Kawikaan 25

Iba pang mga Kawikaan ni Solomon

¹Narito pa ang ilang kawikaan ni Solomon na kinopya ng mga tauhan ni Haring Ezequias ng Juda.

²Karangalan ng Diyos

na ilihim ang isang bagay,

at karangalan naman ng hari

na tuklasin ang isang bagay.

³Kung gaano kataas ang langit

at kalalim ang lupa,

ganoon din ang puso ng hari

na hindi kayang saliksikin.

⁴Ang dumi sa pilak ay tanggalin

upang ang panday

ay magawa itong gamitin.

⁵Kailangang alisin ang masasamang

tauhan ng hari

upang magpatuloy ang katuwiran

sa kanyang kaharian.

⁶Kung nasa harapan ka ng hari,

huwag mong ipagyabang ang iyong sarili

o di kayaʼy ilugar ang sarili

sa mga dakilang nanunungkulan.

⁷Mas mabuti kung siya ang magsabi,

“Halika dito sa aking tabi,”

kaysa ipahiya ka sa harap

ng mga maharlika.

⁸Huwag kang magpabigla-biglang magsabi

sa korte ng iyong nakita.

Kung mapatunayan ng isang saksi na mali ka,

ano na lang ang gagawin mo?

⁹Kung may alitan kayo ng iyong kapwa,

itoʼy inyong pag-usapan muna.

At ang lihim ng bawat isa

ay huwag sasabihin sa iba.

¹⁰Baka makarating sa kaalaman ng madla

at kayoʼy maging kahiya-hiya.

¹¹Kapag ang salitang binigkas

ay angkop sa pagkakataon,

itoʼy parang gintong mansanas

na nakalagay sa isang lalagyang pilak.

¹²Tulad ng gintong hikaw

o mamahaling hiyas na ginto

ang pagsaway ng matalino

sa nakikinig na tao.

¹³Ang mapagkakatiwalaang sugo

ay nagbibigay ng kasiyahan

sa kanyang pinaglilingkuran,

tulad ng malamig na tubig

sa panahon ng tag-init.

¹⁴Ang taong hindi tumutupad

sa kanyang pangako

ay parang ulap at hangin

na walang dalang ulan.

¹⁵Ang mapagpasensya

at ang mahinahon magsalita

ay makapanghihikayat ng mga pinuno

at kahit na ng may matitigas na puso.

¹⁶Huwag kang kakain ng labis na pulot

at baka magsuka ka.

¹⁷Huwag kang dadalaw ng madalas sa iyong kapitbahay,

baka magalit siya at sa iyo ay magsawa.

¹⁸Ang taong sumasaksi

sa kasinungalingan laban

sa kanyang kapwa

ay nakakapinsala tulad ng espada,

pamalo at pana.

¹⁹Ang pagtitiwala sa taong

hindi mapagkakatiwalaan

sa oras ng pangangailangan

ay walang kuwenta

tulad ng paang pilay o ngiping umuuga.

²⁰Kung aawitan mo ng masasayang

himig ang taong labis ang hinagpis,

para mong binuhusan

ng suka ang kanyang sugat,

o di kayaʼy inalisan siya

ng balabal sa taglamig.

²¹Kapag nagugutom ang iyong kaaway,

pakainin mo;

kapag nauuhaw,

painumin mo.

²²Kapag ginawa mo ito

mahihiya siya sa iyo

at ang Panginoon

ang magpapala sa iyo.

²³Kung paanong ang hanging habagat

ay nagdadala ng ulan,

nagdadala naman ng galit

ang naninira ng kapwa.

²⁴Mas mabuting tumira nang mag-isa

sa bubungan ng bahay

kaysa sa loob ng bahay na kasama

ang asawang palaaway.

²⁵Ang magandang balita

mula sa malayong lugar

ay parang malamig na tubig

sa taong nauuhaw.

²⁶Ang matuwid na umaayon

sa gawain ng masamang tao

ay parang maruming balon

at malabong bukal.

²⁷Kung paanong masama

ang pagkain ng labis na pulot,

ganoon din ang paghahangad

ng sariling kapurihan.

²⁸Ang taong walang pagpipigil sa sarili

ay tulad ng isang bayan

na nasira ang pader.