Job 41

¹“Mabibingwit mo kaya ang Leviatan?[#41:1 : Isang uri ng halimaw sa karagatan.]

Matatalian mo kaya ang nguso niya ng lubid?

²Matatalian mo ba ng lubid

ang ilong niya

o mailalagay mo kaya ang kawit

sa kanyang panga?

³Makikiusap kaya itong lagi sa iyo

na siyaʼy iyong pakawalan,

o di kayaʼy humiling

na iyong kahabagan?

⁴Makikipagkasundo kaya siya sa iyo

na magpaalipin habambuhay?

⁵Kaya mo ba siyang gawing alagang ibon,

o di kayaʼy itali

para sa iyong mga anak na babae?

⁶May negosyante kayang bibili sa kanya

at hihiwa-hiwain siya upang ipagbili?

⁷Kaya mo bang punuin ng matutulis

na sibat ang kanyang balat,

o ʼdi kayaʼy bingwitin ang kanyang ulo

ng pamingwit ng isda?

⁸Kapag hinawakan mo siya,

maaalala mo kung gaano ito

kahirap hulihin

at masasabi mong hinding-hindi ka na uulit.

⁹Walang saysay ang mga pagsisikap

na hulihin siya,

dahil makita mo pa lang siyaʼy

maduduwag ka na.

¹⁰Kung sa kanya ngaʼy

walang mangangahas gumambala,

sino pa kayang mangangahas

na lumaban sa akin?

¹¹Sino ang makapagsasabing

may utang na loob ako sa kanya?

Ang lahat dito sa mundo ay akin.

¹²“Sasabihin ko pa sa iyo

ang tungkol sa katawan ng Leviatan

at kung gaano siya kalakas

at kamakapangyarihan.

¹³Sinong makakatuklap ng kanyang balat

o makakatusok nito?

¹⁴Sino ang makakapagpabuka

ng kanyang bunganga?

Ang mga ngipin niyaʼy nakakatakot.

¹⁵Ang likod niyaʼy may makakapal na kaliskis

na parang kalasag na nakasalansan.

¹⁶Masinsin ang pagkakadikit-dikit ng mga ito

na kahit hangin ay hindi makakalusot.

¹⁷Mahigpit ang pagkakadugtong nila sa isaʼt isa,

Magkakadikit ang mga ito at hindi matutuklap.

¹⁸Kapag bumabahing siya,

may lumalabas na parang kidlat

at ang kanyang mga mata

ay mapula na parang bukang-liwayway.

¹⁹Apoy ang dumadaloy

mula sa kanyang bibig

at sumisiklab ang apoy na lumalabas

²⁰at umuusok ang ilong

na parang nagmumula sa kumukulong palayok

na may nagliliyab na panggatong.

²¹Ang hininga niyaʼy makapagpapabaga ng uling

dahil sa apoy na lumalabas sa kanyang bibig.

²²Nasa leeg ang kanyang lakas,

at ang makakita sa kanya ay kinikilabutan.

²³Kahit ang kanyang mga laman

ay siksik at matitigas.

²⁴Ang puso niyaʼy kasintigas ng bato,

marahas at walang takot.

²⁵Kapag siyaʼy tumayo,

takot na takot pati

ang mga makapangyarihang tao;

binabalot sila ng kilabot.

²⁶Walang espada, sibat, pana,

o palasong makakapanakit sa kanya.

²⁷Ang turing niya sa bakal ay dayami,

at sa tanso ay bulok na kahoy.

²⁸Hindi niya iniilagan

ang mga pana.

Ang mga batong

tumatama sa kanyaʼy

nagiging parang mga ipa lang.

²⁹Ang mga kahoy na ipinapalo

ay parang mga dayami lang sa kanya.

At pinagtatawanan lang niya

ang mga humahagibis na sibat

na inihahagis sa kanya.

³⁰Ang kanyang tiyan

ay may matatalim na kaliskis,

na parang mga basag na bote.

Kaya kapag gumagapang siya sa putik,

nag-iiwan siya ng mga bakas sa giikan.

³¹Kinakalawkaw niya ang dagat

hanggang bumula na

parang kumukulong tubig sa palayok

o kumukulong langis sa kaldero.

³²Ang tubig na kanyang dinadaanan

ay bumubula,

parang puting buhok kung tingnan.

³³Wala siyang katulad dito sa mundo.

Isa siyang nilalang

na walang kinatatakutan.

³⁴Minamaliit niya ang lahat

ng mayayabang na hayop.

Siya ang hari ng lahat

ng mababangis na hayop sa gubat.”