Mga Bilang 29

Ang mga Handog sa Pista ng Pagpapatunog ng mga Trumpeta

¹“Sa unang araw ng ikapitong buwan, huwag kayong magtatrabaho, sa halip magtipon kayo para sumamba sa Panginoon . Sa araw na iyon ay patunugin ninyo ang mga trumpeta.

²Pagkatapos, mag-alay kayo ng mga handog na sinusunog na ang mabangong samyo nito ay makalulugod sa Panginoon : isang batang toro, isang lalaking tupa at pitong batang tupa na isang taóng gulang. Kailangang walang kapintasan ang lahat ng mga ito.

³Sa paghahandog ninyo ng mga ito, samahan ninyo ito ng mga handog na pagkaing butil para sa Panginoon . Magandang klaseng harina na hinaluan ng langis ang ihalo ninyo – tatlong kilo sa bawat batang toro, dalawang kilo para sa lalaking tupa

⁴at isang kilo sa bawat batang tupa.

⁵Maghandog din kayo ng isang lalaking kambing bilang handog para sa kasalanan upang mapatawad ang inyong mga kasalanan.

⁶Ihandog ninyo ito bukod pa sa buwanan at pang-araw-araw na mga handog na sinusunog na may kasamang handog na pagkaing butil para sa Panginoon at mga handog na inumin. Mga handog ito na sinusunog, at ang mabangong samyo nito ay makalulugod sa Panginoon .

Mga Handog sa Araw ng Pagtubos

⁷“Sa ikasampung araw nitong ikapitong buwan, magtipon kayo para sumamba sa Panginoon . Kailangang mag-ayuno kayo at huwag na huwag kayong magtatrabaho.

⁸Pagkatapos, mag-alay kayo ng handog na sinusunog, bilang nakalulugod na samyo sa Panginoon : isang batang toro, isang lalaking tupa at pitong batang tupa na isang taóng gulang. Kailangang walang kapintasan ang lahat ng mga ito.

⁹Sa paghahandog ninyo, samahan ito ng handog na pagkaing butil para sa Panginoon . Ang isama ninyo ay magandang klaseng harina na hinaluan ng langis – tatlong kilo sa bawat batang toro, dalawang kilo sa bawat lalaking tupa

¹⁰at isang kilo sa bawat batang tupa.

¹¹Maghandog din kayo ng isang lalaking kambing bilang handog para sa kasalanan, bukod pa sa isang handog bilang kapalit ninyo upang matubos kayo sa inyong mga kasalanan at sa pang-araw-araw na handog na sinusunog na may kasamang handog na pagkaing butil para sa Panginoon , at sa handog na inumin.

Ang mga Handog sa Pista ng Kubol

¹²“Sa ikalabinlimang araw ng ikapitong buwan, huwag kayong magtatrabaho, sa halip magtipon kayo para sumamba sa Panginoon . Magdiwang kayo ng pista para sa Panginoon sa loob ng pitong araw.

¹³Mag-alay kayo ng mga handog na sinusunog na ang mabangong samyo nito ay makalulugod sa Panginoon . Sa unang araw, ito ang inyong ihandog: labintatlong batang toro, dalawang lalaking tupa at labing-apat na batang tupa na isang taóng gulang. Kailangang walang kapintasan ang lahat ng mga ito.

¹⁴Sa paghahandog ninyo nito, samahan ninyo ito ng handog na pagkaing butil para sa Panginoon . Haluan ninyo ito ng magandang klaseng harina na hinaluan ng langis – tatlong kilo sa bawat batang toro, dalawang kilo sa bawat lalaking tupa

¹⁵at isang kilo sa bawat batang tupa.

¹⁶Mag-alay din kayo ng isang lalaking kambing bilang handog para sa kasalanan, bukod pa sa pang-araw-araw na handog na sinusunog na may kasamang handog na pagkaing butil para sa Panginoon at handog na inumin.

¹⁷“Sa ikalawang araw, ito ang inyong ihandog: labindalawang batang toro, dalawang lalaking tupa at labing-apat na batang tupa na isang taóng gulang. Kailangang walang kapintasan ang lahat ng mga ito.

¹⁸Sa paghahandog ninyo nito, samahan ninyo ito ng tamang dami ng handog na pagkaing butil para sa Panginoon at handog na inumin.

¹⁹Maghandog din kayo ng isang lalaking kambing bilang handog para sa kasalanan bukod pa sa pang-araw-araw na handog na sinusunog na may kasamang handog na pagkaing butil para sa Panginoon at handog na inumin.

²⁰“Sa ikatlong araw, maghandog kayo ng labing-isang batang toro, dalawang lalaking tupa at labing-apat na batang tupa na isang taóng gulang. Kailangang walang kapintasan ang lahat ng mga ito.

²¹Sa paghahandog ninyo nito, samahan ninyo ito ng tamang dami ng handog na pagkaing butil para sa Panginoon at handog na inumin.

²²Maghandog din kayo ng isang lalaking kambing bilang handog para sa kasalanan, bukod pa sa pang-araw-araw na handog na sinusunog na may kasamang handog na pagkaing butil para sa Panginoon at handog na inumin.

²³“Sa ikaapat na araw, ito ang inyong ihandog: sampung batang toro, dalawang lalaking tupa at labing-apat na batang tupa na isang taóng gulang. Kailangang walang kapintasan ang lahat ng mga ito.

²⁴Sa paghahandog ninyo nito, samahan ninyo ito ng tamang dami ng handog na pagkaing butil para sa Panginoon at handog na inumin.

²⁵Mag-alay din kayo ng isang lalaking kambing bilang handog para sa kasalanan, bukod pa sa pang-araw-araw na handog na sinusunog na may kasamang handog na pagkaing butil para sa Panginoon at handog na inumin.

²⁶“Sa ikalimang araw, ito ang inyong ihandog: siyam na batang toro, dalawang lalaking tupa at labing-apat na batang tupa na isang taóng gulang. Kailangang walang kapintasan ang lahat ng mga ito.

²⁷Sa paghahandog ninyo nito, samahan nʼyo ito ng tamang dami ng handog na pagkaing butil para sa Panginoon at handog na inumin.

²⁸Maghandog din kayo ng isang lalaking kambing bilang handog para sa kasalanan, bukod pa sa pang-araw-araw na handog na sinusunog na may kasamang handog na pagkaing butil para sa Panginoon at handog na inumin.

²⁹“Sa ikaanim na araw, ito ang inyong ihandog: walong batang toro, dalawang lalaking tupa at labing-apat na batang tupa na isang taóng gulang. Kailangang walang kapintasan ang lahat ng mga ito.

³⁰Sa paghahandog ninyo nito, samahan ninyo ito ng tamang dami ng handog na pagkaing butil para sa Panginoon at handog na inumin.

³¹Maghandog din kayo ng isang lalaking kambing bilang handog para sa kasalanan, bukod pa sa pang-araw-araw na handog na sinusunog na may kasamang handog na pagkaing butil para sa Panginoon at handog na inumin.

³²“Sa ikapitong araw, ito ang inyong ihandog: pitong batang toro, dalawang lalaking tupa at labing-apat na batang tupa na isang taóng gulang. Kailangang walang kapintasan ang lahat ng mga ito.

³³Sa paghahandog ninyo nito, samahan ninyo ito ng tamang dami ng handog na pagkaing butil para sa Panginoon at handog na inumin.

³⁴Maghandog din kayo ng isang lalaking kambing bilang handog para sa kasalanan, bukod pa sa pang-araw-araw na handog na sinusunog na may kasamang handog na pagkaing butil para sa Panginoon at handog na inumin.

³⁵“Sa ikawalong araw, huwag kayong magtatrabaho, sa halip magtipon kayo para sa pagsamba sa Panginoon .

³⁶Mag-alay kayo ng handog na sinusunog na ang mabangong samyo nito ay makalulugod sa Panginoon : isang batang toro, isang lalaking tupa at pitong batang tupa na isang taóng gulang. Kailangan na walang kapintasan ang lahat ng mga ito.

³⁷Sa paghahandog ninyo nito, samahan ninyo ito ng tamang dami ng handog na pagkaing butil para sa Panginoon at handog na inumin.

³⁸Maghandog din kayo ng isang lalaking kambing bilang handog para sa kasalanan, bukod pa sa pang-araw-araw na handog na sinusunog na may kasamang handog na pagkaing butil para sa Panginoon at handog na inumin.

³⁹“Bukod pa sa mga handog para sa pagtupad ng inyong panata at mga handog na kusang-loob, maghandog din kayo sa Panginoon sa nakatakdang mga pista ng mga handog na ito, mga handog na sinusunog, mga handog na pagkaing butil para sa Panginoon , mga handog na inumin at mga handog pangkapayapaan.”

⁴⁰Sinabing lahat ito ni Moises sa mga Israelita ayon sa iniutos sa kanya ng Panginoon .