Salmo 55

Salmo 55

¹O Diyos, dinggin nʼyo

ang aking dalangin.

Ang paghingi ko ng tulong

ay bigyan nʼyo ng pansin.

²Pakinggan nʼyo ako at sagutin,

naguguluhan ako sa aking

mga suliranin.

³Nag-aalala na ako sa pananakot

at pang-aapi ng aking mga kaaway.

Sapagkat galit na galit sila,

ginugulo nila ako at pinagbabantaan.

⁴Kumakabog ang dibdib ko

sa takot na akoʼy mamatay.

⁵Nanginginig ako sa labis na takot;

nilalamon ako ng sindak.

⁶At nasabi ko ito:

“Kung may pakpak lang ako

tulad ng kalapati,

lilipad ako at maghahanap

ng mapagpapahingahan.

⁷Lilipad ako ng malayo

at doon mananahan sa ilang.

⁸Maghahanap agad ako

ng mapagtataguan

upang makaiwas sa galit

ng aking mga kaaway

na tulad malakas na hangin o bagyo.”

⁹Panginoon, lituhin nʼyo

ang aking mga kaaway

at guluhin nʼyo ang kanilang

mga pag-uusap.

Dahil nakita ko ang karahasan

at kaguluhan sa lungsod.

¹⁰Araw-gabi itong nangyayari.[#55:10 : Sa literal, naglilibot sila sa mga pader ng lungsod.]

Ang lungsod ay puno ng kasamaan

at kaguluhan.

¹¹Laganap ang kasamaan

at walang tigil ang pang-aapi

at pandaraya sa mga lansangan.

¹²Matitiis ko kung ang kaaway ko

ang kumukutya sa akin.

Kung ang isang taong galit sa akin

ang magmamalaki sa akin,

maiiwasan ko siya.

¹³Ngunit mismong kagaya ko,

kasama ko at kaibigan ko

ang sa akin ay nang-iinsulto.

¹⁴Dati, malapít kami sa isaʼt isa,

at magkasama pa kaming

pumupunta sa bahay ng Diyos.

¹⁵Sanaʼy mamatay na lang bigla

ang aking mga kaaway.

Sanaʼy malibing silang buhay

sa lugar ng mga patay.

Sapagkat kasamaan

ang nasa puso nila

at sa kanilang mga tahanan.

¹⁶Ngunit ako ay humihingi ng tulong

sa Panginoong Diyos,

at inililigtas niya ako.

¹⁷Umaga, tanghali at gabi,

dumadaing ako at nananaghoy,

at akoʼy pinapakinggan niya.

¹⁸Inililigtas niya ako at iniingatan

sa aking pakikipaglaban,

kahit napakarami ng aking

mga kalaban.

¹⁹Pakikinggan ako ng Diyos

na naghahari magpakailanman,

at ibabagsak niya ang aking mga kaaway.

Dahil ang aking mga kaaway

ay hindi nagbabago at walang takot sa Diyos.

²⁰Kinalaban ng dati kong kaibigan

ang kanyang mga kaibigan;

at hindi niya tinupad ang kanyang

mga pangako.

²¹Malumanay at mahusay

nga siyang magsalita,

ngunit puno naman ng poot

ang kanyang puso,

at ang kanyang pananalita

ay nakakasugat

tulad ng matalim na espada.

²²Ibigay mo sa Panginoon

ang iyong mga alalahanin

at ikaw ay kanyang kakalingain.

Hindi niya pababayaan

ang mga matuwid, magpakailanman.

²³Ngunit itatapon niya

ang mga mamamatay-tao

at ang mga mandaraya

sa napakalalim na hukay

bago mangalahati ang kanilang buhay.

Ngunit ako, akoʼy magtitiwala sa kanya.