Salmo 94

Salmo 94

¹Panginoon , kayo ang Diyos na naghihiganti.

Ipakita nʼyo na ang inyong katarungan.

²Kayo ang humahatol sa lahat ng tao,

kumilos na po kayo Panginoon ,

gantihan nʼyo na nang nararapat ang mayayabang.

³Hanggang kailan magdiriwang ang masasama,

Panginoon ?

⁴Silang lahat na gumagawa ng masama

ay ubod ng yabang.

⁵Inaapi nila ang inyong mga mamamayan, Panginoon

sinasaktan nila ang inyong mga hinirang.

⁶Pinapatay nila ang mga biyuda

at mga dayuhan,

pati na ang mga ulila.

⁷Sinasabi nila, “Hindi makikita ng Panginoon ang ginagawa namin;

hindi ito mapapansin ng Diyos ni Jacob.”

⁸Kayong mga hangal at mahihina ang utak,

kailan ba kayo makakaunawa?

Unawain ninyo ito:

⁹Ang Diyos na gumawa ng ating mga tainga at mata,

hindi ba nakakarinig o nakakakita?

¹⁰Akala nʼyo baʼy hindi ni magpaparusa ang Diyos

na siyang dumidisiplina sa mga bansa?

Akala nʼyo baʼy kulang siya sa kaalaman?

¹¹Alam ng Panginoon na ang iniisip ng mga tao

ay walang kabuluhan.

¹²O Panginoon , pinagpala ang taong

pinangangaralan nʼyo

sa pamamagitan ng pagtuturo sa kanya

ng inyong mga kautusan.

¹³Tinuturuan nʼyo siya

upang magkaroon siya ng kapayapaan

sa oras ng kaguluhan hanggang sa oras

na ang masasamá ay inyong parusahan.

¹⁴Dahil hindi nʼyo itatakwil, Panginoon ,

ang mamamayang pag-aari ninyo.

¹⁵Darating ang araw na ang paghatol

ay muling magiging makatarungan

at itoʼy susundin ng lahat ng namumuhay

nang matuwid.

¹⁶Walang tumutulong sa akin

laban sa mga taong gumagawa ng kasamaan

kundi kayo lang, Panginoon .

¹⁷Kung hindi nʼyo ako tinulungan Panginoon ,

maaaring patay na ako ngayon.

¹⁸Nang sabihin kong parang

mamamatay na ako,

ang inyong pag-ibig at awa, Panginoon ,

ang tumulong sa akin.

¹⁹Kapag gulong-gulo ang isip ko,

inaaliw nʼyo ako at akoʼy sumasaya.

²⁰Hindi kayo maaaring pumanig sa masasamang hukom[#94:20 : O pinuno.]

na gumagawa ng kasamaan

sa pamamagitan ng kautusan.

²¹Sama-sama silang kumakalaban sa matutuwid

at hinahatulan nila ng kamatayan ang walang kasalanan.

²²Ngunit kayo, Panginoon na aking Diyos

ay aking tagapagtanggol

at batong kanlungan.

²³Parurusahan nʼyo sila

dahil sa kanilang mga kasalanan.

Tiyak na lilipulin nʼyo sila,

O Panginoon naming Diyos.