Salmo 116

Salmo 116

¹Mahal ko ang Panginoon ,

dahil dinidinig niya ang paghingi ko

ng tulong sa kanya.

²Dahil pinakikinggan niya ako,

patuloy akong tatawag sa kanya habang akoʼy nabubuhay.

³Natakot ako dahil nararamdaman kong

malapit na akong mamatay.

Ang kamatayan ay parang tali

na pumupulupot sa akin.

Nag-aalala ako at naguguluhan,

⁴kaya tumawag ako sa Panginoon ,

“Panginoon , iligtas nʼyo po ako.”

⁵Ang Panginoon nating Diyos

ay mabuti, matuwid at mahabagin.

⁶Iniingatan ng Panginoon

ang mga kulang sa kaalaman.

Nang wala na akong magawa,

akoʼy iniligtas niya.

⁷Magpapakatatag ako,

dahil ang Panginoon

ay mabuti sa akin.

⁸Sapagkat iniligtas niya ako sa kamatayan,

sa kalungkutan at kapahamakan.

⁹Kaya mamumuhay ako na malapit sa Panginoon dito sa mundo ng mga buháy.

¹⁰Kahit na sinabi kong,

“Sukdulan na ang paghihirap ko,”

nagtitiwala pa rin ako sa kanya.

¹¹Sa aking pagkabalisa ay nasabi kong,

“Wala ni isang taong mapagkatiwalaan.”

¹²Ano kaya ang maigaganti ko sa Panginoon

sa lahat ng kabutihan niya sa akin?

¹³Sasambahin ko ang Panginoon ,

at maghahandog ako sa kanya ng pasasalamat

sa kanyang pagliligtas sa akin.

¹⁴Tutuparin ko ang aking

mga pangako sa Panginoon

sa harap ng kanyang mga mamamayan.

¹⁵Nasasaktan ang Panginoon

kung mamatay ang kanyang

mga tapat na mga mamamayan.

¹⁶Panginoon , ako nga ay inyong lingkod.[#116:16 : O ako nga ay inyong lingkod tulad ng aking ina na inyo ring lingkod.]

Iniligtas nʼyo ako sa pagkabihag.

¹⁷Sasamba ako sa inyo

at mag-aalay ng handog bilang pasasalamat.

¹⁸Tutuparin ko ang aking mga pangako

sa inyo Panginoon

sa harap ng inyong mga mamamayan,

¹⁹doon sa inyong templo sa Jerusalem.

Purihin ang Panginoon !