Marcos 3

Nagpagaling si Hesus sa Araw ng Pamamahinga

¹Pagdating ng isa pang Araw ng Pamamahinga, muling pumunta si Hesus sa sinagoga, at dooʼy may isang lalaking paralisado ang isang kamay.

²May mga taong naroon na nagmamatyag kung pagagalingin ni Hesus ang lalaking iyon sa Araw ng Pamamahinga, upang may maiparatang sila laban sa kanya.

³Sinabi ni Hesus sa lalaking paralisado ang kamay, “Halika rito sa harapan.”

⁴Pagkatapos, tinanong niya ang mga tao roon, “Alin ba ang ipinapahintulot sa Kautusan sa Araw ng Pamamahinga: Ang gumawa ng mabuti o ang gumawa ng masama? Ang magligtas ng buhay o ang pumatay?” Ngunit hindi sila umimik.

⁵Galit na tiningnan ni Hesus ang mga nakapaligid sa kanya, ngunit nalungkot din siya sa katigasan ng kanilang mga puso. Bumaling siya sa lalaki at sinabi, “Iunat mo ang iyong kamay!” Iniunat nga ng lalaki ang kanyang kamay at gumaling ito.

⁶Agad na umalis ang mga Pariseo at nakipagpulong sa mga alagad ni Herodes upang pagplanuhan kung paano nila ipapapatay si Hesus.

Sinundan ng Maraming Tao si Hesus

^7-8Pumunta si Hesus at ang kanyang mga alagad sa tabi ng lawa ng Galilea. Sinundan siya ng napakaraming tao na nagmula sa Galilea, sa lungsod ng Jerusalem at sa iba pang mga bayan sa lalawigan ng Judea, sa lalawigan ng Idumea, sa kabila ng Ilog Jordan, at sa palibot ng Tiro at Sidon. Dinayo siya ng mga tao dahil nabalitaan nila ang mga kamangha-manghang ginagawa niya.

⁹Dahil sa dami ng tao, nagpahanda si Hesus ng isang bangka sa mga alagad niya, upang hindi siya maipit ng mga ito.

¹⁰Marami na siyang pinagaling, kaya dinumog siya ng napakaraming maysakit upang mahawakan siya.

¹¹Kapag nakikita siya ng mga taong sinasaniban ng masamáng espiritu, nagpapatirapa sila sa harap niya at sumisigaw, “Ikaw ang Anak ng Diyos!”

¹²Ngunit mahigpit niya silang pinagbawalan na ibunyag kung sino siya.

Hinirang ni Hesus ang Labindalawang Apostol

¹³Pagkatapos, umakyat sina Hesus sa bundok at dooʼy tinawag niya ang mga taong gusto niyang piliin, at silaʼy lumapit sa kanya.

¹⁴Humirang siya ng labindalawa [na tinawag niyang mga apostol] upang makasama niya at upang isugong mangaral.[#3:14 : Wala ang mga salitang ito sa ilang manuskrito.]

¹⁵Binigyan niya sila ng kapangyarihang magpalayas ng mga demonyo.

si Simon (na tinawag niyang Pedro),

¹⁷sina Santiago at Juan na mga anak ni Zebedeo (tinawag niya silang Boanerges na ang ibig sabihin ay “mga anak ng kulog”),

¹⁸si Andres,

si Felipe,

si Bartolome,

si Mateo,

si Tomas,

si Santiago na anak ni Alfeo,

si Tadeo,

si Simon na makabayan

¹⁹at si Judas Iscariote na siyang nagkanulo kay Hesus kinalaunan.

Ang Paratang Laban kay Hesus

²⁰Pag-uwi ni Hesus sa bahay na tinutuluyan niya, muling dumating ang napakaraming tao, kaya siya at ang mga alagad niya ay hindi na nagawang kumain.

²¹Nang mabalitaan ito ng pamilya ni Hesus, pumunta sila upang kunin siya dahil naisip nilang baka nasisiraan na siya ng bait.

²²May dumating namang mga tagapagturo ng Kautusan galing sa Jerusalem, at sinabi nila, “Sinasapian siya ni Satanas na pinuno ng mga demonyo. At sa pamamagitan nito, nakakapagpalayas siya ng mga demonyo.”[#3:22 : Sa Griyego, Beelzebul.]

²³Kaya tinawag ni Hesus ang mga tao at nagsalita siya sa kanila sa pamamagitan ng talinghaga: “Paano naman palalayasin ni Satanas ang sarili niya?

²⁴Kung ang isang kaharian ay nagkakawatak-watak at naglalaban-laban, babagsak ito.

²⁵Ganoon din kapag nag-aaway-away ang isang sambahayan, magkakawatak-watak ito.

²⁶Kaya kung kinakalaban ni Satanas ang kanyang sarili at hati-hati ang mga kampon niya, babagsak din siya at iyon na ang kanyang katapusan.

²⁷Hindi makakapasok ang magnanakaw sa bahay ng isang malakas na tao, maliban kung gapusin niya muna ito. At kapag naigapos na niya, saka lang niya ito mananakawan.

²⁸Sinasabi ko sa inyo ang totoo, lahat ng kasalanan ng tao, at anumang masamáng sinasabi nila laban sa Anak ng Tao ay maaaring mapatawad.

²⁹Ngunit ang sinumang magsasalita ng kalapastanganan sa Banal na Espiritu ay hinding-hindi mapapatawad. Ang kasalanang ito ay mananatili sa kanya magpakailanman.”

³⁰Sinabi iyon ni Hesus dahil sinasabi ng mga tagapagturo ng Kautusan, “Sinasapian siya ng masamáng espiritu.”

Ang Ina at mga Kapatid ni Hesus

³¹Dumating naman ang ina at mga kapatid ni Hesus. Habang nakatayo sila sa labas, ipinatawag nila siya.

³²Maraming tao ang nakaupo sa palibot niya noon, at may nagsabi sa kanya, “Nasa labas po ang inyong ina at mga kapatid, at ipinapatawag kayo.”

³³Sumagot si Hesus, “Sino ang aking ina at mga kapatid?”

³⁴Tiningnan niya ang mga taong nakapalibot sa kanya at sinabi, “Ang mga ito ang aking ina at mga kapatid!

³⁵Sapagkat ang sinumang sumusunod sa kalooban ng Diyos ang siya kong ina at mga kapatid.”