Mga Panaghoy 5

¹Panginoon , alalahanin po ninyo ang nangyari sa amin.

Masdan nʼyo ang aming dinanas na kahihiyan.

²Kinuha ng mga dayuhan

ang aming mga lupaʼt bahay.

³Naulila kami sa ama,

kaya nabiyuda ang aming mga ina.

⁴Kinakailangang bayaran namin ng pilak ang tubig na aming iniinom

at ang kahoy na aming panggatong.

⁵Pinagtatrabaho kaming parang mga hayop

at hindi man lang pinagpapahinga.

⁶Nagpasakop kami sa mga taga-Ehipto at Asiria

para magkaroon ng pagkain.

⁷Ang aming mga ninunoʼy nagkasala,

ngunit silaʼy pumanaw na

at kami ang nagdurusa ng parusang dapat ay para sa kanila.

⁸Napailalim kami sa mga alipin

at walang makapagligtas sa amin

mula sa kanilang mga kamay.

⁹Sa paghahanap namin ng pagkain, nanganib ang aming mga buhay

sapagkat laganap ang karahasan sa mga ilang.

¹⁰Nilalagnat kami dahil sa matinding gutom,

at ang aming katawan ay kasing-init ng pugon.

¹¹Pinagsamantalahan ang aming mga asawa sa Jerusalem

at ang aming mga anak na babae sa mga bayan ng Juda.

¹²Ibinitin sa pamamagitan ng pagtali sa kamay ang aming mga tagapamahala

at hindi iginalang ang aming matatanda.

¹³Ang aming mga kabataang lalaki ay parang aliping sapilitang pinagtrabaho sa mga gilingan

at ang mga batang lalaki ay susuray-suray sa pagpasan ng mabibigat na kahoy.

¹⁴Ang matatanda ay hindi na umuupo sa mga pintuan ng lungsod upang magbigay ng payo

at ang mga kabataang lalaki ay hindi na tumutugtog ng musika.

¹⁵Wala na kaming kagalakan.

Sa halip na magsayaw, kamiʼy nagdadalamhati.

¹⁶Wala na rin kaming karangalan.

Nakakaawa kami dahil kami ay nagkasala.

¹⁷Dahil dito, nasasaktan ang aming damdamin

at nagdidilim ang aming paningin.

¹⁸Dahil napakalungkot na ng Jerusalem

at mga asong-gubat na lamang ang gumagala rito.

¹⁹O Panginoon , maghahari kayo magpakailanman.

Ang inyong paghahari ay magpapatuloy sa lahat ng salinlahi.

²⁰Bakit palagi nʼyo kaming kinakalimutan?

Bakit kay tagal nʼyo kaming pinabayaan?

²¹Ibalik nʼyo kami sa inyo, Panginoon ,

at kami ay magbabalik katulad noong una.

Ibalik nʼyo kami sa dati naming kalagayan.

²²Talaga bang sobra na ang galit ninyo sa amin

kaya itinakwil nʼyo na kami?