Salmo 46

Salmo 46

¹Ang Diyos ang ating kanlungan

at kalakasan.

Siyaʼy laging nakahandang sumaklolo

sa oras ng kagipitan.

²Kaya huwag tayong matatakot

kahit lumindol man,

at gumuho ang mga bundok

at bumagsak sa karagatan.

³Humampas man at umugong

ang mga alon na naglalakihan,

at mayanig ang kabundukan.

⁴May ilog na nagbibigay ng kagalakan

sa bayan ng Diyos,

sa banal na tahanan ng Kataas-taasang Diyos.

⁵Ang Diyos ay nakatira sa lungsod na ito

kaya hindi ito magigiba.

Itoʼy kanyang ipagtatanggol sa kinaumagahan.

⁶Nagkakagulo ang mga bansa;

bumabagsak ang mga kaharian.

Sa sigaw ng Diyos, ang mga tao

ay parang matutunaw sa takot.

⁷Ang Panginoon ng mga Hukbo

ay kasama natin.

Ang Diyos ni Jacob

ang kanlungan natin.

⁸Halika, tingnan mo ang mga kahanga-hangang bagay

na ginagawa ng Panginoon sa mundo.

⁹Kanyang pinatitigil ang mga digmaan

sa lahat ng sulok ng mundo.

Binabali niya ang mga sibat,

pinuputol ang mga pana,

at sinusunog ang mga kalasag.

¹⁰Sinasabi niya,

“Tumigil kayo at kilalanin ninyo na ako ang Diyos.

Akoʼy pararangalan sa mga bansa.

Akoʼy papupurihan sa buong mundo.”

¹¹Kasama natin ang Panginoon ng mga Hukbo.

Ang Diyos ni Jacob ang ating kanlungan.