Mga Bilang 21

Natalo ang mga Cananeo

¹Nang mabalitaan ng Cananeong hari ng Arad na naninirahan sa Negeb, na paparating ang mga Israelitang dumadaan sa Atarim, sinalakay niya sila at binihag ang iba sa kanila.

²Pagkatapos, sumumpa ang mga Israelita sa Panginoon , “Kung ibibigay nʼyo po ang mga taong ito sa aming mga kamay, wawasakin namin nang lubusan ang kanilang mga bayan bilang handog sa inyo.”

³Pinakinggan ng Panginoon ang pakiusap ng mga Israelita at ibinigay niya sa kanila ang mga Cananeo. Lubusan silang nilipol ng mga Israelita pati ang kanilang mga bayan bilang handog sa Panginoon, kaya tinawag itong lugar ng Horma.

Ang Ahas na Tanso

⁴Mula sa Bundok ng Hor, naglakbay ang mga Israelita at binaybay daan na papunta sa Dagat na Pula para makaikot sila sa lupain ng Edom. Ngunit nagsawa ang mga tao sa kanilang paglalakbay,

⁵kaya nagreklamo sila sa Diyos at kay Moises. Sinabi nila, “Bakit ba pinalabas mo pa kami sa Ehipto para mamatay lang dito sa disyerto? Walang pagkain at tubig dito! At hindi na kami makakatiis sa nakakasawang ‘manna’ na ito!”

⁶Kaya pinadalhan sila ng Panginoon ng mga makamandag na ahas at pinagtutuklaw sila, at marami ang namatay sa kanila.

⁷Pumunta ang mga tao kay Moises at sinabi, “Nagkasala kami nang magsalita kami laban sa Panginoon at sa iyo. Ipanalangin ninyo sa Panginoon na tanggalin niya ang mga ahas na ito.” Kaya ipinanalangin ni Moises ang mga tao.

⁸Sinabi ng Panginoon kay Moises, “Gumawa ka ng ahas mula sa tanso at ilagay ito sa dulo ng isang poste. Ang sinumang nakagat ng ahas na titingin sa tansong ahas na ito ay hindi mamamatay.”

⁹Kaya gumawa si Moises ng tansong ahas at inilagay niya ito sa dulo ng isang poste. At ang mga nakagat ng ahas na tumingin sa tansong ahas ay hindi nga namatay.

Ang Paglalakbay Papunta sa Moab

¹⁰Nagpatuloy sa paglalakbay ang mga Israelita, at nagkampo sila sa Obot.

¹¹Mula sa Obot, naglakbay silang muli at nagkampo sa Iye Abarim, sa disyerto na nasa bandang silangan ng Moab.

¹²Mula roon, naglakbay sila at nagkampo sa Lambak ng Zered.

¹³At mula sa Zered naglakbay na naman sila at nagkampo sa kabila ng Lambak ng Arnon, na nasa ilang na malapit sa teritoryo ng mga Amoreo. Ang Arnon ang hangganan sa gitna ng lupain ng mga Moabita at lupain ng mga Amoreo.

¹⁴Iyan ang dahilan kung bakit nakasulat sa Aklat ng Pakikipaglaban ng Panginoon :

“ang bayan ng Waheb na sakop ng Sufa,

ang mga lambak ng Arnon,

¹⁵pati ang gilid ng mga lambak

na umaabot sa bayan ng Ar

na nasa hangganan ng Moab.”

¹⁶Mula doon sa Arnon, nagpatuloy ang mga Israelita sa Beer, ang balon na kung saan sinabi ng Panginoon kay Moises, “Tipunin ninyo ang mga tao at bibigyan ko sila ng tubig.”

¹⁷At doon umawit ang mga Israelita ng awit na ito:

Patuloy na magbibigay

ng tubig ang balong ito!

Aawit tayo tungkol sa balong ito

¹⁸na ipinahukay ng mga pinuno

at mararangal na tao

sa pamamagitan ng kanilang kapangyarihan.

Mula sa disyerto nagpunta sila sa Matana;

¹⁹mula sa Matana nagpunta sila sa Nahaliel; mula sa Nahaliel nagpunta sila sa Bamot,

²⁰at mula sa Bamot nagpunta sila sa lambak ng Moab, na kung saan makikita ang disyerto sa baba ng tuktok ng Pisga.

Natalo si Haring Sihon at si Haring Og

²¹Ngayon, nagsugo ng mga mensahero ang Israel kay Sihon na hari ng mga Amoreo. Ganito ang kanilang mensahe:

²³Ngunit hindi pumayag si Sihon na dumaan ang mga Israelita sa kanyang teritoryo. Sa halip, tinipon niya ang kanyang mga sundalo at nagpunta sila sa disyerto para salakayin ang mga Israelita. Pagdating nila sa Jahaz, nakipaglaban sila sa mga Israelita.

²⁴Subalit pinagpapatay sila ng mga Israelita, at inagaw ang kanilang lupain mula sa Arnon papunta sa Ilog Jaboc. Ngunit hanggang sa hangganan lang sila ng lupain ng mga Amonita dahil ang kanilang hangganan ay napapaderan.[#21:24 : Sa Septuagint, Jazer ang tawag sa kanilang hangganan.]

²⁵Kaya naagaw ng mga Israelita ang lahat ng lungsod ng mga Amoreo at tinirhan nila ito, pati ang Hesbon at ang lahat ng mga bayang nasa paligid nito.

²⁶Ang Hesbon ang kabisera ng lungsod ni Sihon na hari ng mga Amoreo. Natalo niya noon ang isang hari ng Moab at inagaw niya ang lahat ng lupain nito hanggang sa Arnon.

²⁷Iyan ang dahilan kung bakit sinasabi ng mga makata na,

“Pumunta kayo sa Hesbon, ang lungsod ni Sihon,

at muli nʼyo itong ipatayo.

²⁸“Noon, sumasalakay ang mga sundalo ng Hesbon

katulad ng naglalagablab na apoy

at lumamon sa bayan ng Ar na sakop ng Moab

at sumira sa mataas na lugar ng Arnon.

²⁹Nakakaawa kayong mga taga-Moab!

Bumagsak kayong mga sumasamba

sa diyos na si Cemos.

Kayong mga anak niya

ay pinabayaan niyang mabihag

ni Sihon na hari ng Amoreo.

³⁰“Ngunit ngayon, bagsak na

ang mga Amoreo.

Nagiba ang lungsod ng Hesbon,

pati ang Dibon, Nofa at Medeba.”

³¹Kaya nanirahan ang mga Israelita sa lupain ng mga Amoreo.

³²Pagkatapos, nagpadala si Moises ng mga espiya sa Jazer, at inagaw din nila ito pati ang mga baryo na sakop nito. Pinaalis nila ang mga Amoreo na naninirahan doon.

³³Pagkatapos, nagpunta naman sila sa Bashan, ngunit sinalakay sila ni Haring Og ng Bashan at ng lahat ng mga sundalo nito doon sa Edrei.

³⁴Sinabi ng Panginoon kay Moises, “Huwag kang matakot sa kanya dahil tiyak na ibibigay ko siya sa iyo at ang kanyang mga sundalo sa inyo, pati ang kanyang lupain. Gagawin mo sa kanya ang ginawa mo kay Sihon na hari ng mga Amoreo, na naghari sa Hesbon.”

³⁵Kaya pinagpapatay ng mga Israelita si Og pati ang kanyang mga anak at ang lahat ng kanyang mamamayan, kaya walang natira sa kanila. At inangkin ng mga Israelita ang lupaing sakop ni Og.