Salmo 75

Salmo 75

¹O Diyos, nagpapasalamat kami sa inyo.

Nagpapasalamat kami

dahil malapit kayo sa amin.

Ipinapahayag ng mga tao

ang inyong mga kahanga-hangang gawa.

²Sinabi nʼyo O Diyos, “May itinakda akong

panahon ng paghatol

at hahatol ako nang walang kinikilingan.”

³Kapag yumanig ang mundo

at ang mga taoʼy magkagulo sa takot,

ako ang magpapatibay ng pundasyon ng mundo.

⁴Sinasabi ko sa mga hambog,

“Huwag kayong magyabang”

at sa masasama,

“Huwag ninyong ipagmalaki

ang inyong kakayahan.

⁵Tigilan nʼyo na ang pagmamalaki

na kayo ay nanalo

at magpakumbaba na kayo.”

⁶Dahil ang tagumpay ng taoʼy

hindi nagmumula sa kung saan-saan,

⁷kundi sa Diyos lamang.

Siya ang humahatol;

kung sino ang ibababa

at kung sino ang itataas.

⁸Dahil ang Panginoon ang humahawak ng kopa

na puno ng bumubulang matapang na alak.

Ibinubuhos niya ito at ipinaiinom sa masasama

hanggang sa huling patak.

⁹Ngunit ako, walang tigil kong ipahahayag

ang tungkol sa Diyos ni Jacob,

aawit ako ng mga papuri para sa kanya.

¹⁰Aalisin niya ang kakayahan ng masasama,[#75:10 : Sa Hebreo, ko.; #75:10 : Sa Hebreo, Puputulin ko ang lahat ng sungay ng masasamâ.]

ngunit dadagdagan niya

ang kapangyarihan ng matutuwid.