Salmo 51

Salmo 51

¹O Diyos, ako poʼy inyong kaawaan

sang-ayon sa inyong tapat

na pagmamahal;

Ang mga pagsuway koʼy

inyo pong pawiin

sang-ayon sa inyong

pagmamalasakit sa akin.

²Hugasan nʼyo po ako

sa aking kasamaan,

at linisin nang lubos

sa aking kasalanan.

³Mga pagsuway koʼy

tunay kong nalalaman,

pagkakasala koʼy

laging laman ng isipan.

⁴Tanging sa inyo lamang ako

tunay na nagkasala.

Di kalugod-lugod sa inyong harapan

ang aking ginawa.

Kaya ang inyong paghuhusga

sa akin ay makatarungan.

Nararapat lamang

na akoʼy inyong hatulan.

⁵Tunay ngang akoʼy makasalanan,

mula pa noong akoʼy isilang;

kahit noong akoʼy ipinagbubuntis

pa lamang ng aking ina.

⁶Ngunit ang nais nʼyoy

isang pusong tapat

kahit noong akoʼy nasa sinapupunan pa lamang;

pinuspos nʼyo ako

ng karunungan.

⁷Linisin at hugasan nʼyo ako

sa aking mga kasalanan

upang lubusan luminis ang pusoʼt kaluluwa ko.

⁸Ipadama nʼyo sa akin ang kasiyahan

at kaligayahan

upang sa aba kong kalagayan,

ay muli kong makamtan ang kagalakan.

⁹Kalimutan nʼyo na ang aking

mga kasalanan,

at burahin ang lahat kong kasamaan.

¹⁰Isang busilak na puso, O Diyos,

ang likhain nʼyo sa akin;

bagong espiritung matapat,

ang ibigay sa akin.

¹¹Huwag nʼyo po akong itaboy

palayo sa inyong piling,

at huwag nʼyo po sanang bawiin

ang inyong Banal na Espiritu sa akin.

¹²Panumbalikin sa akin

ang kagalakang

bunga ng inyong pagliligtas sa akin.

Bigyan nawa ako

ng espiritung masunurin.

¹³At tuturuan ko

ang mga makasalanan

ng inyong mga pamamaraan

upang sa inyo, silaʼy manumbalik.

¹⁴Patawarin nʼyo ako sa kasalanan kong pagpatay,[#51:14 O Iligtas nʼyo ako sa nakaambang kamatayan.]

O Diyos na aking Tagapagligtas,

at sisigaw ako sa galak

dahil kayo ay matuwid.

¹⁵Panginoon, buksan nʼyo po

ang aking labi,

nang ang mga itoʼy magpuri sa inyo.

¹⁶Hindi naman mga handog

ang nais nʼyo;

mag-alay man ako

ng mga handog na sinusunog,

hindi rin kayo malulugod.

¹⁷Ang handog ko sa inyo, O Diyos,

ay isang pusong nagpapakumbaba,

at nagsisisi sa kanyang kasalanan.

O Diyos, ito ang handog

na hindi ninyo tatanggihan.

¹⁸Dahil sa kagustuhan nʼyo,

pagpalain nʼyo ang Jerusalem.

Muli nʼyong itayo ang mga pader nito.

¹⁹Nang sa gayoʼy malugod kayo

sa mga nararapat na handog,

pati sa mga handog na sinusunog nang buo.

At maghahandog din sila ng mga baka

sa inyong altar.