Salmo 119

Salmo 119

¹Mapalad ang taong namumuhay

nang walang kapintasan,

at naaayon sa utos ng Panginoon .

²Mapalad ang taong sumusunod

sa mga katuruan ng Diyos,

at buong pusong hinahanap

ang kanyang kalooban.

³Hindi sila gumagawa ng masama

sa halip ay sumusunod

sa mga pamamaraan ng Diyos.

⁴Panginoon , ibinigay ninyo sa amin

ang inyong mga tuntunin

upang itoʼy matapat naming sundin.

⁵Labis kong ninanais

na maging tapat

sa pagsunod sa inyong

mga tuntunin.

⁶At hindi ako mapapahiya

kapag sinunod ko

ang inyong mga utos.

⁷Akoʼy magpupuri sa inyo

nang may malinis na puso,

habang pinag-aaralan ko

ang inyong matuwid na mga utos.

⁸Susundin ko

ang inyong

mga tuntunin,

kaya huwag ninyo akong pababayaan.

⁹Paano mapapanatili ng isang kabataan

na dalisay ang kanyang buhay?

Sa pamamagitan ng pamumuhay niya

ayon sa inyong salita.

¹⁰Buong puso akong lumalapit sa inyo;

kaya akoʼy tulungan ninyo

na huwag lumihis sa mga utos ninyo.

¹¹Ang salita ninyo ay iningatan ko

sa aking puso

upang hindi ako magkasala sa inyo.

¹²Purihin kayo Panginoon !

Ituro ninyo sa akin

ang inyong mga tuntunin.

¹³Ang mga kautusang inyong ibinigay

ay lagi kong sasambitin,

isisigaw ko nang malakas.

¹⁴Nagagalak akong sumunod

sa inyong mga katuruan,

higit pa sa kagalakang dulot

ng mga kayamanan.

¹⁵Ang inyong mga tuntunin

ay aking pinagbubulay-bulayan

at iniisip kong mabuti

ang inyong pamamaraan.

¹⁶Magagalak ako sa inyong mga tuntunin,

at ang inyong mga salitaʼy

hindi ko lilimutin.

¹⁷Ipadama ninyo ang inyong kabutihan

sa akin na inyong lingkod,

upang patuloy akong makasunod

at makapamuhay ayon sa inyong salita.

¹⁸Buksan ninyo ang aking isipan

upang aking maunawaan

ang kahanga-hangang katotohanan

ng inyong kautusan.

¹⁹Akoʼy pansamantala lang dito sa sanlibutan,

kaya ipaliwanag ninyo sa akin

ang inyong mga utos.

²⁰Sa lahat ng oras ay naghahangad ako

na malaman ang kautusan ninyo.

²¹Ang mga hambog ay sinasaway ninyo

at isinusumpa ang mga lumalabag

sa mga utos ninyo.

²²Ilayo ninyo ako sa kanilang panghihiya

at pangungutya,

sapagkat sinusunod ko

ang inyong mga turo.

²³Kahit na magtipon ang mga namumuno

at magsalita laban sa akin,

akong lingkod ninyo ay patuloy na magbubulay-bulay

sa inyong mga tuntunin.

²⁴Ang inyong mga turo ay nagbibigay

sa akin ng kagalakan,

at nagsisilbing aking tagapayo.

²⁵Akoʼy parang mamamatay na,

kaya akoʼy panatilihin ninyong buháy

ayon sa inyong pangako.

²⁶Sinabi ko sa inyo ang tungkol

sa aking pamumuhay

at akoʼy pinakinggan ninyo.

Ituro ninyo sa akin

ang inyong mga tuntunin.

²⁷Ipaunawa ninyo sa akin ang inyong

mga tuntunin,

upang pagbulay-bulayan ko

ang inyong kahanga-hangang mga gawa.

²⁸Akoʼy nanlulumo dahil sa kalungkutan,

palakasin ninyo ako

ayon sa inyong pangako.

²⁹Ilayo ninyo ako mula sa paggawa ng masama,

at tulungan ninyo akong sundin

ang inyong kautusan.

³⁰Pinili ko ang tamang daan,

gusto kong sumunod

sa inyong mga utos.

³¹Panginoon , sinunod ko

ang inyong mga turo,

kaya huwag ninyong papayagang

mapahiya ako.

³²Pinagsisikapan kong sundin

ang inyong mga utos,

dahil pinapalawak ninyo

ang aking pang-unawa.

³³Panginoon , ituro ninyo sa akin

ang inyong mga tuntunin,

at habang nabubuhay,

itoʼy aking susundin.

³⁴Bigyan ninyo ako ng pang-unawa

sa inyong kautusan,

at itoʼy buong puso kong susundin

at iingatan.

³⁵Pangunahan ninyo ako sa aking pagsunod

sa inyong mga utos,

dahil ito ang aking kasiyahan.

³⁶Bigyan ninyo ako ng pagnanais

na sundin ang inyong mga turo

at hindi ang pagnanais na yumaman.

³⁷Ilayo ninyo ako sa mga bagay

na walang kabuluhan.

Ingatan ninyo ang aking buhay

ayon sa inyong pangako.

³⁸Tuparin ninyo ang inyong ipinangako

sa akin na inyong lingkod,

na ipinangako ninyo

sa mga may takot sa inyo.

³⁹Alisin ninyo ang mga kahihiyan

na aking kinatatakutan,

dahil ang inyong mga tuntunin

ay pawang kabutihan.

⁴⁰Gusto kong sundin

ang inyong mga tuntunin.

Sa inyong katuwiraʼy,

ingatan ninyo

ang aking buhay.

⁴¹Panginoon , ipakita ninyo

ang inyong pag-ibig at pagliligtas sa akin,

ayon sa inyong pangako.

⁴²Pagkatapos sasagutin ko

ang mga kumukutya sa akin,

dahil akoʼy nagtitiwala

sa inyong mga salita.

⁴³Tulungan ninyo akong masabi

ang katotohanan

sa lahat ng pagkakataon,

dahil ang pag-asa ko

ay nakasalalay

sa inyong mga utos.

⁴⁴Lagi kong susundin

ang inyong kautusan

habang akoʼy nabubuhay.

⁴⁵Mamumuhay akong may kalayaan,

dahil pinagsisikapan kong sundin

ang inyong mga tuntunin.

⁴⁶Hindi ko ikakahiyang sabihin

ang inyong mga turo

sa harapan ng mga hari.

⁴⁷Nagagalak akong sundin

ang inyong mga utos

dahil mahal ko ang mga ito.

⁴⁸Iginagalang ko ang inyong mga utos

na aking minamahal,

at pinagbubulay-bulayan ko

ang inyong mga tuntunin.

⁴⁹Alalahanin ninyo ang inyong pangako

sa akin na inyong lingkod,

dahil ito ang nagbibigay sa akin ng pag-asa.

⁵⁰Ang inyong mga pangako

ang siyang nagpapalakas

at umaaliw sa akin

sa mga paghihirap na aking dinaranas.

⁵¹Palagi akong hinahamak

ng mga hambog,

ngunit hindi ako humihiwalay

sa inyong kautusan.

⁵²Panginoon , inaalala ko

ang inyong mga panuntunang

ibinigay noong una,

at silaʼy nagbibigay sa akin

ng kaaliwan.

⁵³Akoʼy galit na galit

sa masasamang tao,

na ayaw sumunod

sa inyong kautusan.

⁵⁴Umaawit ako tungkol sa inyong

mga tuntunin

kahit saan man ako nanunuluyan.

⁵⁵Panginoon , sa gabi

ay inaalala ko kayo

at iniisip ko kung paano ko masusunod

ang inyong kautusan.

⁵⁶Ito ang aking kagalakan:

ang sumunod sa inyong

mga tuntunin.

⁵⁷Kayo lang Panginoon ,

ang tangi kong kailangan.

Akoʼy nangangakong susundin

ang inyong mga salita.

⁵⁸Buong puso akong nakikiusap sa inyo

na akoʼy inyong kahabagan

ayon sa inyong pangako.

⁵⁹Pinag-isipan ko ang aking pamumuhay,

at napagpasyahan kong sumunod

sa inyong mga turo.

⁶⁰Dali-dali at di ko ipagpapaliban

ang pagsunod sa inyong mga utos.

⁶¹Kahit iginagapos ako ng masasama,

hindi ko kinakalimutan

ang inyong kautusan.

⁶²Kahit hatinggabi ay gumigising ako

para kayoʼy pasalamatan

sa inyong matuwid na mga utos.

⁶³Akoʼy kaibigan ng lahat

ng may takot sa inyo

at sumusunod sa inyong mga tuntunin.

⁶⁴Panginoon , minamahal ninyo

ang lahat ng tao sa buong mundo.

Ituro ninyo sa akin

ang inyong mga tuntunin.

⁶⁵Panginoon , kabi-kabilang kabutihan

ang ipinaranas ninyo sa akin

na inyong lingkod,

sang-ayon sa inyong pangako.

⁶⁶Bigyan ninyo ako ng kaalaman

at karunungan,

dahil nagtitiwala ako

sa inyong mga utos.

⁶⁷Nang akoʼy hindi pa ninyo pinarurusahan,

akoʼy lumayo sa inyo,

ngunit ngayoʼy sinusunod ko na

ang inyong mga salita.

⁶⁸Napakabuti ninyo at mabuti

ang inyong mga gawa.

Ituro ninyo sa akin ang inyong

mga tuntunin.

⁶⁹Kahit na akoʼy sinisiraan

ng mga taong mapagmataas,

buong puso ko pa ring tinutupad

ang inyong mga tuntunin.

⁷⁰Hindi sila nakakaunawa

ng inyong kautusan,

ngunit akoʼy sumusunod sa inyong mga utos

nang may kagalakan.

⁷¹Mabuti na pinarusahan ninyo ako,

dahil sa pamamagitan nitoʼy

natutunan ko ang inyong mga turo.

⁷²Para sa akin, ang kautusan

na ibinigay niyoʼy

higit na mahalaga

kaysa sa maraming kayamanan.

⁷³Akoʼy nilikha at hinubog ninyo;

kaya bigyan ninyo ako ng pang-unawa

upang matutunan ko

ang inyong mga utos.

⁷⁴Matutuwa ang mga may takot sa inyo

kapag akoʼy kanilang nakita,

dahil akoʼy nagtitiwala

sa inyong salita.

⁷⁵Panginoon alam kong matuwid

ang inyong mga utos.

At dahil kayo ay matapat,

akoʼy inyong dinisiplina.

⁷⁶Sanaʼy aliwin ninyo ako

ng inyong pagmamahal

ayon sa pangako ninyo sa akin

na inyong lingkod.

⁷⁷Kahabagan ninyo ako

upang patuloy akong mabuhay,

dahil nagagalak akong sumunod

sa inyong kautusan.

⁷⁸Mapahiya sana ang mga mapagmataas

dahil sa paninira nila sa akin.

Subalit ako ay magbubulay-bulay

ng inyong mga tuntunin.

⁷⁹Magsilapit sana sa akin

ang mga may takot sa inyo

at nakakaalam ng inyong mga turo.

⁸⁰Sanaʼy masunod ko

nang buong puso

ang inyong mga tuntunin

upang hindi ako mapahiya.

⁸¹Napapagod na ako sa paghihintay

ng inyong pagliligtas sa akin,

ngunit umaasa pa rin ako

sa inyong mga salita.

⁸²Lumalamlam na ang aking paningin

sa paghihintay ng katuparan

ng pangako ninyo sa akin.

Ang tanong koʼy, “Kailan pa ninyo ako

palalakasin at aaliwin?”

⁸³Kahit na akoʼy tulad ng sisidlang-balat

na hindi na mapakinabangan,

hindi ko pa rin nakakalimutan

ang inyong mga tuntunin.

⁸⁴Hanggang kailan pa kaya

ang aking paghihintay?

Kailan ninyo parurusahan

ang mga umuusig sa akin

na inyong lingkod?

⁸⁵Ang mga mapagmataas na hindi sumusunod

sa inyong mga kautusan

ay naghukay ng mga patibong

upang akoʼy hulihin.

^86-87Kaya tulungan ninyo ako

dahil akoʼy kanilang inuusig

nang walang dahilan,

hanggang sa akoʼy nabingit na

sa kamatayan.

Ngunit hindi ko tinalikuran ang inyong mga tuntunin

dahil maaasahan ang inyong mga utos.

⁸⁸Ingatan ninyo ang aking buhay

ayon sa inyong pag-ibig sa akin,

upang masunod ko ang mga turo

na ibinigay ninyo.

⁸⁹Panginoon , ang salita nʼyo

ay mananatili magpakailanman;

hindi ito magbabago tulad ng kalangitan.

⁹⁰Ang inyong katapatan ay magpapatuloy

sa lahat ng salinlahi.

Matibay ninyong itinatag ang mundo,

kaya itoʼy nananatili.

⁹¹Ang lahat ng bagay ay nananatili

hanggang ngayon ayon sa inyong nais.

Dahil ang lahat ng bagay

ay sumusunod sa inyo.

⁹²Kung ang inyong kautusan ay hindi

nagbibigay sa akin ng kaaliwan,

namatay na sana ako

dahil sa paghihirap na dinanas ko.

⁹³Hindi ko kailanman lilimutin

ang inyong mga tuntunin,

dahil sa pamamagitan nitoʼy

patuloy ninyo akong binubuhay.

⁹⁴Akoʼy inyo, kaya akoʼy iligtas ninyo!

Dahil pinagsisikapan kong sundin

ang inyong mga tuntunin.

⁹⁵Nag-aabang ang masasama

upang akoʼy patayin,

ngunit iisipin ko ang inyong mga turo.

⁹⁶Nakita kong ang lahat ng bagay

ay may katapusan,

ngunit ang inyong mga utos

ay mananatili magpakailanman.

⁹⁷Labis kong iniibig ang inyong kautusan.

Palagi ko itong pinagbubulay-bulayan.

⁹⁸Ang inyong mga utos ay nasa puso ko,

kaya akoʼy mas marunong

kaysa sa mga kaaway ko.

⁹⁹Mas marami ang aking naunawaan

kaysa sa aking mga guro,

sapagkat lagi kong pinagbubulay-bulayan

ang inyong mga katuruan.

¹⁰⁰Higit pa ang aking pang-unawa

kaysa sa matatanda,

sapagkat sumusunod ako sa mga tuntunin ninyo.

¹⁰¹Iniiwasan ko ang masamang pag-uugali,

upang masunod ko

ang inyong mga salita.

¹⁰²Hindi ako lumihis sa inyong mga utos,

dahil kayo ang nagturo sa akin.

¹⁰³Kay tamis ng inyong mga salita,

mas matamis pa ito kaysa sa pulot.

¹⁰⁴Sa inyong mga tuntunin,

pang-unawa koʼy lumalawak,

kaya kinamumuhian ko

ang lahat ng gawaing masama.

¹⁰⁵Ang salita ninyo ay ilaw

sa aking paanan,

nagbibigay-liwanag sa aking daraanan.

¹⁰⁶Nanumpa ako at muling nangangako

na susundin ko ang mga matuwid

na utos ninyo.

¹⁰⁷Hirap na hirap na po ako Panginoon ;

panatilihin ninyo akong buháy

ayon sa inyong pangako.

¹⁰⁸Tanggapin ninyo Panginoon

ang taos-puso kong pagpupuri,

at ituro ninyo sa akin ang inyong mga utos.

¹⁰⁹Kahit na akoʼy palagiang

nasa bingit ng kamatayan,

hindi ko kinakalimutan

ang inyong mga kautusan.

¹¹⁰Ang masasamaʼy naghanda

ng patibong para sa akin,

ngunit hindi ako humihiwalay

sa inyong mga tuntunin.

¹¹¹Ang inyong mga turo

ang mana kong walang hanggan,

sapagkat itoʼy nagbibigay

sa akin ng kagalakan.

¹¹²Aking napagpasyahan

na susundin ko

ang inyong mga tuntunin

hanggang dulo.

¹¹³Kinamumuhian ko ang mga taong

hindi tapat sa inyo,

ngunit iniibig ko ang inyong mga kautusan.

¹¹⁴Kayo ang kanlungan

at pananggalang ko;

sa inyong mga salitaʼy umaasa ako.

¹¹⁵Lumayo kayo sa akin,

kayong mga gumagawa ng masama,

upang masunod ko ang mga utos

ng aking Diyos.

¹¹⁶Panginoon , bigyan po ninyo ako

ng kalakasan

ayon sa inyong pangako

upang ako ay patuloy na mabuhay;

at huwag ninyong hayaan

na mabigo ako

sa aking pag-asa sa inyo.

¹¹⁷Tulungan ninyo ako upang akoʼy maligtas;

at nang lagi kong maituon

sa inyong mga tuntunin

ang aking isipan.

¹¹⁸Itinatakwil ninyo ang lahat

na lumalayo

sa inyong mga tuntunin.

Ang kanilang panlilinlang

ay walang kabuluhan.

¹¹⁹Basura ang tingin ninyo

sa lahat ng masasama rito sa mundo,

kaya naman iniibig ko

ang inyong mga turo.

¹²⁰Nanginginig ako sa takot sa inyo;

sa hatol na inyong gagawin

ay natatakot ako.

¹²¹Ginawa ko ang matuwid

at makatarungan,

kaya sa aking mga kaaway,

huwag ninyo akong pababayaan.

¹²²Ipangako ninyong akoʼy tutulungan

huwag pabayaang apihin ako

ng mga mayayabang.

¹²³Nagdidilim na ang aking paningin

sa paghihintay sa inyong pangako

na ililigtas ako.

¹²⁴Gawin ninyo sa akin na inyong lingkod

ang naaayon sa inyong pagmamahal,

at ituro ninyo sa akin

ang inyong mga tuntunin.

¹²⁵Ako ay inyong lingkod, kaya bigyan ninyo ako

ng pang-unawa,

upang maunawaan ko

ang inyong mga katuruan.

¹²⁶Panginoon , ito na ang panahon

para kayo ay kumilos,

dahil nilalabag ng mga tao

ang inyong kautusan.

¹²⁷Pinahahalagahan ko

ang inyong mga utos,

nang higit pa kaysa sa ginto

o pinakadalisay na ginto.

¹²⁸Sinusunod ko ang lahat

ng inyong mga tuntunin,

kaya kinamumuhian ko

ang lahat ng masamang gawain.

¹²⁹Kahanga-hanga ang inyong mga turo,

kaya sinusunod ko ito

nang buong puso.

¹³⁰Ang pagpapahayag ng inyong mga salita

ay nagbibigay-liwanag sa isipan ng tao

at karunungan sa mga kulang

sa kaalaman.

¹³¹Labis kong hinahangad ang inyong mga utos.

¹³²Masdan ninyo ako at kahabagan,

gaya ng lagi ninyong ginagawa

sa mga umiibig sa inyo.

¹³³Patnubayan ninyo ako ng inyong mga salita,

at huwag ninyong hayaang akoʼy pagharian

ng kasamaan.

¹³⁴Iligtas ninyo ako sa mga nang-aapi sa akin,

upang masunod ko ang inyong

mga tuntunin.

¹³⁵Ipakita ninyo sa akin na inyong lingkod

ang inyong kabutihan,

at turuan ninyo ako ng inyong

mga tuntunin.

¹³⁶Labis akong umiiyak

dahil hindi sinusunod ng mga tao

ang inyong kautusan.

¹³⁷Matuwid kayo, Panginoon ,

at tama ang inyong mga paghatol.

¹³⁸Ang inyong ibinigay na mga turo

ay matuwid at mapagkatiwalaan.

¹³⁹Labis ang aking galit

dahil binalewala ng aking

mga kaaway

ang inyong mga salita.

¹⁴⁰Napatunayan na maaasahan

ang inyong mga pangako,

kaya napakahalaga nito sa akin

na inyong lingkod.

¹⁴¹Kahit mahirap lang ako at inaayawan,

hindi ko kinakalimutan ang inyong

mga tuntunin.

¹⁴²Walang katapusan ang inyong katuwiran,

at ang inyong kautusan

ay batay sa katotohanan.

¹⁴³Dumating sa akin ang mga kaguluhan

at kahirapan,

ngunit ang inyong mga utos

ay nagbigay sa akin ng kagalakan.

¹⁴⁴Ang inyong mga turo ay matuwid

at walang hanggan.

Bigyan ninyo ako ng pang-unawa

upang patuloy akong mabuhay.

¹⁴⁵Panginoon , buong puso akong

tumatawag sa inyo;

sagutin ninyo ako, at susundin ko

ang inyong mga tuntunin.

¹⁴⁶Tumatawag ako sa inyo;

iligtas ninyo ako, at susundin ko

ang inyong mga tuntunin.

¹⁴⁷Gising na ako bago pa sumikat ang araw

at humihingi ng tulong sa inyo,

dahil nagtitiwala ako

sa inyong pangako.

¹⁴⁸Akoʼy nagpuyat nang buong magdamag,

upang pagbulay-bulayan

ang inyong mga pangako.

¹⁴⁹Panginoon , dinggin ninyo ako

ayon sa inyong pagmamahal;

ingatan ninyo ang aking buhay

ayon sa inyong paghatol.

¹⁵⁰Palapit na nang palapit

ang masasamang umuusig sa akin,

ang mga taong tumatanggi

sa inyong kautusan.

¹⁵¹Ngunit malapit kayo sa akin,

Panginoon ;

at ang inyong mga utos

ay maaasahan.

¹⁵²Sa pag-aaral ko ng inyong mga turo,

naunawaan ko noon pa man

na ang inyong mga katuruan

ay magpapatuloy magpakailanman.

¹⁵³Masdan ninyo ang dinaranas kong

paghihirap at akoʼy inyong iligtas,

dahil hindi ko kinakalimutan

ang inyong kautusan.

¹⁵⁴Ipagtanggol ninyo ako at iligtas,

ingatan ninyo ang aking buhay

ayon sa inyong pangako.

¹⁵⁵Hindi maliligtas ang masasamâ,

dahil hindi nila ipinamumuhay

ang inyong mga tuntunin.

¹⁵⁶Napakamaawain ninyo Panginoon ;

ingatan ninyo ang aking buhay

ayon sa inyong paghatol.

¹⁵⁷Marami ang umuusig sa akin,

ngunit hindi ako lumayo

sa inyong mga turo.

¹⁵⁸Kinasusuklaman ko

ang mga hindi tapat sa inyo,

dahil hindi nila sinusunod

ang inyong salita.

¹⁵⁹Tingnan ninyo Panginoon

kung paano ko sinusunod

ang inyong mga tuntunin.

Ingatan ninyo ang aking buhay

ayon sa inyong tapat na pag-ibig.

¹⁶⁰Totoo ang lahat ng inyong salita,

at ang inyong mga utos

ay makatuwiran magpakailanman.

¹⁶¹Inuusig ako ng mga namumuno

nang walang dahilan,

ngunit salita lamang ninyo

ang aking kinatatakutan.

¹⁶²Nagagalak ako

sa inyong mga pangako,

tulad ng isang taong nakatuklas

ng malaking kayamanan.

¹⁶³Namumuhi ako at nasusuklam

sa kasinungalingan,

ngunit iniibig ko ang inyong kautusan.

¹⁶⁴Pitong beses akong nagpupuri sa inyo[#119:164 : O Paulit-ulit o Maingat.]

bawat araw dahil matuwid

ang inyong mga utos.

¹⁶⁵Magiging payapaʼt tiwasay

ang kalagayan ng mga umiibig

sa inyong kautusan,

at silaʼy hindi mabubuwal.

¹⁶⁶Panginoon umaasa ako

na akoʼy inyong ililigtas,

at sinusunod ko ang inyong mga utos.

¹⁶⁷Buong puso kong iniibig

ang inyong mga turo,

at itoʼy sinusunod ko.

¹⁶⁸Ang lahat kong ginagawa

ay inyong nalalaman,

kaya sinusunod ko ang inyong

mga tuntunin at katuruan.

¹⁶⁹Panginoon , pakinggan sana ninyo

ang aking hinaing.

Bigyan ninyo ako ng pang-unawa

ayon sa inyong pangako.

¹⁷⁰Sanaʼy dinggin ninyo

ang aking dalangin,

at iligtas ako katulad ng inyong ipinangako.

¹⁷¹Lagi akong magpupuri sa inyo,

dahil tinuturuan ninyo ako

ng inyong mga tuntunin.

¹⁷²Akoʼy aawit tungkol sa inyong mga salita,

dahil matuwid ang lahat

ng inyong mga utos.

¹⁷³Palagi sana kayong maging handa

na akoʼy tulungan,

dahil pinili kong sundin

ang inyong mga tuntunin.

¹⁷⁴Panginoon , nananabik ako

sa inyong pagliligtas.

Ang kautusan ninyo ay nagbibigay

sa akin ng kagalakan.

¹⁷⁵Panatilihin ninyo ang aking buhay

para kayoʼy aking mapapurihan,

at sanaʼy tulungan ako

ng inyong mga utos na masunod

ang inyong kalooban.

¹⁷⁶Para akong tupang naligaw at nawala,

kaya hanapin ninyo ako

na inyong lingkod,

dahil hindi ko kinakalimutan

ang inyong mga utos.