Salmo 135

Salmo 135

¹Purihin ang Panginoon !

Purihin ninyo siya, kayong mga lingkod niya,

²na naglilingkod sa bahay ng Panginoon ,

sa bakuran ng Templo ng ating Diyos.

³Purihin ninyo ang Panginoon ,

dahil siya ay mabuti.

Umawit kayo ng mga papuri sa kanya,

dahil ito ay kaaya-aya.

⁴Purihin ninyo siya!

Sapagkat pinili niya ang lahi ni Jacob

na maging kanya,

at ang mga mamamayan ng Israel

na mga lahi ni Jacob

na maging kanyang mahalagang ari-arian.

⁵Alam kong ang Panginoon

ay higit na dakila kaysa

sa alin mang diyos-diyosan.

⁶Ginagawa ng Panginoon

ang anumang nais niya

sa langit, sa lupa, sa dagat

at sa kailaliman.

⁷Dinadala niya paitaas ang mga ulap

mula sa malalayong dako ng mundo,

at ipinadala ang kidlat

na may kasamang ulan.

Inilabas din niya ang hangin mula

sa kinalalagyan nito.

⁸Pinatay niya ang mga anak na panganay

ng mga Ehipsiyo;

pati na ang mga panganay

ng kanilang mga hayop.

⁹Gumawa rin siya dito ng mga himala

at mga kahanga-hangang bagay

upang parusahan ang Faraon

at ang lahat niyang mga lingkod.

¹⁰Winasak niya ang maraming bansa,

at pinatay ang kanilang makapangyarihang mga hari,

¹¹katulad nina Sihon na hari ng Amoreo,

Haring Og ng Bashan,

at ang lahat ng hari ng Canaan.

¹²Kinuha niya ang kanilang mga lupain

at ibinigay sa mga mamamayan niyang Israelita

upang maging kanilang pag-aari.

¹³Panginoon , ang inyong pangalan

at katanyagan

ay hindi malilimutan sa lahat ng salinlahi.

¹⁴Dahil patutunayan nʼyo, Panginoon ,

na ang inyong lingkod

ay walang kasalanan,

at silaʼy inyong kahahabagan.

¹⁵Ang mga diyos ng ibang mga bansa

ay mga yari sa pilak at ginto

na gawa ng tao.

¹⁶May mga bibig,

ngunit hindi nakakapagsalita;

may mga mata,

ngunit hindi nakakakita.

¹⁷May mga tainga,

ngunit hindi nakakarinig,

at hindi sila humihinga.

¹⁸Ang mga gumawa ng diyos-diyosan

at ang lahat ng nagtitiwala rito

ay matutulad sa mga ito.

^19-20Kayong mga mamamayan ng Israel,

pati kayong mga angkan ni Aaron

at ang iba pang mga angkan ni Levi,

purihin ninyo ang Panginoon !

Kayong mga may takot sa Panginoon ,

purihin ninyo siya!

²¹Purihin ninyo ang Panginoon

na nasa Zion,

ang lungsod ng Jerusalem

na kanyang tahanan.

Purihin ang Panginoon !