Salmo 45

Salmo 45

¹Punong-puno ng magagandang salita

ang aking puso

habang akoʼy bumibigkas ng mga tula

para sa hari.

Ang aking kakayahan sa pagsasalita

ay katulad ng kakayahan ng isang magaling na makata.

²Mahal na Hari, kayo ang pinakamagandang lalaki sa lahat.

At ang mga salita nʼyo ay nakabubuti sa iba.

Kaya lagi kayong pinagpapala ng Diyos.

³Marangal na hari na dakilang mandirigma!

Isukbit nʼyo sa inyong tagiliran ang inyong espada.

⁴Ipahayag na ang inyong kadakilaan!

Maging matagumpay kayo na may katotohanan,

kapakumbabaan at katuwiran.

Gumawa kayo ng mga kahanga-hangang bagay

sa pamamagitan ng inyong kapangyarihan.

⁵Patamaan nʼyo ng matatalim nʼyong palaso

ang puso ng inyong mga kaaway.

Babagsak ang mga bansa

sa inyong paanan.

⁶O Diyos, ang inyong kaharian ay magpakailanman

at ang inyong paghahari ay makatarungan.

⁷Kinalulugdan ninyo ang gumagawa ng matuwid

at kinamumuhian ninyo ang gumagawa ng masama.

Kaya pinili ka ng Diyos, na iyong Diyos,

at binigyan ng kagalakang higit sa ibinigay niya

sa mga kasama mo.

⁸Ang mga damit nʼyo ay pinabanguhan

ng mira, aloe at kasia.

Sa inyong palasyo na nakakasilaw sa ganda,

nililibang kayo ng mga tugtugin ng alpa.

⁹Ang ilan sa inyong mga kagalang-galang na babae

ay mga prinsesa.

At sa inyong kanan ay nakatayo ang reyna

na nakasuot ng mga alahas

na purong ginto mula sa Ofir.

¹⁰O kasintahan ng hari, pakinggan mo ang sasabihin ko:

Kalimutan mo ang iyong mga kamag-anak

at mga kababayan.

¹¹Nabihag mo ang hari ng iyong kagandahan.

Siyaʼy iyong amo na dapat igalang.

¹²Ang mga taga-Tiro ay magdadala sa iyo ng kaloob;

pati ang mga mayayaman

ay hihingi ng pabor sa iyo.

¹³Nagniningning ang kagandahan ng prinsesa

sa loob ng kanyang silid.

Ang kanyang suot na trahe de boda

ay may mga burdang ginto.

¹⁴Sa ganitong kasuotan ay dadalhin siya sa hari,

kasama ng mga dalagang abay.

¹⁵Lahat silaʼy nagagalak at nananabik

habang pumapasok sa palasyo ng hari.

¹⁶Mahal na Hari, ang inyong mga anak na lalaki

ay magiging hari rin, katulad ng kanilang mga ninuno.

Gagawin nʼyo silang mga pinuno

sa buong daigdig.

¹⁷Ipapaalala kita sa lahat ng salinlahi.

Kaya pupurihin ka ng mga tao magpakailanman.