The chat will start when you send the first message.
1Sinabi ng Panginoon kay Aaron, “Ikaw at ang mga anak mong lalaki na mula sa lahi ni Levi ang mananagot sa kasalanang ginawa ninyo sa inyong paglilingkod sa Toldang Pinagtipunan. Ngunit ikaw lang at ang mga anak mo ang mananagot sa kasalanan na inyong magagawa na may kinalaman sa inyong pagkapari.
2Kung maglilingkod ka at ang mga anak mo sa Toldang Tipanan, patulungin nʼyo ang mga kamag-anak nʼyo at kapwa Levita.
3Magtatrabaho sila sa ilalim ng iyong pamamahala at gagawin nila ang lahat ng mga gawain sa Tolda, ngunit hindi sila dapat humawak sa mga sagradong kagamitan sa Banal na Lugar o sa altar, dahil kung gagawin nila ito mamamatay sila pati kayo.
4Tutulong sila sa iyo, at tungkulin nila ang pag-aasikaso ng Toldang Tipanan at ang paggawa ng lahat ng gawain dito. Dapat walang sinumang tutulong sa iyo at sa iyong mga anak maliban sa lahi ni Levi.
5“Ikaw ang mamamahala sa pag-aasikaso ng Banal na Lugar at ng altar, upang hindi ako muling magalit sa mga Israelita.
6Ako ang pumili ng kapwa mo Levita mula sa mga Israelita para maging katulong mo. Itinalaga sila sa Panginoon para maglingkod sa Toldang Tipanan.
7Ngunit ikaw lang at ang iyong mga anak ang makapaglilingkod bilang mga pari, dahil kayo lang ang makakagawa ng mga gawain na may kinalaman sa altar at sa Pinakabanal na Lugar. Regalo ko sa inyo ang inyong pagkapari. Papatayin ang sinumang gagawa nito na hindi pari.”
8Sinabi ng Panginoon kay Aaron, “Ako ang pumili sa iyo para mamahala sa mga banal na handog na iniaalay sa akin ng mga Israelita. Ibinibigay ko ito sa iyo at sa iyong mga anak bilang inyong bahagi magpakailanman.
9May bahagi kayo sa napakabanal na mga handog na ito na hindi sinusunog, na inihandog ng mga tao sa akin bilang napakabanal na mga handog. Kasama ng mga handog na ito ang handog na pagkaing butil para sa akin, handog para sa kasalanan, at handog na pambayad ng kasalanan. Ito ang mga bahagi mo at ng iyong mga anak.
10Kainin ninyo ito bilang isang napakabanal na handog. Kailangang mga lalaki lang ang kakain nito at ituring ninyo itong banal.
11“Ang iba pang mga handog ng mga Israelita na itinataas sa altar ay para rin sa inyo. Ibinibigay ko ito sa iyo at sa iyong mga angkan, bilang inyong bahagi magpakailanman. Makakakain nito ang sinuman sa iyong pamilya na itinuturing na malinis.
12“Ibinibigay ko rin sa inyo ang mabubuting produkto na inihahandog ng mga Israelita mula sa una nilang ani: langis ng olibo, bagong alak at trigo.
13Magiging inyo ang lahat ng mga produkto na kanilang inihahandog mula sa unang ani ng kanilang lupa. Makakakain nito ang sinuman sa iyong pamilya na itinuturing na malinis.
14“Ang lahat ng bagay sa Israel na ibinigay sa akin nang buo ay magiging inyo.[#18:14 : Ang Hebreong salita nito ay nangangahulugan na ang mga bagay na ibinigay sa ay hindi na mababawi at magiging sa mga pari na ito magpakailanman. Kung minsan, itoʼy winawasak.]
15Ang lahat ng panganay na lalaki, tao man o hayop na inihahandog sa Panginoon ay magiging inyo rin. Ngunit kailangang tubusin ninyo ang mga panganay na anak na lalaki at ang mga panganay na mga hayop na itinuturing na marumi.
16Tubusin ninyo ito kung isang buwan na ang edad at kailangang tubusin ninyo ito sa halagang limang pirasong pilak ayon sa bigat ng pilak sa timbangang ginagamit ng mga pari.
17“Ngunit huwag ninyong tutubusin ang panganay na toro, tupa o kambing dahil sa akin ito. Katayin ninyo ito at iwisik ninyo ang dugo sa altar at sunugin ang mga taba bilang handog sa pamamagitan ng apoy. Ang mabangong samyo ng handog na ito ay makalulugod sa Panginoon .[#18:17 : Tingnan ang talababa sa 15:3.]
18Sa inyo ang karne nito, gaya ng dibdib at ng kanang paa ng handog na itinataas ninyo.
19Ibinibigay ko sa inyo ang lahat ng mga handog na itinataas ng mga Israelita sa akin. Para ito sa inyo at sa inyong mga angkan bilang inyong bahagi magpakailanman. Kasunduan ko ito sa iyo at sa iyong angkan na hindi magbabago magpakailanman.”[#18:19 : Sa literal, Ito ay walang katapusang kasunduan na asin para sa iyo at sa iyong lahi.]
20Sinabi pa ng Panginoon kay Aaron, “Kayong mga pari ay walang mamanahing lupa sa Israel, dahil ako mismo ang magbibigay ng inyong mga pangangailangan.
21“Kung tungkol sa mga Levita, babayaran ko sila sa kanilang serbisyo sa Tolda. Ibibigay ko sa kanila ang lahat ng ikapu na ibinibigay ng mga Israelita bilang kanilang bahagi.
22Mula ngayon, wala nang iba pang Israelita na lalapit sa Toldang Tipanan maliban sa mga pari at sa mga Levita, dahil kung lalapit sila, mananagot sila sa kanilang mga kasalanan, at mamamatay.
23Ang mga Levita ang naatasan sa mga gawain sa Toldang Tipanan, at mananagot sila sa kanilang magagawang kasalanan laban dito. Ang mga tuntuning ito ay dapat tuparin hanggang sa susunod pang mga henerasyon. Walang mamanahing lupa ang mga Levita sa Israel.
24Sa halip, ibibigay ko sa kanila bilang kanilang bahagi ang mga ikapu na ibinibigay ng mga Israelita bilang handog nila sa Panginoon . Iyan ang dahilan kung bakit sinasabi ko na ang mga Levita ay walang mamanahing lupa sa Israel.”
25Inutusan ng Panginoon si Moises
26na sabihin niya ito sa mga Levita: “Kung matanggap na ninyo mula sa mga Israelita ang ikapu na ibibigay ko sa inyo bilang inyong bahagi, kailangang magbigay din kayo ng inyong ikapu galing sa ikapu nila, bilang handog sa Panginoon .
27Ituturing ko ito bilang inyong handog mula sa mga ani, na parang naghandog kayo ng trigo mula sa giikan o alak mula sa pisaan ng ubas.
28Sa pamamagitan nito, makapagbibigay din kayo ng handog sa Panginoon galing sa lahat ng ikapu na inyong natanggap mula sa aking mga Israelita. At sa aking bahagi na iyon, ang ikapu nito ay ibigay ninyo sa paring si Aaron.
29Kinakailangang ialay sa Panginoon ang pinakamaganda at pinakabanal na bahagi ng lahat ng ibinibigay sa inyo.
30“Sabihin ninyo ito sa mga Levita: ‘Kapag naihandog na ninyo ang pinakamagandang bahagi, ituturing ko itong handog ninyo mula sa giikan o pisaan ng ubas.
31Maaari mong kainin at ng iyong pamilya ang inyong bahagi kahit saang lugar dahil suweldo ninyo iyan sa inyong paglilingkod sa Toldang Tipanan.
32Hindi kayo magkakasala sa pagkain ninyo nito kung naihandog na ninyo ang pinakamabuting bahagi sa Panginoon . Ngunit tiyakin ninyong hindi ninyo marurumihan ang banal na mga handog ng mga Israelita, sa pamamagitan ng pagkain ng inyong bahagi nang hindi pa ninyo naibibigay ang aking bahagi para hindi kayo mamatay.’ ”