Salmo 86

Salmo 86

¹Panginoon , inyong dinggin at sagutin

ang aking panalangin

sapagkat akoʼy naghihirap

at nangangailangan.

²Ingatan nʼyo ang buhay ko

sapagkat akoʼy tapat sa inyo.

Kayo ang aking Diyos,

iligtas nʼyo ang inyong lingkod

na nagtitiwala sa inyo.

³Panginoon, maawa kayo sa akin

dahil buong araw akong

tumatawag sa inyo.

⁴Bigyan nʼyo ng kagalakan

ang inyong lingkod, Panginoon,

dahil saʼyo ako nananalangin.

⁵Tunay kayong mabuti at mapagpatawad,

O Panginoon,

puno ng pag-ibig sa lahat

ng tumatawag sa inyo.

⁶Pakinggan nʼyo ang aking dalangin,

Panginoon .

Ang pagsusumamo koʼy

inyong dinggin.

⁷Akoʼy tumatawag sa inyo

sa oras ng kagipitan

dahil sinasagot nʼyo ako.

⁸Walang diyos na katulad nʼyo,

Panginoon;

walang sinumang makakagawa

ng mga ginawa ninyo.

⁹Ang lahat ng bansa na inyong ginawa,[#86:9 : O lahi.]

ay lalapit at sasamba sa inyo,

Panginoon.

Pupurihin nila ang inyong pangalan.

¹⁰Sapagkat makapangyarihan kayo

at ang mga gawa nʼyo

ay kahanga-hanga.

Kayo ang nag-iisang Diyos.

¹¹Panginoon , ituro nʼyo sa akin

ang inyong pamamaraan,

at susundin ko ito nang may katapatan.

Bigyan nʼyo ako ng pusong

may takot sa inyo.

¹²Panginoon kong Diyos,

buong puso ko kayong pasasalamatan.

Pupurihin ko ang inyong pangalan

magpakailanman.

¹³Sapagkat ang inyong pag-ibig

sa akin ay dakila.

Iniligtas nʼyo ako mula sa kamatayan.

¹⁴O Diyos, sinasalakay ako

ng mga mayayabang

gusto akong patayin

ng mga walang awa.

Malulupit sila at hindi kumikilala sa inyo.

¹⁵Ngunit kayo, Panginoon,

ay Diyos

na nagmamalasakit at mahabagin.

Wagas ang pag-ibig nʼyo,

at hindi kayo madaling magalit.

¹⁶Bigyang-pansin nʼyo ako

at kahabagan;

bigyan nʼyo ako ng inyong kalakasan

at iligtas ako na inyong lingkod.

¹⁷Ipakita sa akin ang tanda

ng inyong kabutihan,

upang makita ito ng aking mga kaaway

at nang silaʼy mapahiya.

Dahil kayo, Panginoon ,

ang tumutulong at umaaliw sa akin.