Salmo 112

Salmo 112

¹Purihin ang Panginoon !

Mapalad ang taong may takot sa Panginoon

at malugod na sumusunod sa kanyang mga utos.

²Ang mga anak niya ay magiging matagumpay,

dahil ang angkan ng mga namumuhay

nang matuwid ay pagpapalain.

³Yayaman ang kanyang sambahayan,

at ang kanyang kabutihan ay maaalala magpakailanman.

⁴Kahit sa kadiliman, taglay pa rin

ang liwanag ng taong

namumuhay nang matuwid,

at puno ng kabutihan, kahabagan at katuwiran.

⁵Pagpapalain ang taong mapagbigay at nagpapahiram,

at hindi nandaraya sa kanyang hanapbuhay.

⁶Tiyak na magiging matatag

ang kanyang kalagayan

at hindi siya makakalimutan magpakailanman.

⁷Hindi siya matatakot sa masamang balita,

dahil matatag siya at buong pusong

nagtitiwala sa Panginoon .

⁸Hindi siya matatakot o maguguluhan,

dahil alam niyang sa bandang huliʼy

makikita niya ang tagumpay laban sa kanyang mga kalaban.

⁹Nagbibigay siya sa mga dukha,

at ang kanyang kabutihan

ay maaalala magpakailanman.

Ang kanyang kakayahan

ay lalo pang dadagdagan ng Diyos

upang siyaʼy maparangalan.

¹⁰Makikita ito ng mga taong masama

at magngangalit ang kanilang mga ngipin sa galit,

at matutunaw sila dahil sa kahihiyan.

Hindi magtatagumpay ang naisin ng taong masama.