Salmo 29

Salmo 29

¹Purihin ang Panginoon , kayong mga nilalang sa kalangitan.

Purihin ang Panginoon sa kanyang kadakilaan at kapangyarihan.

²Papurihan ang Panginoon ng mga papuring nararapat sa kanyang pangalan.

Sambahin ninyo siya sa kanyang banal na presensya.

³Ang tinig ng Panginoong Diyos

na makapangyarihan ay dumadagundong

na parang kulog sa ibabaw ng malalakas na alon ng karagatan.

⁴Ang tinig ng Panginoon

ay makapangyarihan at kagalang-galang.

⁵Ang tinig ng Panginoon ay makakabali

at makakapagpira-piraso ng pinakamatibay

na mga puno ng sedro sa Lebanon.

⁶Niyayanig ng tinig ng Panginoon ang mga bundok sa Lebanon

at ang bundok ng Hermon,

na parang mailap na baka na tumatalon-talon.

⁷Ang tinig ng Panginoon ang nagpapakidlat.

⁸Ang tinig din ng Panginoon

ang nagpapayanig sa Disyerto ng Kades.

⁹Sa tinig ng Panginoon , napapagalaw ang mga puno ng ensina,[#29:9 : Sa literal, napapaanak ang mga usa.]

at nalalagas ang mga dahon sa kagubatan.

At ang lahat ng nasa Templo

ay sumisigaw,

“Ang Diyos ay makapangyarihan!”

¹⁰Ang Panginoon ang may kapangyarihan sa mga baha.

Maghahari siya magpakailanman.

¹¹Ang Panginoon ang nagbibigay

ng kalakasan sa kanyang mga mamamayan,

at pinagpapala niya sila ng mabuting kalagayan.