Nehemias 3

Muling Itinayo ang Pader ng Jerusalem

¹Itinayo ni Eliasib na punong pari at ng mga kasamahan niyang pari ang pintuan na tinatawag na Tupa. Matapos nilang itinalaga ito ay ikinabit ang mga pintuan. Itinayo rin nila at itinalaga ang mga pader hanggang sa Tore ng Isang Daan at sa Tore ni Hananel.[#3:1 : Maaaring ang “isang daan” ay ang taas o lalim ng baitang ng hagdan nito.]

²Ang nagtayo ng sumunod na bahagi ng pader ay ang mga taga-Jerico, at sumunod sa kanila ay si Zacur na anak ni Imri.

³Itinayo ng mga anak na lalaki ni Hasenaa ang pintuang tinatawag na Isda. Nilagyan nila ito ng mga hamba, ikinabit ang mga pinto, at ginawan ng mga trangka.[#3:3 : Maaaring dito pinararaan ang mga isda na dinadala sa lungsod.]

⁴Ang nagtayo ng sumunod na bahagi ng pader ay si Meremot na anak ni Urias at apo ni Hakoz. Ang kasunod na bahagi namaʼy itinayo ni Mesulam na anak ni Berequias at apo ni Mesezabel. Sumunod naman ay si Sadoc na anak ni Baana.

⁵At ang sumunod sa kanya ay mga taga-Tekoa. Ngunit ang mga pinuno nila ay hindi sumunod sa ipinapagawa ng mga namumuno sa kanila sa gawain.

⁶Ang nagtayo ng Lumang Pintuan ay si Joiada na anak ni Pasea at si Mesulam na anak ni Besodeias. Nilagyan nila ito ng mga hamba, ikinabit ang mga pinto, at ginawan ng mga trangka.[#3:6 : O Pintuan ni Jeshana.]

⁷Ang nagtayo ng sumunod na bahagi ng pader ay sina Melatias na taga-Gibeon, Jadon na taga-Meronot at ang mga lalaking taga-Gibeon at taga-Mizpa. Ang mga lugar na ito ay sakop ng gobernador ng probinsya sa kanluran ng Ilog Eufrates.

⁸Ang nagtayo ng sumunod na bahagi ng pader ay si Uziel na platero, na anak ni Harhaia. Ang sumunod naman sa kanya ay si Hananias na manggagawa ng pabango. Itinayo nila ang bahaging ito ng pader ng Jerusalem hanggang sa Malawak na Pader.

⁹Ang sumunod na nagtayo sa kanila ay ang anak ni Hur na si Refaias, na pinuno ng kalahating distrito ng Jerusalem.

¹⁰Ang sumunod sa kanya ay si Jedaias na anak ni Harumaf. Itinayo niya ang bahagi ng pader malapit sa kanyang bahay. Ang sumunod sa kanya ay si Hatus na anak ni Hasabneias.

¹¹Ang nagtayo ng sumunod pang bahagi ng pader at ng tore na may mga hurno ay sina Malquias na anak ni Harim, at Hasub na anak ni Pahat-moab.

¹²Ang sumunod na nagtayo ay ang anak ni Halohesh na si Salum, na pinuno ng kalahating distrito ng Jerusalem. Tinulungan siya ng mga anak niyang babae.

¹³Ang nagtayo ng pintuang nakaharap sa lambak ay si Hanun at ang mga taga-Zanoa. Ikinabit nila ang mga pinto nito, at ginawan ng mga trangka. Ipinatayo rin nila ang 450 metro na pader sa pintuan ng pinagtatapunan ng basura.

¹⁴Ang nagtayo ng pintuan ng pinagtatapunan ng basura ay ang anak ni Recab na si Malquias, na pinuno ng distrito ng Bet-hakerem. Ikinabit niya ang mga pinto nito, at ginawan ng mga trangka.

¹⁵Ang nagtayo ng Pintuan ng Bukal ay ang anak ni Colhoze na si Salum, na pinuno ng distrito ng Mizpa. Binubungan niya ito, ikinabit ang mga pinto at ginawan ng mga trangka. Itinayo rin niya ang pader ng paliguan sa Siloam, malapit sa hardin ng hari, hanggang sa hagdanang pababa mula sa Lungsod ni David.

¹⁶Ang sumunod sa kanya ay ang anak ni Azbuk na si Nehemias, na pinuno ng kalahating distrito ng Bet-sur. Itinayo niya ang pader na nakaharap sa libingan ni David hanggang sa pinag-iimbakan ng tubig at sa kampo ng mga sundalo.[#3:16 : Ganito ang nasa tekstong Septuagint at Syriac. Sa Hebreo, mga libingan.]

¹⁷Ang nagtayo ng sumunod na bahagi ng pader ay ang mga Levita na pinamumunuan ni Rehum na anak ni Bani. Ang sumunod sa kanya ay si Hashabias na pinuno ng kalahating distrito ng Keila.

¹⁸Ang sumunod sa kanya ay ang mga kababayan niya na pinamumunuan ng anak ni Henadad na si Binui, na pinuno ng kalahating distrito ng Keila.[#3:18 : Ito ang nasa dalawang kopya ng tekstong Hebreo, sa Septuagint at Syriac. Karamihan sa kopyang Hebreo, Bavai.]

¹⁹Ang sumunod ay ang anak ni Jeshua na si Ezer na pinuno ng Mizpa. Itinayo niya ang bahagi ng pader na nakaharap sa bodega ng mga sandata hanggang sa sulok ng pader.

²⁰Ang sumunod naman ay si Baruc na anak ni Zabai. Buong sipag niyang itinayo ang bahagi ng pader mula sa sulok nito hanggang sa bandang pintuan ng bahay ni Eliasib na punong pari.

²¹Ang sumunod sa kanya ay si Meremot na anak ni Urias at apo ni Hakoz. Itinayo niya ang bahagi ng pader mula sa bandang pintuan ng bahay ni Eliasib hanggang sa dulo ng bahay nito.

²²Ang sumunod na nagtayo ng bahagi ng pader ay ang mga pari sa paligid ng Jerusalem.

²³Ang sumunod sa kanila ay sina Benjamin at Hasub. Itinayo nila ang bahagi ng pader na nakaharap sa bahay nila. Ang sumunod sa kanila ay si Azarias na anak ni Maaseias at apo ni Ananias. Itinayo niya ang bahagi ng pader sa bandang gilid ng bahay niya.

²⁴Ang sumunod ay si Binui na anak ni Henadad. Itinayo niya ang bahagi ng pader mula sa bahay ni Azarias hanggang sa sulok ng pader. Isa pang bahagi ng pader na ito ang kanyang ipinatayo.

²⁵Ang sumunod naman ay si Palal na anak ni Uzai. Itinayo niya ang bahagi ng pader mula sa sulok ng pader at ng nakausling tore sa palasyo, malapit sa pinagpupwestuhan ng mga guwardiya. Ang sumunod sa kanya ay si Pedaia na anak ni Paros,

²⁶at ang mga tagapaglingkod sa Templo na nakatira sa may bulubundukin ng Ofel. Itinayo nila ang bahagi ng pader pasilangan, hanggang sa Pintuan ng Tubig at sa nakausling tore.

²⁷Ang sumunod sa kanila ay ang mga taga-Tekoa. Itinayo nila ang bahagi ng pader mula sa malalaking toreng nakausli hanggang sa pader ng Ofel. Pangalawang bahagi na ito ng pader na kanilang itinayo.

²⁸Ang nagtayo ng bahagi ng pader na paahon mula sa Pintuan ng mga Kabayo ay ang mga pari. Itinayo ng bawat isa sa kanila ang bahagi na nakaharap sa bahay nila.

²⁹Ang sumunod sa kanila ay si Sadoc na anak ni Imer. Itinayo niya ang bahagi ng pader na nakaharap sa bahay niya. Ang sumunod sa kanya ay ang anak ni Secanias na si Semaias, na tagapagbantay ng Pintuan sa Silangan.

³⁰Ang sumunod sa kanya ay si Hananias na anak ni Selemias at si Hanun na ikaanim na anak ni Zalaf. Pangalawang bahagi na ito ng pader na kanilang itinayo. Ang sumunod sa kanila ay si Mesulam na anak ni Berequias. Itinayo niya ang bahagi ng pader na nakaharap sa bahay niya.

³¹Ang sumunod naman ay si Malquias na isang platero. Itinayo niya ang bahagi ng pader hanggang sa tinitirhan ng mga tagapaglingkod sa Templo at ng mga mangangalakal, na nakaharap sa Pintuan ng Pinagtitipunan, at hanggang sa kuwarto sa sulok na nasa itaas ng pader.

³²Ang nagtayo ng bahagi ng pader mula sa kuwartong iyon hanggang sa pintuan na tinatawag na Tupa ay ang mga platero at mga mangangalakal.