Kawikaan 19

¹Mas mabuti pa ang mahirap

na namumuhay nang matuwid

kaysa sa hangal na sinungaling.

²Maging masigasig ka man

ngunit walang nalalaman,

wala rin itong kabuluhan.

Kapag ikaw naman ay pabigla-bigla

madali kang magkakasala.

³Kamangmangan ng tao

ang nagpapahamak sa kanyang sarili,

at pagkatapos sa Panginoon

ibinabaling ang sisi.

⁴Ang mayaman ay maraming kaibigan,

ngunit ang mahirap namaʼy

iniiwanan ng kaibigan.

⁵Ang saksing sinungaling ay parurusahan,

at ang nagsisinungaling

ay hindi makakatakas sa kaparusahan.

⁶Marami ang lumalapit sa pinunong mabait,

at sa mapagbigay ang lahat

ay nakikipagkaibigan.

⁷Ang mahihirap ay iniiwasan

ng mga kamag-anak,

at lalo na ng mga kaibigan.

Kapag sila ay kailangan,

hindi sila matagpuan.

⁸Ang taong nagsisikap na magkaroon

ng karunungan

ay nagmamahal sa sarili,

at ang nagpapahalaga

sa pang-unawa ay uunlad.

⁹Ang hindi tapat na saksi ay parurusahan,

at ang sinumang nagsisinungaling

ay mapapahamak.

¹⁰Hindi bagay sa taong mangmang

ang mamuhay sa karangyaan,

at mas lalong hindi bagay sa isang alipin

ang mamuno sa mga pinuno.

¹¹Ang karunungan ng isang tao

ay nagbubunga ng kahinahunan;

ang pagbabalewala sa kasalanan ng iba

ay karangalan niya.

¹²Ang galit ng hari ay parang atungal ng leon,

ngunit ang kanyang kabutihan

ay tulad ng hamog na bumabasa

sa mga halaman.

¹³Ang anak na hangal

ay kapahamakan

sa kanyang ama.

Ang bungangerang asawa

ay tulad ng tulo na walang tigil.

¹⁴Bahay at kayamanan sa magulang

ay namamana,

ngunit ang Panginoon lang

ang nagbibigay ng maalam na asawa.

¹⁵Kung ikaw ay tamad

at tulog lang nang tulog,

magugutom ka.

¹⁶Mabubuhay nang matagal

ang taong sumusunod sa kautusan,

ngunit ang suwail ay hahantong

sa kamatayan.

¹⁷Ang tumutulong sa mahirap

ay parang nagpapautang sa Panginoon ,

dahil ang Panginoon ang magbabayad

sa kabutihang ginawa niya.

¹⁸Ituwid mo ang iyong anak

habang may panahon pa.

Kung hindi mo siya itutuwid,

ikaw na rin ang nagpahamak sa kanya.

¹⁹Hayaan mong maparusahan

ang taong magagalitin,

dahil kapag tinulungan mo

siya nang minsan,

paulit-ulit mo lang siyang tutulungan.

²⁰Dinggin mo at sundin ang mga payo

at pagtutuwid sa iyong pag-uugali,

at sa bandang huli

ay magiging marunong ka.

²¹Marami tayong mga pinaplano,

ngunit ang kalooban pa rin

ng Panginoon ang masusunod.

²²Ang gusto natin sa isang tao

ay matapat.

Mas mabuti pang maging mahirap

kaysa maging sinungaling.

²³Ang pagkatakot sa Panginoon

ay magdudulot ng mahabang buhay,

kasapatan, at kaligtasan

sa kapahamakan.

²⁴May mga taong sobrang batugan

na kahit ang kumain ay kinatatamaran.

²⁵Parusahan mo ang mapanuya

upang matutong mag-ingat

ang wala sa katinuan.

Pagsabihan mo ang may unawa

at lalo siyang magiging marunong.

²⁶Sinumang nagmamalupit

sa kanyang ama

o di kayaʼy nagpapalayas

sa kanyang ina

ay isang anak na sumisira

sa kanyang pangalan

at nagdudulot ng kahihiyan sa bayan.

²⁷Anak, kung hindi ka makikinig

sa mga pangaral

upang maituwid ang iyong pag-uugali,

tinatanggihan mo ang mga turo

na nagbibigay ng karunungan.

²⁸Ang saksing sinungaling

ay humahamak sa katarungan,

at ang bibig ng masama

ay lumalamon ng kasamaan.

²⁹Sa mga mapanuya

ay may hatol na nakalaan,

at hagupit naman ang nakahanda

para sa mga hangal.