Salmo 141

Salmo 141

¹Panginoon , tumatawag po ako sa inyo;

nawaʼy agad ninyo akong tulungan.

Dinggin ninyo ang panawagan ko sa inyo.

²Tanggapin nʼyo sana ang dalangin ko bilang insenso,

ang pagtataas ko ng aking mga kamay bilang handog panggabi.

³Panginoon , tulungan nʼyo akong huwag makapagsalita ng masama.

⁴Ilayo nʼyo ako sa gawaing masama at sa mga taong gumagawa nito.

Ilayo nʼyo rin ako sa kanilang mga handaan upang huwag makisalo.

⁵Tatanggapin ko ang parusa at pagsaway ng taong matuwid,

dahil ginagawa niya ito na may pag-ibig at pagmamalasakit sa akin.

Itoʼy parang langis sa aking ulo.

Ngunit sa masasamang tao ang lagi kong panalangin

ay laban sa kanilang masasamang gawain.

⁶Kapag itinapon na ang kanilang mga pinuno sa mabatong bangin,

maniniwala silang totoo ang mga sinasabi ko.

⁷Sasabihin nila, “Kakalat sa libingan ang mga buto natin

katulad ng mga bato na naglalabasan at kumakalat kapag inaararo ang lupa.”

⁸O Makapangyarihang Panginoon , akoʼy lumalapit sa inyo.

Hinihiling ko sa inyo na ingatan nʼyo ako,

huwag nʼyong hahayaang akoʼy mamatay.

⁹Ilayo nʼyo ako mula sa mga bitag

na inilaan sa akin ng masasamang tao.

¹⁰Sila sana ang mahulog sa sarili nilang bitag,

habang ako naman ay makakaiwas doon.