Kawikaan 12

¹Ang taong tumatanggap ng pagtutuwid

sa kanyang pag-uugali

ay nagnanais ng karunungan,

ngunit ang taong ayaw tumanggap

ay hangal.

²Ang mabuting tao

ay kinalulugdan ng Panginoon ,

ngunit ang taong nagpaplano ng masama

ay kanyang pinarurusahan.

³Ang taong gumagawa ng masama

ay walang katatagan,

ngunit ang taong matuwid

ay matatag tulad ng isang punongkahoy

na malalim ang ugat.

⁴Ang mabuting maybahay

ay kasiyahan at karangalan

ng kanyang asawa,

ngunit parang kanser sa buto

ang nakakahiyang asawa.

⁵Ang iniisip ng taong matuwid ay tama,

ngunit ang mga payo ng taong masama

ay mapanlinlang.

⁶Ang salita ng taong masama

ay nakamamatay,

ngunit ang salita ng taong matuwid

ay nakapagliligtas.

⁷Mapapahamak at maglalaho

ang mga taong masama,

ngunit mananatili ang lahi

ng mga taong matuwid.

⁸Pinararangalan ang taong may karunungan,

ngunit hinahamak ang taong

masama ang kaisipan.

⁹Mas mabuti ang taong simple

ngunit kayang magbayad ng katulong

kaysa sa taong nagkukunwaring mayaman

ngunit kahit makain ay wala naman.

¹⁰Ang taong matuwid ay mabait

sa kanyang mga alagang hayop,

ngunit ang taong masama

ay malupit at walang awa

sa kanyang mga hayop.

¹¹Ang masipag magsaka sa kanyang lupain

ay laging sagana sa pagkain,

ngunit ang gumugugol ng oras

sa walang kabuluhang bagay

ay salat sa karunungan.

¹²Kinaiinggitan ng magnanakaw

ang nasamsam ng kanyang kapwa,

subalit nag-uugat ang matuwid

at nananatiling matatag.

¹³Ang kasamaang sinasabi ng taong masama

ay nagdudulot sa kanya ng gulo,

ngunit ang taong matuwid

ay umiiwas sa gulo.

¹⁴Ang mga salitang nagmumula sa karunungan,

ay nagbubunga ng mabubuting bagay

at ang pagbabanat-buto namaʼy

may gantimpalang naghihintay.

¹⁵Ang akala ng hangal ay palagi siyang tama,

ngunit ang taong marunong

ay nakikinig sa payo.

¹⁶Ang hangal ay madaling magalit,

ngunit ang taong maalam ay hindi pinapansin

ang pang-iinsulto sa kanya.

¹⁷Ang tapat na saksi ay nagsasabi ng katotohanan,

ngunit ang hindi tapat na saksi

ay nagsasabi ng kasinungalingan.

¹⁸Ang pabigla-biglang salita

ay nakakasugat ng damdamin,

ngunit ang magandang salita

ay nagpapagaling.

¹⁹Ang katotohanan ay mananatili kailanman,

ngunit hindi magtatagal ang kasinungalingan.

²⁰Pandaraya ang nasa puso

ng mga taong nagbabalak ng masama,

ngunit kagalakan ang nasa puso

ng mga taong naghahangad

ng kapayapaan.

²¹Walang mangyayaring masama

sa taong matuwid,

ngunit ang masasamâ, pawang kaguluhan

ang mararanasan.

²²Nasusuklam ang Panginoon

sa mga nagsasabi ng kasinungalingan,

ngunit nalulugod siya sa nagsasabi

ng katotohanan.

²³Hindi ipinagyayabang

ng taong maalam ang kanyang nalalaman,

ngunit ang hangal ay ibinibida

ang kanyang kahangalan.

²⁴Ang taong masipag ay magiging pinuno,

ngunit ang tamad ay magiging alipin.

²⁵Ang kabalisahan sa puso ng isang tao

ay nakapagpapalungkot,

ngunit kaaaliwan nito

ang mabuting salita.

²⁶Ginagabayan ng taong matuwid

ang kanyang kaibigan,

ngunit ililigaw ka ng taong masama.

²⁷Hindi makakamit ng taong tamad

ang kanyang hinahangad,

ngunit ang taong masipag

maganda ang hinaharap.

²⁸Ang matuwid na pamumuhay

ay patungo sa buhay,

at maililigtas ka nito sa kamatayan.