Mga Bilang 12

Kinalaban nina Miriam at Aaron si Moises

¹Ngayon, siniraan nila Miriam at Aaron si Moises dahil nakapag-asawa siya ng isang taga-Cush.[#12:1 : Sa Hebreo, taga-Etiopia.]

²Sinabi nila, “Sa pamamagitan lang ba ni Moises nakikipag-usap ang Panginoon ? Nakikipag-usap din siya sa amin.” Subalit narinig ito ng Panginoon .

³(Mapagpakumbaba si Moises higit sa lahat ng mga tao sa mundo.)

⁴Kaya nakipag-usap agad ang Panginoon kina Moises, Aaron at Miriam, “Lumabas kayong tatlo at pumunta sa Toldang Tipanan.” Kaya pumunta silang tatlo sa Tolda.

⁵Pagkatapos, bumaba ang Panginoon sa pamamagitan ng ulap na parang haligi at tumayo sa pintuan ng Toldang Tipanan, at tinawag sina Aaron at Miriam. Paglapit ng dalawa,

⁶sinabi ng Panginoon sa kanila, “Pakinggan ninyo ito:

Kapag may propeta sa inyo,

ako, ang Panginoon ,

ay nakikipag-usap sa kanya

sa pamamagitan ng pangitain

at panaginip.

⁷Ngunit hindi ako ganoon makipag-usap

sa aking lingkod na si Moises

na mapagkakatiwalaang pinuno

ng aking mga mamamayan.

⁸Kung nakikipag-usap ako sa kanya,

magkaharap lang kami.

Malinaw ang aming usapan

at hindi paligoy-ligoy.

Nakikita niya ang aking anyo.

Kaya bakit hindi kayo natakot

magsalita ng masama laban

sa aking lingkod na si Moises?”

⁹Nagalit ang Panginoon sa kanila, at umalis siya.

¹⁰Nang umalis na ang ulap sa ibabaw ng Tolda, tinubuan si Miriam ng malubhang sakit sa balat, at namuti ang kanyang balat. Pagkakita ni Aaron sa kanya,[#12:10 : Sa ibang salin ng Biblia, ketong. Ang salitang Hebreo nito ay ginagamit sa ibaʼt ibang klase ng sakit sa balat na itinuturing na marumi ayon sa Lev. 13.]

¹¹sinabi ni Aaron kay Moises, “Pakiusap kapatid ko, huwag po ninyo kaming pahirapan dahil sa kasalanang nagawa namin nang may kahangalan.[#12:11 : Sa literal, panginoon.]

¹²Huwag ninyong hayaang maging tulad si Miriam sa isang batang patay nang ipinanganak at bulok ang kalahating katawan.”

¹³Kaya nagmakaawa si Moises sa Panginoon , “O Diyos ko, nakikiusap po ako sa inyo na pagalingin ninyo si Miriam.”

¹⁴Sumagot ang Panginoon kay Moises, “Hindi baʼt kapag dinuraan siya ng kanyang ama sa mukha ay pagdurusahan niya ang kahihiyang ito sa loob ng pitong araw? Kaya, palabasin siya sa kampo sa loob ng pitong araw, at pagkatapos ng pitong araw, maaari na siyang makabalik.”

¹⁵Kaya pinalabas si Miriam sa kampo sa loob ng pitong araw. Hindi nagpatuloy ang mga tao sa paglalakbay hanggang sa makabalik si Miriam sa kampo.

¹⁶Pagkatapos noon, umalis sila sa Hazerot, at nagkampo sa disyerto ng Paran.