Salmo 50

Salmo 50

¹Ang Panginoong Diyos na makapangyarihan

ay nagsasalita at nananawagan

sa lahat ng tao sa buong mundo.

²Nagliliwanag siya mula sa Zion,

ang magandang lungsod na walang kapintasan.

³Darating ang Diyos at hindi lang siya basta mananahimik.

Sa unahan niyaʼy may apoy na nagngangalit,

at may bagyong ubod ng lakas sa kanyang paligid.

⁴Tinawag niya ang buong langit at mundo upang sumaksi

sa paghatol niya sa kanyang mga mamamayan.

⁵Sinabi niya, “Tipunin sa aking harapan

ang mga tapat kong pinili

na nakipagkasundo sa akin

sa pamamagitan ng paghahandog.”

⁶Inihahayag ng kalangitan na ang Diyos ay matuwid,

dahil siya nga ang Diyos

na may karapatang mamuno at humatol.

⁷Sinabi pa ng Diyos, “Kayong mga mamamayan ko,

pakinggan ninyo ang aking sasabihin!

Ako ang Diyos, na inyong Diyos.

Sasaksi ako laban sa inyo, mga taga-Israel!

⁸Hindi dahil sa inyong mga sinusunog na handog

na palagi ninyong iniaalay sa akin.

⁹Hindi ko kailangan ang inyong mga baka at mga kambing.[#50:9 : Sa literal, toro.]

¹⁰Sapagkat akin ang lahat ng hayop:

ang mga hayop sa gubat

at ang mga baka sa libu-libong mga burol.

¹¹Kilala ko rin ang lahat ng ibon sa mga bundok,

at ang lahat ng hayop sa parang ay akin.

¹²Kung magutom man ako,

hindi ako hihingi sa inyo ng pagkain,

dahil ang daigdig at ang lahat

ng nasa loob nito ay akin.

¹³Kumakain ba ako ng karne ng toro?

Hindi!

Umiinom ba ako ng dugo ng kambing?

Hindi!

¹⁴“Ang kailangan kong handog ay ang inyong pasasalamat

at ang pagtupad sa mga ipinangako ninyo

sa akin na Kataas-taasang Diyos.

¹⁵Tumawag kayo sa akin sa oras ng inyong kagipitan.

At ililigtas ko kayo at akoʼy pararangalan ninyo.”

¹⁶Ngunit sinabi ng Diyos sa mga masama,

“Wala kayong karapatang banggitin

ang aking mga kautusan at kasunduan!

¹⁷Namumuhi kayo sa aking pagdidisiplina.

Hindi ninyo pinapansin ang mga sinasabi ko.

¹⁸Kapag nakakita kayo ng magnanakaw,

nakikipagkaibigan kayo sa kanya

at nakikisama rin kayo sa mga nakikiapid.

¹⁹Lagi kayong nagsasalita ng masama

at kay dali para sa inyong magsinungaling.

²⁰Handa kayong manira ng puri ng inyong mga kaanak,

kahit ng sarili ninyong kapatid.

²¹Hindi ako kumibo nang gawin ninyo ang mga bagay na ito,

kaya inakala ninyong katulad din ninyo ako.

Ngunit sasawayin ko kayo

at ipapakita ko sa inyo kung gaano kayo kasama.

²²Pakinggan ninyo ito, kayong mga nakalimot sa Diyos,

dahil kung hindi ay lilipulin ko kayo

at walang makapagliligtas sa inyo.

²³Ang naghahandog sa akin ng pasasalamat

ay pinaparangalan ako

at ang nag-iingat sa kanyang pag-uugali

ay ililigtas ko.”