Leviticus 10

Namatay si Nadab at Abihu

¹Ang dalawang anak ni Aaron na sina Nadab at Abihu ay kapwa kumuha ng lalagyan ng insenso. Nilagyan nila ito ng mga baga at insenso at inihandog sa Panginoon . Ngunit ang ginawa nilang itoʼy hindi ayon sa utos ng Panginoon , dahil iba ang apoy na kanilang ginamit para rito.[#10:1 : O iba ang pinagkunan nila ng apoy para rito.]

²Kaya nagpadala ng apoy ang Panginoon at sinunog sila hanggang sa silaʼy mamatay sa harapan ng Panginoon .

³Sinabi ni Moises kay Aaron, “Iyan ang ibig sabihin ng Panginoon nang sabihin niya:

‘Malalaman ng mga lumalapit

sa akin

na akoʼy banal;

Mapaparangalan ako

sa harapan ng lahat ng tao.’ ”

Hindi umimik si Aaron.

⁴Ipinatawag ni Moises sina Misael at Elzafan na mga lalaking anak ni Uziel na tiyuhin ni Aaron at sinabi niya sa kanila, “Kunin ninyo ang mga bangkay ng inyong mga pinsan sa santuwaryo at dalhin ninyo sa labas ng kampo.”[#10:4 : Tingnan ang Exo. 25:8.]

⁵Kaya kinuha nila ang mga bangkay, sa pamamagitan ng paghawak sa mga damit nito at dinala sa labas ng kampo ayon sa utos ni Moises.

⁶Pagkatapos, sinabi ni Moises kay Aaron at sa mga anak niyang sina Eleazar at Itamar, “Huwag ninyong guguluhin ang inyong buhok o pupunitin man ang inyong damit. Kapag ginawa ninyo iyon, pati kayo ay mamamatay at magagalit ang Panginoon sa lahat ng Israelita. Ngunit maaaring magluksa ang mga Israelitang kamag-anak ninyo para sa kanilang dalawa na sinunog ng Panginoon .

⁷Huwag muna kayong umalis sa pintuan ng Tolda. Mamamatay kayo kapag umalis kayo, dahil pinili kayo ng Panginoon para maging mga pari sa pamamagitan ng pagpahid sa inyo ng langis ng olibo.” At sinunod nila ang iniutos ni Moises.

⁸Sinabi ng Panginoon kay Aaron,

⁹“Ikaw at ang iyong mga anak ay hindi dapat uminom ng alak o ng anumang inuming nakakalasing kapag papasok sa Tolda. Kapag ginawa ninyo iyon, mamamatay kayo. Dapat ninyong sundin ang tuntuning ito, kayo at ng susunod pang mga henerasyon.

¹⁰Dapat ninyong malaman kung alin ang nauukol sa Panginoon at kung alin ang para sa lahat, kung alin ang malinis at marumi.

¹¹Kinakailangang turuan ninyo ang kapwa ninyo Israelita tungkol sa lahat ng tuntuning ibinigay ko sa inyo sa pamamagitan ni Moises.”

¹²Sinabi ni Moises kay Aaron at sa dalawang anak niyang natitira na sina Eleazar at Itamar, “Kunin ninyo ang natirang handog na pagkaing butil mula sa mga handog sa pamamagitan ng apoy para sa Panginoon . Lutuin ninyo iyon nang walang pampaalsa at kainin ninyo malapit sa altar dahil napakabanal niyon.

¹³Kainin nʼyo ito sa may banal na lugar, dahil iyon ang inyong bahagi mula sa handog sa pamamagitan ng apoy para sa Panginoon . Ito ang iniutos sa akin ng Panginoon .

¹⁴Ngunit ang pitso at hita ng hayop na itinaas at inihandog sa Panginoon ay para saʼyo at sa iyong buong sambahayan. Kainin ninyo iyon sa lugar na itinuturing nating malinis. Itoʼy ibinibigay sa inyo bilang bahagi ninyo mula sa handog ng mga Israelita na handog pangkapayapaan.

¹⁵Kapag naghandog ang mga Israelita, ihandog nila ang pitso at hita ng hayop, pati na ang mga taba bilang handog sa pamamagitan ng apoy. Ang pitso at hita ay itataas nila sa Panginoon bilang handog na itinataas. Pagkatapos, ibibigay nila ito sa inyo dahil ito ang inyong bahagi sa handog. Itoʼy para sa inyo, at sa inyong mga angkan magpakailanman ayon sa iniutos ng Panginoon .”

¹⁶Nang siyasatin ni Moises ang tungkol sa kambing na handog para sa kasalanan, napag-alaman niyang nasunog na itong lahat. Kaya nagalit siya kina Eleazar at Itamar, na mga natitirang anak ni Aaron, at sinabihan sila,[#10:16 Tingnan ang 9:15.; #10:16 Ayon sa paraan ng paghahandog na makikita sa 6:25‑30, ang karne ng hayop ng handog na ito ay dapat kinakain ng mga pari.]

¹⁷“Bakit hindi ninyo kinain ang handog para sa kasalanan sa may banal na lugar? Ang handog na iyon ay napakabanal, at iyon ay ibinigay ng Panginoon sa inyo para matubos ang mga tao sa kanilang mga kasalanan sa presensya ng Panginoon .

¹⁸Sapagkat ang dugo nito ay hindi dinala sa loob ng banal na lugar, kinain sana ninyo iyon doon sa santuwaryo, ayon sa sinabi ko sa inyo.”

¹⁹Ngunit sumagot si Aaron kay Moises, “Kanina, naghandog ang aking mga anak ng kanilang handog para sa kasalanan at handog na sinusunog, subalit namatay ang dalawa sa kanila. Sa nangyaring ito, matutuwa kaya ang Panginoon kung kinain ko ang handog para sa kasalanan ngayong araw?”[#10:19 Inihandog ni Aaron at ng mga anak niya ang mga handog na ito noong hindi pa namamatay ang dalawang anak niya. (Tingnan ang 9:8‑16.)]

²⁰Sumang-ayon si Moises sa sagot ni Aaron.