Kawikaan 21

¹Ang isipan ng hari ay parang ilog

na pinapadaloy ng Panginoon

saan man niya naisin.

²Inaakala ng tao na tama

ang lahat ng kanyang ginagawa,

ngunit sinisiyasat ng Panginoon

kung ano ang nasa puso.

³Ang paggawa ng matuwid at makatarungan

ay kalugod-lugod sa Panginoon

kaysa sa paghahandog.

⁴Ang mapagmataas na mata

at mayabang na puso,

ang ilaw ng mga masasama

ay kasalanan.

Ganyan ang ugali

ng mga taong makasalanan.

⁵Ang gawaing plinanong mabuti

at pinagsikapan

ay patungo sa kaunlaran,

ngunit ang gawaing padalos-dalos

ay maghahatid ng karalitaan.

⁶Ang kayamanang nakuha sa pandaraya

ay madaling mawala

at maaaring humantong

sa maagang kamatayan.

⁷Ang karahasan ng masasamâ

ang magpapahamak sa kanila,

sapagkat ayaw nilang gawin ang tama.

⁸Hindi matuwid ang gawain

ng taong may kasalanan,

ngunit matuwid ang gawain

ng taong walang kasalanan.

⁹Mas mabuti pang tumirang mag-isa

sa bubungan ng bahay

kaysa sa loob ng bahay

na ang kasama

ay asawang palaaway.

¹⁰Ang masasamâ

ay laging gustong gumawa ng masama

at sa kanilang kapwa

ay wala silang awa.

¹¹Kapag ang manunuya

ay pinarusahan mo,

ang mga wala sa katinuan

ay matututo.

Kapag ang marunong naman

ang tinuruan mo,

lalo siyang magiging matalino.

¹²Alam ng matuwid na Diyos

kung ano ang ginagawa

ng sambahayan ng masasamâ,

at parurusahan niya sila.

¹³Ang hindi pumansin sa daing ng mahirap,

kapag siya naman ang dumaing

ay walang lilingap.

¹⁴Kapag ang kapwa mo ay may galit sa iyo,

mawawala iyon sa palihim na regalo.

¹⁵Kapag katarungan ang umiiral,

ang mga matuwid ay natutuwa,

ngunit natatakot ang masasama.

¹⁶Ang taong lumilihis sa karunungan

ay hahantong sa kamatayan.

¹⁷Ang taong maluho at puro pagdiriwang

ay hindi yayaman

kundi lalo pang maghihirap.

¹⁸Pinarurusahan ang masasama

at makasalanan

upang iligtas ang taong matuwid.

¹⁹Mas mabuti pang manirahan sa disyerto

kaysa manirahan sa bahay na kasama

ang asawang magagalitin at palaaway.

²⁰Ang taong marunong ay pinaghahandaan

ang kanyang kinabukasan,

ngunit ang mangmang,

winawaldas ang lahat

hanggang sa maubusan.

²¹Ang taong namumuhay

sa katuwiran at kabutihan

ay hahaba ang buhay,

magtatagumpay at pararangalan.

²²Mapapasuko ng matalinong pinuno

ang bayan na maraming sundalo,

at kaya niyang gibain ang mga pader

na kanilang inaasahang tanggulan.

²³Ang taong nag-iingat

sa kanyang mga sinasabi

ay nakakaiwas sa gulo.

²⁴Ang taong palalo at mayabang

ay makikilala mo

dahil nangungutya siya

at sukdulan ang kayabangan.

²⁵Kung marami kang ninanais

ngunit tamad kang magtrabaho,

iyon ang sisira sa iyo.

²⁶Ang taong tamad

ay laging naghahangad na makatanggap,

ngunit ang taong matuwid

ay nagbibigay nang walang alinlangan.

²⁷Kinasusuklaman ng Panginoon

ang handog ng taong masama,

lalo na kung ihahandog niya ito

nang may layuning masama.

²⁸Patitigilin sa pagsasalita

ang saksing bulaan,

ngunit ang saksing nagsasabi

ng totoo ay pakikinggan.

²⁹Ang taong masama ay hindi pinag-iisipan

ang kanyang ginagawa,

ngunit ang taong matuwid

ay pinag-iisipan muna nang mabuti

ang kanyang ginagawa.

³⁰Walang karunungan,

pang-unawa o payo

ang makakapantay sa Panginoon .

³¹Kahit nakahanda na ang mga kabayo

para sa digmaan,

ang Panginoon pa rin

ang nagbibigay ng katagumpayan.