Kawikaan 20

¹Ang alak ay nagbubunga ng panunuya,

inuming matapang na dulot ay kaguluhan,

kaya ang taong naglalasing ay salat

sa karunungan.

²Ang poot ng hari ay nakakasindak

tulad ng atungal ng leon.

Manganganib ang buhay

ng gumagalit sa kanya.

³Ang pag-iwas sa gulo

ay tanda ng karangalan;

ang hangal lang ang may gusto

ng kaguluhan.

⁴Ang taong tamad mag-araro

sa panahon ng pagtatanim

ay walang makukuha

pagdating ng anihan.

⁵Ang isipan ng tao ay tulad ng tubig

sa balong malalim,

kaya itong igibin ng taong marunong.

⁶Marami ang nagsasabing sila ay tapat,

ngunit ang totooʼy mahirap makahanap

ng taong tunay na mapagkakatiwalaan?

⁷Ang taong matuwid

ay walang kapintasan.

Mapalad ang mga anak niya

kung siya ang kanilang tinutularan.

⁸Kapag ang hari ay humahatol,

tinitiyak muna niya kung sino

ang gumawa ng masama.

⁹Sino ang makapagsasabing,

“Napanatili kong malinis ang aking puso.

Busilak ito at walang kasalanan.”

¹⁰Ang madadayang timbangan at sukatan,

sa paningin ng Panginoon

ay kasuklam-suklam.

¹¹Ang mga ginagawa ng isang kabataan

ay nagpapakita ng kanyang

tunay na pag-uugali,

kung siya ba ay matuwid o hindi.

¹²Ang taingang nakakarinig

at matang nakakakita

ay ang Panginoon

ang siyang gumawa.

¹³Kung tulog ka nang tulog

maghihirap ka,

ngunit kung magsisikap ka,

ang iyong pagkain ay sasagana.

¹⁴Pinipintasan ng mamimili ang kanyang

binibili upang makatawad siya.

Ngunit kung itoʼy nabili na

ay ipinagyayabang pa.

¹⁵Marami ang ginto at mamahaling bato,

ngunit iilan lamang ang nakapagsasalita

nang may karunungan.

¹⁶Kung may taong nangako

na babayaran niya sa iyo

ang utang ng taong hindi niya kilala,

tiyakin mong makakakuha ka

sa kanya ng garantiya,

upang makatiyak kang babayaran ka niya.

¹⁷Ang pagkaing nakuha sa pandaraya

sa una ay matamis ang lasa,

ngunit sa huli ay lasang buhangin na.

¹⁸Humingi ka ng payo

sa iyong pagpaplano

o bago makipaglaban sa digmaan.

¹⁹Ang taong masalita nagbubunyag ng sikreto,

kaya iwasan mo ang ganyang uri ng tao.

²⁰Mamamatay ang sinumang sumumpa

sa kanyang magulang,

para siyang ilaw na namatay

sa gitna ng kadiliman.

²¹Ang mana na kinuha ng maaga

sa bandang huliʼy hindi magiging pagpapala.

²²Huwag kang maghiganti.

Magtiwala ka sa Panginoon ,

at tutulungan ka niya.

²³Nasusuklam ang Panginoon

sa mga nandadaya sa timbangan.

Hindi ito mabuting gawain.

²⁴Ang Panginoon ang nagkaloob

nitong ating buhay,

kaya hindi natin alam

ang ating magiging kapalaran.

²⁵Bago mangako sa Diyos

ay isiping mabuti,

baka magsisi ka sa bandang huli.

²⁶Tinitiyak ng isang matalinong hari

na malaman kung sino

ang gumagawa ng kasamaan

at pagkatapos, silaʼy parurusahan.

²⁷Ang espiritu ng tao[#20:27 : O, mga salita ng tao.]

ay parang ilaw ng Panginoon

na sumisiyasat sa kaloob-looban ng pagkatao.

²⁸Ang haring mabuti at tapat

ay hindi mapapahamak,

at magtatagal siya sa kanyang luklukan.

²⁹Karangalan ng kabataan

ang kanilang kalakasan,

at karangalan naman ng matatanda

ang kanilang katandaan.

³⁰Kung minsan ang parusa

ay nagdudulot ng mabuti

upang magbago tayo.