Salmo 114

Salmo 114

¹Nakatira noon ang mga taga-Israel

na lahi ni Jacob sa Ehipto,

na kung saan iba ang wika ng mga tao.

²Nang papalabas na sila sa Ehipto,

ginawa ng Diyos na banal na lugar ang Juda,

at ang Israel ay kanyang pinamunuan.

³Ang Dagat na Pula ay nahawi

at ang Ilog Jordan ay tumigil sa pag-agos.

⁴Nayanig ang mga bundok at burol,

na parang mga lumulundag na kambing at mga tupa.

⁵Bakit nahawi ang Dagat na Pula,

at tumigil sa kanyang pag-agos ang Ilog Jordan?

⁶Bakit nayayanig ang mga bundok at mga burol,

na parang lumulundag na mga kambing at tupa?

⁷Nayayanig ang mundo

sa presensya ng Panginoong Diyos ni Jacob,

⁸na siyang gumawa sa matigas na bato

upang maging imbakan ng tubig

at naging bukal na umaagos.