Kawikaan 31

Ang mga Kawikaan ni Haring Lemuel

¹Ito ang mga kawikaan ni Haring Lemuel na taga-Masa. Ito ang mga itinuro sa kanya ng kanyang ina:

²Makinig ka, aking anak.

Makinig ka, anak ng aking sinapupunan.

Makinig ka, anak, ang sagot

sa aking mga panalangin.

³Huwag mong sasayangin

ang iyong lakas at pera sa mga babae,

sapagkat sila ang dahilan

kung bakit napapahamak ang mga hari.

⁴Lemuel, hindi dapat uminom

ng alak ang isang hari.

Ang mga namumuno

ay hindi dapat maghangad

ng inumin na nakalalasing.

⁵Sapagkat kapag nalasing na sila,

kadalasan ay nakakalimutan na nila

ang kanilang tungkulin,

at hindi nila nabibigyan ng katarungan

ang mga nasa kagipitan.

⁶Hayaan mong mag-inom

ang mga taong nawalan na ng pag-asa

at naghihirap ang kalooban,

⁷upang makalimutan nila

ang kanilang mga kasawian at kahirapan.

⁸Ipagtanggol mo ang karapatan

ng mga taong kahabag-habag,

na hindi maipagtanggol

ang kanilang mga sarili.

⁹Humatol ka nang walang kinikilingan,

at ipagtanggol ang karapatan

ng mga mahihirap at nangangailangan.

Ang Mabuting Asawa

¹⁰Mahirap hanapin ang mabuting asawa.

Higit pa sa mamahaling alahas

ang kanyang halaga.

¹¹Lubos ang tiwala sa kanya

ng kanyang asawa,

at wala na itong mahihiling pa sa kanya.

¹²Kabutihan at hindi kasamaan

ang ginagawa niya

sa kanyang asawa habang siya

ay nabubuhay.

¹³Masigasig siyang humahabi

ng mga telang lino at lana.

¹⁴Tulad siya ng barko

ng mga mangangalakal;

nagdadala siya ng mga pagkain

kahit galing pa siya sa malayong lugar.

¹⁵Maaga siyang gumigising

upang ipaghanda ng pagkain

ang kanyang pamilya,

at para sabihan ang mga babaeng katulong

ng mga dapat nilang gawin.

¹⁶Marunong siyang pumili ng lupa

na kanyang bibilhin.

At mula sa kanyang sariling ipon,

pinapataniman niya ito ng ubas.

¹⁷Malakas, masipag

at mabilis siyang gumawa.

¹⁸Magaling siyang magnegosyo,

at matiyagang nagtatrabaho

hanggang gabi.

¹⁹Sa kanyang kamay

ay hawak niya ang sinulid,

at nakakapit sa panghabi

ang kanyang mga daliri.

²⁰Matulungin siya sa mahihirap

at mga nangangailangan.

²¹Hindi siya nag-aalala,

dumating man ang taglamig,

dahil may makakapal siyang tela

para sa kanyang pamilya.

²²Siya na rin ang gumagawa

ng mga kobre-kama,

at ang kanyang mga damit

ay gawa sa pinong lino

at lanang kulay ube.

²³Kilala ang asawa niya bilang isa

sa mga tagapamahala ng bayan.

²⁴Gumagawa rin siya ng damit at sinturon,

at ipinagbibili sa mga mangangalakal.

²⁵Malakas at iginagalang siya,

at hindi siya nangangamba

para sa kinabukasan.

²⁶Nagsasalita siya nang may karunungan,

at nagtuturo nang may kabutihan.

²⁷Masipag siya,

at inaalagaang mabuti

ang kanyang pamilya.

²⁸Pinupuri siya ng kanyang mga anak,

at pinupuri rin ng kanyang kabiyak

na nagsasabi,

²⁹“Maraming mga babae ang mahuhusay,

subalit sa iyo ay walang makapapantay.”

³⁰Ang pagiging kaakit-akit

ay makapandaraya,

at ang kagandahan

ay kumukupas.

Ngunit ang babaeng may takot sa Panginoon

ay dapat purihin.

³¹Dapat siyang gantimpalaan

sa kanyang ginawang kabutihan

at parangalan sa karamihan.