Salmo 147

Salmo 147

¹Purihin ang Panginoon !

Napakabuting umawit

ng pagpupuri sa ating Diyos.

Napakabuti at nararapat lang

na siya ay purihin.

²Itinatayong muli ng Panginoon

ang Jerusalem,

at muli niyang tinitipon

ang mga nabihag na Israelita.

³Pinagagaling niya ang mga pusong nabigo,

at ginagamot ang kanilang mga sugat.

⁴Ang bilang ng mga bituin

ay kanyang nalalaman

at ang bawat isa

ay binigyan niya ng pangalan.

⁵Makapangyarihan ang ating Panginoon.

Ang kanyang karunungan

ay walang hangganan.

⁶Tinutulungan ng Panginoon

ang mga inaapi,

ngunit nililipol niya nang lubos

ang masasama.

⁷Umawit kayo ng pasasalamat sa Panginoon .

Tumugtog kayo ng alpa

para sa ating Diyos.

⁸Pinupuno niya ng mga ulap

ang kalawakan,

at pinauulanan niya ang mundo,

at pinatutubo ang mga damo sa kabundukan.

⁹Binibigyan niya ng pagkain

ang mga hayop

at ang mga inakay na uwak

kapag dumadaing ang mga ito.

¹⁰Hindi siya nalulugod

sa lakas ng mga kabayo

o sa kagitingan ng mga kawal.

¹¹Ang Panginoon ay nalulugod

sa mga may takot sa kanya

at nagtitiwala sa kanyang pag-ibig.

¹²Purihin ninyo ang Panginoon

na inyong Diyos,

kayong mga naninirahan sa Zion,

ang lungsod ng Jerusalem!

¹³Dahil pinatitibay niya

ang pintuan ng inyong bayan,

at kayoʼy kanyang pinagpapala.

¹⁴Binibigyan niya ng kapayapaan

ang inyong lugar,

at binubusog niya kayo

ng pinakamabuting trigo.

¹⁵Inuutusan niya ang mundo,

at agad naman itong sumusunod.

¹⁶Inilalatag niya sa lupa ang niyebe

na parang mga puting kumot,

at ikinakalat na parang abo.

¹⁷Nagpapadala siya ng ulan na yelo

na parang maliliit na bato.

Kahit sino ay walang makatagal

sa lamig nito.

¹⁸Sa kanyang utos,

ang yelo ay natutunaw.

Pinaiihip niya ang hangin,

at ang yelo

ay nagiging tubig na umaagos.

¹⁹Ipinahayag niya ang kanyang mga salita,

mga tuntunin at mga utos

sa mga taga-Israel na lahi ni Jacob.

²⁰Hindi niya ito ginawa sa ibang mga bansa;

hindi nila alam ang kanyang mga utos.

Purihin ang Panginoon !