Kawikaan 13

¹Ang matalinong anak ay nakikinig

sa pangaral ng kanyang ama,

ngunit ang mapangkutyang anak

ay hindi nakikinig kapag sinasaway siya.

²Ang taong nagsasalita ng mabuti

ay gagantihan ng mabuting bagay,

ngunit ang salita ng taong hindi tapat

ay gagantihan ng karahasan.

³Ang taong maingat sa pagsasalita

ay nag-iingat ng kanyang buhay.

Ngunit ang taong madaldal,

dulot sa sarili ay kapahamakan.

⁴Ang puso ng tamad

ay puno ng hangarin,

na hindi niya makakamtan,

ngunit ang inaasam ng masipag

ay tiyak na matutugunan.

⁵Ang taong matuwid

ay namumuhi sa kasinungalingan,

ngunit ang taong masama

ay gumagawa ng mga bagay

na kahiya-hiya.

⁶Ang taong walang kapintasan

ay iingatan dahil sa kanyang

matuwid na pamumuhay,

ngunit ang makasalanan

ay mapapahamak

dahil sa kanyang kasamaan.

⁷May mga taong nagkukunwaring mayaman

ngunit mahirap naman,

at may mga nagkukunwaring mahirap

ngunit mayaman naman.

⁸Ang taong mayaman

ay may pantubos ng kanyang buhay,

ngunit ang taong mahirap

ay hindi man lang pinagtatangkaan.

⁹Ang buhay ng taong matuwid

ay parang ilaw na maliwanag,

ngunit ang buhay ng masama

ay parang ilaw na namatay.

¹⁰Ang kayabangan ay humahantong

sa kaguluhan at pagtatalo,

ngunit ang nakikinig sa payo

ay nagpapahiwatig ng karunungan.

¹¹Ang kayamanang nakuha

sa pandaraya

ay madaling nawawala,

ngunit ang kayamanang pinaghirapan

ay pinagpapala.

¹²Ang hangaring naantala

ay nakapanghihina,

ngunit ang hangaring natupad

ay nakapagpapalakas at nakapagpapasigla.

¹³Ang taong tumatanggi

sa turo at utos sa kanya

ay mapapahamak,

ngunit ang sumusunod dito

ay gagantimpalaan.

¹⁴Ang mga turo ng taong matalino

ay bukal ng buhay,

ilalayo ang tao sa bitag ng kamatayan.

¹⁵Ang taong may mabuting pang-unawa

ay iginagalang,

ngunit ang taong taksil

ay kapahamakan ang kahahantungan.

¹⁶Ang taong maalam,

itinatago ang karunungan

ngunit ang taong hangal,

inilalantad ang kanyang kahangalan.

¹⁷Ang masamang sugo

ay lumilikha ng kaguluhan,

ngunit ang mapagkakatiwalaang sugo

ay nagpapabuti ng ugnayan.

¹⁸Ang taong ayaw tumanggap ng pangaral

ay daranas ng kahirapan at kahihiyan,

ngunit ang tumatanggap nito

ay pararangalan.

¹⁹Ang pangarap na natupad

ay nagdudulot ng ligaya;

subalit ang taong hangal

ay hindi tumitigil sa paggawa ng masama.

²⁰Kapag ang lagi mong kasama

ay isang taong marunong,

magiging marunong ka rin,

ngunit kapag hangal

ang lagi mong kasama

ay mapapahamak ka.

²¹Ang kapahamakan ay darating

sa mga makasalanan

saanman sila magpunta,

ngunit ang mga matuwid

ay gagantimpalaan

ng mabubuting bagay.

²²Ang kayamanan ng mabuting tao

ay mamanahin ng kanyang mga apo,

ngunit ang kayamanan ng makasalanan

ay mapupunta sa matutuwid.

²³Umani man ng sagana ang lupain ng mahihirap,

hindi rin sila makikinabang dito

dahil sa hindi makatuwirang

patakaran ng iba.

²⁴Ang mapagmahal na magulang

ay nagdidisiplina ng kanyang anak.

Sapagkat kung mahal mo ang iyong anak

itutuwid mo ang kanyang ugali.

²⁵Ang taong matuwid

ay makakakain ng sapat,

ngunit ang masasamâ

ay magugutom.