Kawikaan 23

¹Kapag kumakain ka

kasalo ng taong may mataas

na katungkulan,

mag-ingat ka sa ikikilos mo.

²Kung palakain ka,

pigilan mo ang iyong sarili.

³Huwag mong pagnasaan

ang mga pagkaing kanyang inihanda,

dahil inihain iyon upang linlangin ka.

⁴Huwag mong pahirapan

ang sarili mo sa pagpapayaman.

Maging matalino ka

at ang sarili ay pigilan.

⁵Dahil ang kayamanan

ay madaling mawala

at tila may pakpak

na lumilipad sa kalawakan

tulad ng isang agila.

⁶Huwag kang kumain

o matakam sa pagkain

na inihanda ng taong kuripot,

kahit ito ay masarap.

⁷Sapagkat ang taong ganyan

bawat subo moʼy binabantayan.

Sasabihin niya,

“Sige, kumain ka pa.”

Ngunit hindi pala ganoon

ang nasa isip niya.

⁸Kaya lahat ng kinain moʼy

isusuka mo

at ang mga papuri mo sa kanya

ay mababalewala.

⁹Huwag kang magsasalita sa hangal,

sapagkat ang sasabihin mong karunungan

sa kanya

ay wala ring kabuluhan.

¹⁰Huwag mong agawin

o sakupin ang lupa ng mga ulila

sa pamamagitan ng paglilipat

ng mga muhon

na matagal nang nakalagay.

¹¹Sapagkat ang kanilang

makapangyarihang tagapagtanggol

ay ang Panginoon .

Siya ang magtatanggol sa kanila

laban sa iyo.

¹²Makinig ka kapag itinutuwid

ang iyong pag-uugali

upang ikaw ay matuto.

¹³Huwag kang magpapabaya

sa pagdidisiplina sa iyong anak.

¹⁴Ang tamang pagpalo

ay hindi niya ikamamatay

kundi makapagliligtas pa sa kanya

sa kamatayan.

¹⁵Anak, kung may dunong ang iyong puso,

ang puso koʼy magagalak din.

¹⁶Tunay ngang magagalak ang aking kalooban

kung ang mga salitang lalabas sa labi moʼy

mula sa karunungan.

¹⁷Huwag kang maiinggit

sa mga makasalanan,

sa halip igalang mo ang Panginoon

habang nabubuhay ka.

¹⁸At kung magkagayon

ay gaganda ang kinabukasan mo

at mapapasaiyo ang

mga hinahangad mo.

¹⁹Anak, pakinggan mo

ang itinuturo ko sa iyo.

Maging matalino ka

at sundin mo ang tamang daan.

²⁰Huwag kang makikisama

sa mga hayok sa alak

o sa mga matatakaw sa pagkain,

²¹sapagkat ang mga lasenggo

at matatakaw

ay hahantong sa kahirapan,

at dahil tulog sila nang tulog,

sa bandang huliʼy magdadamit

sila ng basahan.

²²Makinig ka sa iyong ama

na pinanggalingan ng iyong buhay,

at huwag mong hamakin ang iyong ina

kapag siya ay matanda na.

²³Pagsikapan mong mapasaiyo

ang katotohanan, karunungan,

magandang pag-uugali at pang-unawa.

At huwag mo itong ipagpapalit

sa anumang bagay.

²⁴Matutuwa ang iyong mga magulang

kung matuwid ka at matalino.

²⁵Ikaliligaya nilang sila

ang naging iyong ama at ina.

²⁶Anak, makinig kang mabuti sa akin

at tularan mo ang aking pamumuhay.

²⁷Sapagkat ang babaeng bayaran

ay isang malalim na hukay,

at ang asawang nangangaliwa

ay makitid na balon.

²⁸Para siyang tulisan

na nag-aabang ng mabibiktima,

at siya ang dahilan ng pagtataksil

ng maraming lalaki sa kanilang mga asawa.

²⁹Sino ang may hinagpis?

Sino ang may kalungkutan?

Sino ang mahilig sa away?

Sino ang mareklamo?

Sino ang nasugatan

na dapat sana ay naiwasan?

At sino ang may

mga matang namumula?

³⁰Sino pa kundi ang mga lasenggong sugapa

sa ibaʼt ibang klase ng alak!

³¹Huwag kang matakam

sa alak na napakagandang tingnan

sa isang baso

at tila masarap ang pasok sa lalamunan.

³²Sa bandang huli,

kapag ikaw ay nalasing na,

parang natuklaw ka ng ulupong,

at nalason ng kamandag nito.

³³Kung anu-ano ang makikita mo

at hindi ka makakapag-isip ng mabuti.

³⁴Pakiramdam moʼy nasa gitna ka ng dagat

at nakahiga sa ibabaw ng palo ng barko.

³⁵Sasabihin mo, “May humampas

at sumuntok sa akin,

ngunit hindi ko naramdaman.

Kailan kaya mawawala ang pagkalasing ko

upang muli akong makainom?”