Salmo 19

Salmo 19

¹Ipinapakita ng kalangitan

ang kaluwalhatian ng Diyos!

Inihahayag ng kalawakan

ang gawa ng kanyang mga kamay.

²Araw-araw, sinasabi ng kalangitan

ang tungkol dito,

gabi-gabi, ipinaaalam ng kalawakan

ang tungkol sa kanyang kapangyarihan.

³Kahit walang salita o tinig

na mula sa kanilaʼy naririnig,

⁴napapakinggan pa rin sa buong daigdig

ang kanilang salitaʼt tinig.

Doon sa kalangitan,

iginawa ng Diyos ang araw ng tirahan.

⁵Tuwing umagaʼy sumisikat ito

katulad ng isang lalaking ikakasal

na masayang lumalabas

ng kanyang tahanan.

O kayaʼy isang manlalarong kampeon

na sabik na sabik sumabak sa takbuhan.

⁶Itoʼy sumisikat sa silangan,

at lumulubog sa kanluran;

walang di mahahagip ng init

nitong taglay.

⁷Ang kautusan ng Panginoon

ay walang kamalian.

Itoʼy nagbibigay sa atin

ng bagong kalakasan.

Ang mga turo ng Panginoon

ay mapagkakatiwalaan,

at nagbibigay karunungan

sa mga kulang sa kaalaman.

⁸Ang mga tuntunin ng Panginoon ay tama

at sa pusoʼy nagbibigay kagalakan.

Ang mga utos ng Panginoon ay malinaw

at nagbibigay-liwanag sa kaisipan.

⁹Ang pagkatakot sa Panginoon

ay nagpapadalisay ng puso;

mananatili ito magpakailanman.

Ang mga utos ng Panginoon

ay matuwid

at makatarungan.

¹⁰Ang mga itoʼy higit pa kaysa ginto

kahit pa sa purong ginto,

at mas matamis pa

kaysa sa pulot-pukyutan.

¹¹Ang inyong mga utos,

ay nagbibigay babala sa akin

na inyong lingkod.

May dakilang gantimpala

kapag itoʼy aking sinusunod.

¹²Hindi namin napapansin

ang aming mga kamalian.

Kaya linisin po ninyo ako

sa mga kasalanang hindi ko nalalaman.

¹³Ilayo rin ninyo ako

sa kasalanang sadya kong ginagawa.

Huwag po ninyong payagan

na alipinin ako nito.

At mamumuhay ako

nang walang kapintasan,

lubos na lalaya

sa maraming kasalanan.

¹⁴Nawaʼy maging kalugod-lugod sa inyo Panginoon

ang aking iniisip at sinasabi.

Kayo,

ang aking batong kanlungan

at tagapagligtas!