Salmo 71

Salmo 71

¹Panginoon , sa inyo ako humihingi ng kalinga.

Huwag nʼyong pabayaang akoʼy mapahiya.

²Tulungan nʼyo ako at iligtas

sapagkat kayo ay matuwid.

Akoʼy inyong dinggin at sagipin.

³Kayo sa akin ay batong kanlungan

na lagi kong malalapitan.

Ipag-utos nʼyo na iligtas ako,

dahil kayo ang aking matibay

na batong pananggalang.

⁴O Diyos ko, iligtas nʼyo ako

mula sa kamay ng masasama

at malulupit na tao.

⁵Kayo ang aking pag-asa,

O Makapangyarihang Panginoon .

Mula noong akoʼy bata pa,

sa inyo, ako ay nagtiwala.

⁶Kayo ay aking kasama,

mula nang akoʼy isilang;

sa sinapupunan ng aking ina,

akoʼy inyong iningatan.

Akoʼy magpupuri sa inyo,

magpakailanman.

⁷Naging halimbawa ang buhay ko

para sa karamihan,

dahil kayo ang aking naging kalakasan

at tagapag-ingat.

⁸Maghapon ko kayong pinapupurihan

dahil sa inyong kahanga-hangang kagandahan.

⁹Huwag po ninyo akong iiwan

kapag akoʼy matanda na.

Huwag po ninyo akong pababayaan

kapag akoʼy mahina na.

¹⁰Dahil nag-uusap-usap

ang aking mga kaaway

at nagbabalak na akoʼy patayin.

¹¹Sinasabi nilang, “Pinabayaan

na siya ng Diyos,

kaya habulin natin siya at dakpin

sapagkat wala namang magliligtas sa kanya.”

¹²O Diyos ko, huwag nʼyo po akong layuan;

at akoʼy agad ninyong saklolohan.

¹³Nawa silang sa akin ay nagpaparatang

ay mapahiya at mapahamak.

Ang mga nagnanais na akoʼy saktan

ang siya sanang kutyain

at malagay sa kahihiyan.

¹⁴Ngunit ako, O Diyos ay palaging aasa

at lalo pang magpupuri sa inyo.

¹⁵Maghapon kong sasabihin

na matuwid kayo at nagliligtas,

kahit na hindi ko lubusang maunawaan.

¹⁶Ihahayag ko ang inyong mga kahanga-hangang gawa,

O Makapangyarihang Panginoon ;

Ihahayag ko sa mga tao

na kayo ay makatarungan;

Oo, kayo lamang.

¹⁷O Diyos, mula pagkabataʼy

itinuro nʼyo na sa akin

ang tungkol sa inyong

mga kahanga-hangang gawa

at hanggang ngayon,

inihahayag ko ito sa mga tao.

¹⁸At ngayong akoʼy matanda na

at maputi na ang buhok,

huwag nʼyo akong pabayaan, O Diyos.

Maihayag ko sana ang inyong lakas

at kapangyarihan sa susunod na henerasyon,

at sa lahat ng mga darating sa hinaharap.

¹⁹O Diyos, ang inyong katuwiran

ay hindi kayang maunawaan nang lubusan.

Kahanga-hanga ang inyong mga gawa.

Tunay ngang walang sinuman ang tulad ninyo.

²⁰Bagamaʼt pinaranas nʼyo ako

ng maraming hirap,

bibigyan nʼyo akong muli ng bagong buhay.

At mula sa aking pagkakalibing,

akoʼy muli nʼyong bubuhayin.

²¹Bibigyan nʼyo ako

ng mas higit na karangalan,

at muli akong aaliwin.

²²O Diyos ko, dahil sa inyong katapatan

pupurihin ko kayo sa aking

pagtugtog ng alpa.

O Banal na Diyos ng Israel,

aawit ako ng mga papuri sa inyo sa pamamagitan ng pagtugtog ng lira.

²³Dahil akoʼy iniligtas nʼyo,

sisigaw ako sa tuwa habang tumutugtog

at umaawit ng papuri sa inyo.

²⁴Lagi kong ipapahayag na kayo ay matuwid

dahil nabigo at nalagay sa kahihiyan

ang mga nagnais na mapahamak ako.