Mga Bilang 8

Ang Paglalagay ng mga Ilaw

¹Sinabi ng Panginoon kay Moises,

²“Sabihin mo kay Aaron na kung ilalagay na niya ang pitong ilaw, kailangang maliwanagan ng ilaw ang lugar sa harapan ng pinaglagyan nito.”

³Kaya ginawa ito ni Aaron; inilagay niya ang mga ilaw kung saan ang sinag ng mga ito ay nagliliwanag sa harapan, ayon sa iniutos ng Panginoon kay Moises.

⁴Ang buong lalagyan ng ilaw, mula sa ilalim hanggang sa itaas ay gawa sa pinitpit na ginto ayon sa disenyo na ipinakita ng Panginoon kay Moises.

Ang Pagtatalaga ng mga Levita

⁵Sinabi ng Panginoon kay Moises,

⁶“Ibukod ang mga Levita sa ibang mga Israelita, at linisin sila.[#8:6 : Ang ibig sabihin, gagawin silang karapat-dapat sa makiisa sa mga seremonyang panrelihiyon nila.]

⁷Ganito ang gagawin mong paglilinis sa kanila: Wisikan mo sila ng tubig na ginagamit sa paglilinis, paahitan ang buo nilang katawan, at palabhan ang kanilang mga damit. Pagkatapos nito ay ituturing na silang malinis.

⁸Pagkatapos, pagdalhin mo sila ng batang toro at ng magandang klaseng harina na hinaluan ng langis bilang handog para sa kasalanan nila sa Panginoon . Pagdalhin mo rin sila ng isa pang batang toro bilang handog para sa kasalanan.

⁹“Pagkatapos, tipunin mo ang lahat ng mga mamamayan ng Israel at italaga ang mga Levita sa harap ng Toldang Tipanan.

¹⁰Dalhin mo ang mga Levita sa harapan ng Panginoon at ipapatong ng mga Israelita ang kanilang mga kamay sa mga ulo nito.

¹¹Si Aaron ang magtatalaga sa kanila sa harapan ng Panginoon bilang handog na itinataas mula sa mga Israelita, para makapaglingkod sila sa Panginoon .

¹²“Pagkatapos, ipapatong ng mga Levita ang mga kamay nila sa ulo ng dalawang toro na handog para sa Panginoon . Ang isa ay bilang handog para sa kasalanan at ang isa naman ay bilang handog na sinusunog, para mapatawad sila sa kanilang mga kasalanan.

¹³At patatayuin sila sa harapan ni Aaron at ng mga anak niyang lalaki, at itatalaga sila bilang espesyal na handog sa Panginoon .

¹⁴Sa pamamagitan nito, ibubukod mo ang mga Levita sa ibang mga Israelita, at magiging akin sila.

¹⁵“Pagkatapos na malinisan mo ang mga Levita at maitalaga sila sa akin bilang espesyal na handog, makapaglilingkod na sila sa Toldang Tipanan.

¹⁶Sila ang mga Israelita na ibinukod para lang sa akin kapalit ng lahat ng panganay na lalaki ng mga Israelita.

¹⁷Dahil ang bawat panganay sa Israel, tao man o hayop, ay akin. Nang pinagpapatay ko ang lahat ng panganay ng mga Ehipsiyo, ibinukod ko para sa akin ang lahat ng panganay na lalaki ng Israel.

¹⁸At kinuha ko ang mga Levita kapalit ng lahat ng panganay na lalaki ng Israel.

¹⁹Sa lahat ng mga Israelita, ang mga Levita ang pinili ko na tumulong kay Aaron at sa mga anak niyang lalaki. Maglilingkod sila sa Toldang Tipanan para sa mga Israelita, at gagawin nila ang mga seremonya para sa kapatawaran ng kasalanan ng mga Israelita, para walang panganib na dumating sa kanila kapag lumapit sila sa Toldang Tipanan.”

²⁰Kaya itinalaga nila Moises, Aaron at ng lahat ng mga mamamayan ng Israel ang mga Levita ayon sa iniutos ng Panginoon kay Moises.

²¹Naglinis ang mga Levita ng kanilang sarili at nilabhan nila ang kanilang mga damit. Pagkatapos, itinalaga sila ni Aaron sa presensya ng Panginoon bilang espesyal na handog, at gumawa si Aaron ng seremonya para sa kapatawaran ng mga kasalanan nila, at para maituring silang malinis.

²²Pagkatapos noon, naglingkod na ang mga Levita sa Toldang Tipanan sa ilalim ng pamamahala ni Aaron at ng mga anak niya. Kaya ginawa nila sa mga Levita ang iniutos ng Panginoon kay Moises.

²³Sinabi ng Panginoon kay Moises,

²⁴“Para sa mga Levita ang mga tuntuning ito: Magsisimula ang mga Levita sa paglilingkod sa Toldang Tipanan sa edad na dalawampuʼt lima,

²⁵at titigil sila sa paglilingkod sa edad na limampu. At kapag magreretiro na sila,

²⁶maaari silang makatulong sa kapwa nila Levita sa pamamagitan ng paglilingkod bilang tagapagbantay sa Tolda, ngunit hindi na sila gagawa ng mga gawain sa Tolda. Ganito ang paraan kung paano mo ibibigay ang mga tungkulin sa mga Levita.”