Salmo 26

Salmo 26

¹Patunayan nʼyo, Panginoon ,

na akoʼy walang kasalanan,

dahil akoʼy namumuhay nang matuwid,

at nagtitiwala sa inyo nang walang pag-aalinlangan.

²Siyasatin at subukin nʼyo ako, Panginoon .

Suriin nʼyo ang aking pusoʼt isipan,

³dahil lagi kong naaalala ang inyong pagmamahal,

at namumuhay ako na pinanghahawakan

ang inyong katapatan.

⁴Hindi ako sumasama

sa mga taong sinungaling

at mapagpanggap.

⁵Kinaiinisan ko ang mga pagsasama-sama

ng masasamang tao,

at hindi ako nakikisama sa kanila.

⁶Naghuhugas ako ng kamay

upang ipakitang akoʼy walang kasalanan.

Pagkatapos, pumupunta ako sa inyong altar,

O Panginoon ,

⁷at umaawit ng papuriʼt pasasalamat.

Sinasabi ko sa mga tao

ang lahat ng inyong mga kahanga-hangang ginawa.

⁸Panginoon , mahal ko ang iyong tahanan,

na siyang kinaroroonan ng inyong kaluwalhatian.

⁹Huwag nʼyo po akong parusahang

kasama ng mga makasalanan,

gaya ng mga mamamatay-tao.

¹⁰Palagi silang handang gumawa ng masama,

at nanghihingi ng suhol.

¹¹Ngunit akoʼy namumuhay nang matuwid,

kaya tubusin nʼyo ako at inyong kahabagan.

¹²Ngayon, ligtas na ako sa panganib,

kaya pupurihin ko kayo, Panginoon ,

sa gitna ng inyong mamamayang nagtitipon-tipon.