Kawikaan 22

¹Mas mabuting piliin ang malinis na pangalan

kaysa sa maraming kayamanan.

Ang paggalang ng tao sa iyo

ay mas mahalaga pa

kaysa pilak at ginto.

²Ang Panginoon ang lumikha sa tao,

mayaman man o mahirap.

³Ang taong maalam

ay umiiwas kung may panganib,

ngunit ang wala sa katinuan

ay sumusuong sa panganib,

kaya napapahamak.

⁴Ang paggalang sa Panginoon

at pagpapakumbaba

ay magdudulot sa iyo ng mahabang buhay,

kayamanan at karangalan.

⁵Lumalakad ang taong masama

sa daang matinik

at may mga patibong.

Ang nag-iingat sa sarili

ay umiiwas sa daang iyon.

⁶Ituro sa bata ang daang

dapat niyang sundan,

at kahit sa kanyang pagtanda

ay hindi niya ito kalilimutan.

⁷Ang mahihirap ay nasa ilalim

ng kapangyarihan ng mayayaman,

at ang nangungutang

ay alipin ng nagpapautang.

⁸Ang naghahasik ng kasamaan

ay aani ng kapahamakan,

at matitigil na ang kanyang

pamiminsala sa iba.

⁹Ang nagbibigay ng pagkain sa dukha

ay tiyak na pagpapalain.

¹⁰Kapag pinalayas mo

ang mga taong nanunuya,

mawawala na ang alitan,

kaguluhan at pang-iinsulto.

¹¹Ang taong may malinis na puso

at mahinahon magsalita

ay magiging kaibigan ng hari.

¹²Binabantayan ng Panginoon

ang mga taong may karunungan,

ngunit sinisira niya ang plano

ng mga taksil.

¹³Ang taong tamad ay laging may dahilan,

sinasabi niyang baka siya

ay lapain ng leon sa daan.

¹⁴Ang salita ng masamang babae

ay parang malalim na hukay,

at doon nahuhulog

ang kinamumuhian ng Panginoon .

¹⁵Likas sa mga bata ang pagiging pilyo,

ngunit magiging matuwid sila

kung didisiplinahin.

¹⁶Ang nagreregalo sa mayaman

o nang-aapi sa mahihirap

upang yumaman

ay hahantong din sa karalitaan.

Ang Tatlumpung Mahahalagang Kawikaan

¹⁷Pakinggan mo ang mga sinasabi

ng marurunong.

Pakinggan mong mabuti

habang itinuturo ko ito sa iyo,

¹⁸dahil magbibigay ito sa iyo

ng kaligayahan

kung malalaman mo ito at masasaulo.

¹⁹Itinuturo ko ito sa iyo ngayon

upang magtiwala ka sa Panginoon .

²⁰Ang tatlumpung kawikaang ito

na isinulat ko

ay magdudulot sa iyo

ng mga karunungan at payo.

²¹Sa pamamagitan nitoʼy malalaman mo

ang mga katotohanan

at masasagot mo

ang mga magtatanong sa iyo.

²²Huwag mong abusuhin

ang mga mahihirap

o apihin man sila sa mga hukuman,

²³sapagkat ipagtatanggol sila

ng Panginoon .

Anuman ang gawin ninyong

masama sa kanila

ay gagawin din niya sa inyo.

²⁴Huwag kang makipagkaibigan

sa taong madaling magalit,

²⁵baka mahawa ka sa kanyang pag-uugali

at para ka na ring naglagay

ng bitag para sa iyong sarili.

²⁶Huwag kang mangangako

na magbabayad sa utang ng iba,

²⁷dahil kapag hindi ka nakapagbayad,

pati ang higaan mo ay kanilang agawin.

²⁸Huwag mong gagalawin

ang mga batong hangganan

na inilagay ng mga ninuno mo noon.

²⁹Ang taong mahusay magtrabaho

ay maglilingkod sa mga hari

at hindi sa mga pangkaraniwang tao.