Kawikaan 11

¹Kinasusuklaman ng Panginoon

ang nandaraya sa timbangan,

ngunit ang nagtitimbang ng tama

ay kanyang kinalulugdan.

²Ang taong mayabang

ay madaling mapahiya,

ngunit may karunungan

ang taong mapagpakumbaba.

³Ang pamumuhay nang may katapatan

ang gagabay sa taong matuwid,

ngunit ang taong mandaraya

ay mapapahamak

dahil hindi tama ang kanyang pamumuhay.

⁴Ang kayamanan ay hindi makakatulong

sa araw ng paghuhukom,

ngunit ang matuwid na pamumuhay

ay magliligtas sa iyo sa kamatayan.

⁵Ang matuwid at walang kapintasang pamumuhay

ay makapagpapagaan ng buhay,

ngunit ang masamang pamumuhay

ay maghahatid ng kapahamakan.

⁶Ang pamumuhay ng taong matuwid

ang magliligtas sa kanya,

ngunit ang hangad ng taong mandaraya

ang magpapahamak sa kanya.

⁷Kapag namatay ang taong masama,

pag-asa niyaʼy mawawala,

at ang kanyang mga inaasahan

ay mawawalan ng kabuluhan.

⁸Inililigtas ng Diyos sa kahirapan ang matuwid,

ngunit ang masamâʼy kanyang pinapabayaan.

⁹Ang salita ng walang diyos

ay nakakasira ng kapwa.

Ngunit ang karunungan ng matuwid

ay nakakaligtas.

¹⁰Kapag ang matuwid ay pinagpapala,

mga taoʼy sumisigaw sa tuwa.

At kapag ang masama ay napapahamak

ganoon din ang kanilang ginagawa.

¹¹Umuunlad ang isang bayan

sa pagpapala ng mga mamamayang matuwid,

subalit nawawasak ito sa pamamagitan

ng salita ng masama.

¹²Ang taong walang pang-unawa

ay kinukutya ang kapwa,

ngunit ang taong may pang-unawa

ay hindi nangungutya.

¹³Ang mga taong madaldal

ay nagsisiwalat ng sikreto,

ngunit ang taong mapagkakatiwalaan

ay nakakapagtago nito.

¹⁴Kung walang gumagabay,

babagsak ang bansa,

ngunit tiyak ang kaligtasan

kung maraming tagapayo.

¹⁵Mapanganib ang mangakong managot

sa utang ng iba,

kaya iwasan itong gawin

upang hindi ka magkaproblema.

¹⁶Ang babaeng maganda ang ugali

ay nag-aani ng karangalan,

ngunit ang taong marahas

ay magaling lang sa pag-angkin

ng kayamanan.

Ang taong tamad ay maghihirap,

ngunit ang taong masipag ay yayaman.

¹⁷Ang mabuting tao ay gagantimpalaan

ng kanyang kabutihan,

ngunit hahantong sa kapahamakan

ang taong malupit.

¹⁸Ang masamang tao

ay hindi tatanggap

ng tunay na gantimpala,

ngunit ang gumagawa ng matuwid

ay tatanggap ng tunay na gantimpala.

¹⁹Ang taong gumagawa ng matuwid

ay patuloy na mabubuhay,

ngunit ang taong gumagawa ng masama

ay mamamatay.

²⁰Kasuklam-suklam sa Panginoon

ang pag-iisip ng masama,

ngunit ang buhay na matuwid

ay kalugod-lugod sa kanya.

²¹Ang taong masama,

tiyak na parurusahan,

ngunit ang matuwid ay makakaligtas.

²²Ang magandang babaeng

hindi marunong magpasya

ay parang isang gintong singsing

sa nguso ng baboy.

²³Ang ninanais ng matuwid

ay pawang kabutihan,

ngunit ang ninanais ng masama

ay nagdudulot ng kaguluhan.

²⁴Ang mga taong mapagbigay

ay lalong yumayaman,

ngunit ang mga taong sakim

ay hahantong sa kahirapan.

²⁵Ang taong mapagbigay

ay magtatagumpay sa buhay;

ang taong tumutulong

ay tiyak na tutulungan.

²⁶Isinusumpa ng mga tao

ang nagtatago ng ani niya,

ngunit ang gustong magtinda nito

ay pinagpapala nila.

²⁷Ang naghahanap ng kabutihan,

siyaʼy mapapaburan,

ngunit ang naghahanap ng kasamaan,

itoʼy kanyang makakamtan.

²⁸Mabibigo ang taong nagtitiwala

sa kanyang kayamanan,

ngunit ang taong matuwid

ay lalago na parang

sariwang halaman.

²⁹Ang mga hangal na nagdadala

ng gulo sa sariling tahanan

ay walang mamanahin sa huli.

Magiging alipin lang sila

ng mga taong may karunungan.

³⁰Ang ginagawa ng mga taong matuwid

ay makakatulong sa iba upang mapabuti

at mapahaba ang kanilang buhay.

At madadala niya ang mga tao

sa pamamagitan ng kanyang karunungan.

³¹Kung natatanggap ng matutuwid

ang kanilang gantimpala dito sa lupa,

paano pa kaya ang mga walang diyos

at mga makasalanan?