Job 37

¹“Dahil ditoʼy kumakabog ang dibdib ko

at tumatalon-talon ang puso ko.

²Pakinggan ninyo ang dagundong

ng tinig ng Diyos,

ang ugong na nagmumula

sa kanyang bibig.

³Pinapakawalan niya ang kidlat

sa buong kalawakan,

at pinaaabot ito hanggang sa dulo ng mundo.

⁴Pagkatapos ay maririnig

ang dagundong ng kanyang tinig

na parang isang kulog.

Hindi niya ito pinipigilan.

⁵Kagila-gilalas ang dumadagundong

na tinig ng Diyos.

Gumagawa siya

ng mga kahanga-hangang bagay,

mga bagay na hindi natin kayang unawain.

⁶Inuutusan niya ang yelo

na pumatak sa lupa,

ganoon din ang ulan

na bumuhos nang malakas,

⁷upang ang taoʼy makapagpahinga

sa kanilang mga ginagawa

at makapagbulay-bulay

sa mga ginawa ng Diyos.

⁸Nagtatago ang mga hayop

sa kanilang mga taguan

at nananatili roon kapag may bagyo.

⁹Dumadating ang bagyo

at ang hanging malamig

mula sa kanilang taguan.

¹⁰Sa pamamagitan ng hininga ng Diyos

nabubuo ang yelo,

at nagiging yelo ang malalawak

na bahagi ng tubig.

¹¹Pinupuno niya ng tubig ang mga ulap

at pinakikidlat ito.

¹²Sa kanyang utos,

nagpapaikot-ikot ang mga ulap

sa ibabaw ng mundo.

At ang kanyang nais

ay kanilang ginagawa.

¹³Ginagamit niya ang mga ito

upang ituwid ang tao,

o ipadama ang kanyang pag-ibig.

¹⁴“Job, pakinggan mo ito,

at pagbulay-bulayan

ang mga kahanga-hangang bagay

na ginagawa ng Diyos.

¹⁵Alam mo ba kung paano

inuutusan ng Diyos ang ulap,

at kung paano siya

nagpapakidlat mula rito?

¹⁶Alam mo ba kung paano lumulutang

ang mga ulap?

Ang lahat ng itoʼy kahanga-hangang gawa ng Diyos

na ang dunong ay walang hangganan.

¹⁷Ikaʼy pagpapawisan

dahil sa mainit na hangin mula sa timog,

¹⁸matutulungan mo ba ang Diyos

na ilatag ang kalawakan

at patigasin na parang tansong salamin?

¹⁹“Kaya sabihin mo sa amin

kung ano ang dapat naming sabihin sa Diyos.

Hindi namin alam kung paano

kami mangangatwiran

dahil kulang ang aming kaalaman.

²⁰Hindi ko gugustuhing makipagtalo sa Diyos,

dahil baka akoʼy kanyang ipahamak.

²¹Walang sinumang makakatitig sa araw

na nagliliwanag sa himpapawid,

pagkatapos mahawi ng hangin

ang mga ulap.

²²Mula sa hilaga, darating ang Diyos

na nagniningning na parang ginto

at ang kanyang liwanag

ay kagila-gilalas.

²³Hindi natin lubos na maunawaan

ang Diyos na Makapangyarihan na napakadakila.

Lubos siyang makatarungan,

matuwid at hindi nang-aapi,

²⁴kaya iginagalang siya ng mga tao.

Hindi niya pinapansin

ang mga taong nagsasabing

sila ay marunong.”