Salmo 115

Salmo 115

¹Panginoon , hindi kami ang dapat na parangalan,

kundi kayo, dahil sa inyong pag-ibig at katapatan.

²Bakit kami kinukutya ng ibang bansa

at sinasabi nilang,

“Nasaan na ang inyong Diyos?”

³Ang aming Diyos ay nasa langit,

at ginagawa niya ang kanyang nais.

⁴Ngunit ang kanilang mga diyos

ay yari sa pilak at ginto

na gawa lang ng tao.

⁵May bibig sila, ngunit hindi nakakapagsalita;

may mga mata, ngunit hindi nakakakita.

⁶May mga tainga, ngunit hindi nakakarinig;

may ilong, ngunit hindi nakakaamoy.

⁷May mga kamay, ngunit hindi nakakahawak;

may mga paa, ngunit hindi nakakalakad,

at kahit munting tinig ay wala kang marinig.

⁸Ang mga gumawa ng mga diyos-diyosan

at nagtitiwala rito

ay matutulad sa mga ito.

^9-10Kayong mga mamamayan ng Israel

at kayong mga angkan ni Aaron,

magtiwala kayo sa Panginoon .

Siya ang tutulong at mag-iingat sa inyo.

¹¹Kayong mga may takot sa Panginoon ,

magtiwala kayo sa kanya.

Siya ang tutulong

at mag-iingat sa inyo.

¹²Hindi tayo kinakalimutan ng Panginoon ,

pagpapalain niya ang mga mamamayan

ng Israel at ang mga angkan ni Aaron.

¹³Pagpapalain niya ang lahat

ng may takot sa kanya,

dakila man o aba.

¹⁴Paramihin sana kayo ng Panginoon ,

kayo at ang inyong mga angkan.

¹⁵Sanaʼy pagpalain kayo ng Panginoon

na lumikha ng langit at ng lupa.

¹⁶Ang kalangitan ay sa Panginoon ,

ngunit ang mundo

ay ipinagkatiwala niya sa mga tao.

¹⁷Ang mga patay ay hindi na

makakapuri sa Panginoon ,

dahil sila ay nananahimik na.

¹⁸Tayong mga buháy ang dapat magpuri

sa Panginoon

ngayon at magpakailanman.

Purihin ang Panginoon !