Salmo 49

Salmo 49

¹Makinig kayo, lahat ng bansa,

kayong lahat na nananahan dito sa mundo!

²Dakila ka man o aba,

mayaman ka man o dukha, makinig ka,

³dahil magsasalita ako na puno ng karunungan,

at puno rin ng pang-unawa

ang aking kaisipan.

⁴Itutuon ko ang aking pansin sa mga kawikaan,

at ipapaliwanag ko ang kahulugan nito,

habang tinutugtog ko ang alpa.

⁵Bakit ako matatakot

kung may parating na panganib,

o kung akoʼy mapaligiran ng aking mga kaaway?

⁶Sila ay nagtitiwala sa kanilang kayamanan

at dahil dito ay nagmamayabang.

⁷Ngunit walang may kakayahang tubusin

ang kanyang sarili mula sa kamatayan,

kahit magbayad pa siya sa Diyos.

⁸Dahil napakamahal ang pagtubos sa isang buhay;

hindi sapat ang anumang pambayad

⁹upang ang taoʼy mabuhay magpakailanman,

at hindi na mamatay.

¹⁰Nakikita nga ng lahat,

na kahit ang marurunong ay namamatay,

ganoon din ang mga matitigas

ang ulo at mga hangal.

At maiiwan nila sa iba ang kanilang kayamanan.

¹¹Ang kanilang libingan

ay magiging bahay nila magpakailanman.

Doon sila mananahan,

kahit may mga lupaing nakapangalan sa kanila.

¹²Kahit tanyag ang tao, hindi siya magtatagal;

mamamatay din siya katulad ng hayop.

¹³Ganito rin ang kahihinatnan ng taong nagtitiwala sa sarili,

na nasisiyahan sa sariling pananalita.

¹⁴Silaʼy nakatakdang mamatay.

Tulad sila ng mga tupa na ginagabayan ng kamatayan patungo sa libingan.

(Pagsapit ng umaga, pangungunahan sila ng mga matuwid.)

Mabubulok ang kanilang bangkay sa libingan,

malayo sa dati nilang tirahan.

¹⁵Ngunit tutubusin naman ako ng Diyos

mula sa kapangyarihan ng kamatayan.

Tiyak na ililigtas niya ako.

¹⁶Huwag kang mangamba

kung yumayaman ang iba

at ang kanilang kayamanan

ay lalo pang nadadagdagan,

¹⁷dahil hindi nila ito madadala kapag silaʼy namatay.

Ang kanilang kayamanan

ay hindi madadala sa libingan.

¹⁸Sa buhay na ito, itinuturing nila na pinagpala sila ng Diyos,

at pinupuri din sila ng mga tao

dahil nagtagumpay sila.

¹⁹Ngunit makakasama pa rin sila

ng kanilang mga ninunong namatay na,

doon sa lugar na hindi sila makakakita ng liwanag.

²⁰Ang taong mayaman na hindi

nakakaunawa ng katotohanan

ay mamamatay katulad ng mga hayop.