Kawikaan 14

¹Ang matalinong babaeʼy

pinapatatag ang kanyang sambahayan,

ngunit ang hangal na babaeʼy

sinisira ang sarili niyang tahanan.

²Ang taong namumuhay sa katuwiran

ay may takot sa Panginoon ,

ngunit ang namumuhay sa kasamaan

ay humahamak sa kanya.

³Ang salita ng hangal ang magpapasama sa kanya,

ngunit ang salita ng marunong

ang mag-iingat sa kanya.

⁴Kapag walang alagang baka,

walang laman ang sabsaban,

ngunit sa lakas ng baka

nagkakaroon ng masaganang ani.

⁵Ang tapat na saksi

ay hindi nagsisinungaling,

ngunit pawang kasinungalingan

ang sinasabi ng saksing sinungaling.

⁶Ang taong nangungutya

ay hindi magkakaroon ng karunungan

kahit ano pa ang kanyang gawin,

ngunit ang taong may pang-unawa

ay madaling matututo.

⁷Iwasan mo ang mga hangal

sapagkat wala kang mabuting

matututunan sa kanila.

⁸Ang taong maalam

ay naiintindihan ang nais niyang patunguhan,

ngunit ang hangal, sarili ang nililinlang.

⁹Balewala sa mga hangal

ang makagawa ng kasalanan,

ngunit ang taong matuwid

ay gustong maging kalugod-lugod sa Diyos.

¹⁰Ang bawat puso ang nakakaalam

ng kanyang sariling kabiguan,

at walang ibang makakabahagi

sa kanyang kagalakan.

¹¹Mawawasak ang tahanan

ng taong masama,

ngunit uunlad ang tahanan

ng taong matuwid.

¹²Maaaring sa tingin mo

ang daang tinatahak mo ay matuwid,

ngunit kamatayan pala ang dulo nito.

¹³Maaaring maitago ang kalungkutan

sa pamamagitan ng pagtawa,

ngunit pagkatapos ng kasiyahan

nariyan pa rin ang kalungkutan.

¹⁴Ang tao ay tatanggap

ng nararapat sa kanya

kung ano ang ginawa niya,

mabuti man o masama.

¹⁵Pinaniniwalaan ng taong wala sa katinuan

ang lahat ng kanyang napapakinggan,

ngunit ang taong maalam umunawa

ay pinag-iisipan ang kanyang napakinggan.

¹⁶Ang matalinoʼy may takot sa Panginoon

at itinatakwil ang kasamaan,

ngunit ang hangal ay mainitin

ang ulo at walang kinatatakutan.

¹⁷Ang taong madaling magalit

ay nakagagawa ng kamangmangan.

Ang nagbabalak ng masama

ay kinapopootan.

¹⁸Makikita ang kamangmangan

sa taong walang alam,

ngunit makikita ang karunungan

sa taong maalam

kung ano ang mabuti at masama.

¹⁹Ang taong masama

ay yuyuko sa taong matuwid

at magsusumamong siya

ay kahabagan.

²⁰Ang mga mahirap kadalasan

ay hindi kinakaibigan

kahit ng kanyang kapitbahay,

ngunit ang mga mayaman

ay maraming kaibigan.

²¹Ang humahamak sa kapwa

ay nagkakasala,

ngunit ang tumutulong sa dukha

ay pinagpapala.

²²Ang nagbabalak ng masama sa kapwa

ay nagkakasala,

ngunit ang nagpaplano nang mabuti

ay dadamayan at mamahalin ng kapwa.

²³Ang masikap sa trabaho

ay may pakinabang,

ngunit magiging mahirap

ang puro salita lang.

²⁴Ang karangalan ng mga taong marunong

ay ang kanilang kayamanan,

ngunit ang kahangalan ng mga hangal

ay lalo pang madadagdagan.

²⁵Ang tapat na saksi

ay nagliligtas ng buhay,

ngunit taksil ang saksing sinungaling.

²⁶Ang taong may takot sa Panginoon

ay may kasiguraduhan

at siya ang kanlungan

ng kanyang sambahayan.

²⁷Ang pagkatakot sa Panginoon

ay magpapabuti

at magpapahaba ng iyong buhay

at maglalayo sa iyo

sa bitag ng kamatayan.

²⁸Ang kapangyarihan ng isang hari

ay nasa dami ng kanyang nasasakupan,

ngunit kung walang tauhan

tiyak ang kanyang kapahamakan.

²⁹Ang mapagpasensya

ay mas higit ang karunungan,

ngunit ang madaling magalit

ay nagpapakita ng kahangalan.

³⁰Ang payapang isipan

ay nagpapalusog ng katawan,

ngunit ang pagkainggit

ay tulad ng kanser sa buto.

³¹Ang nang-aapi ng mahihirap

ay hinahamak ang Diyos

na lumikha sa kanila,

ngunit ang nahahabag sa mahihirap

ay pinararangalan ang Diyos.

³²Mapapahamak ang masama

dahil sa kanyang masamang gawain,

ngunit ang mga matuwid

ay iingatan dahil sa kanilang

pagkamakadiyos.

³³Ang karunungan ay nasa isip

ng taong may pang-unawa,

ngunit ang mangmang ay walang nalalamang

kahit na ano tungkol sa karunungan.

³⁴Ang matuwid na pamumuhay

ng mamamayan

ay nagpapaunlad ng kanilang bayan,

ngunit kung sila ay magkasala,

mapapahiya ang kanilang bansa.

³⁵Sa matalinong lingkod ang hari

ay nalulugod,

ngunit sa hangal na lingkod siya

ay napopoot.