Salmo 144

Salmo 144

¹Purihin ang Panginoon na aking batong kanlungan.

Siya na nagsasanay sa akin sa pakikipaglaban.

²Siya ang aking Diyos na mapagmahal

at matibay na kanlungan.

Sa kanya ako kumakanlong

at humihingi ng kalinga.

Ipinasakop niya sa akin ang mga bansa.

³Panginoon , ano ba ang tao upang pagmalasakitan nʼyo?

Tao lang naman siya, bakit nʼyo siya iniisip?

⁴Ang tulad niyaʼy simoy ng hanging dumadaan,

at ang kanyang mga araw ay parang anino na mabilis mawala.

⁵Panginoon , buksan nʼyo ang langit at bumaba kayo.

Hipuin nʼyo ang mga bundok upang magsiusok.

⁶Gamitin nʼyong parang pana ang mga kidlat,

magsitakas at mangalat ang aking mga kaaway.

⁷Mula sa langit, abutin nʼyo ako

at iligtas sa kapangyarihan ng aking mga kaaway

na mula sa ibang bansa,

na parang malakas na agos ng tubig.

⁸Silaʼy mga sinungaling,

sumusumpa silang magsasabi ng katotohanan,

ngunit silaʼy nagsisinungaling.

⁹O Diyos, aawitan kita ng bagong awit na sinasabayan ng alpa.

¹⁰Kayo ang nagbigay ng tagumpay sa mga hari

at nagligtas sa inyong lingkod na si David mula sa kamatayan.

¹¹Iligtas nʼyo ako sa kapangyarihan

ng mga dayuhang kaaway,

na hindi nagsasabi ng totoo.

Silaʼy sumusumpang magsasabi ng katotohanan

ngunit silaʼy nagsisinungaling.

¹²Sana habang bata pa ang aming mga anak na lalaki

ay maging katulad sila ng tanim

na tumutubong matibay,

at sana ang aming mga anak na babae

ay maging tulad ng naggagandahang haligi ng palasyo.

¹³Sanaʼy mapuno ng lahat ng uri ng ani

ang aming mga bodega.

Dumami sana ng libu-libo

ang aming mga tupa sa pastulan,

¹⁴at dumami rin sana ang maikargang produkto ng aming mga baka.

Hindi na sana kami salakayin

at bihagin ng mga kaaway.

Wala na rin sanang iyakan

sa aming mga lansangan

dahil sa kalungkutan.

¹⁵Mapalad ang mga taong ganito ang kalagayan.

Mapalad ang mga taong ang Diyos ang kanilang Panginoon .