao.

¹⁰Ngunit walang nagsasabi,

‘Nasaan ang Diyos na aking Manlilikha,

na nagbibigay ng mga awitin sa gabi?

¹¹Nasaan ang nagtuturo

at nagpapatalino sa atin

nang higit pa sa mga ibon

sa kalangitan?’

¹²At kung mananalangin sila,

hindi sila sinasagot ng Diyos

dahil mayayabang sila at masasamang tao.

¹³Tunay ngang hindi dinidinig

ng Diyos na Makapangyarihan

ang walang kabuluhang

paghingi nila ng tulong.

¹⁴Lalo ka lang niyang hindi pakikinggan

kung sasabihin mong hindi mo nakikita

ang kanyang tulong

nang idinulog mo ang iyong kalagayan,

at pinaghihintay ka lang.

¹⁵Sinabi mo rin na

hindi nagpaparusa ang Diyos

kahit galit siya,

at hindi niya pinapansin

ang kasamaang ginagawa ng tao.

¹⁶Job, walang saysay

ang sinasabi mo.

Talagang malinaw na hindi mo alam

ang iyong sinasabi.”