Salmo 97

Salmo 97

¹Ang Panginoon ay naghahari!

Kaya magalak ang mundo,

pati na ang mga isla.

²Napapalibutan siya ng makakapal na ulap

at naghahari nang may katuwiran at katarungan.

³May apoy sa unahan niya

at sinusunog nito ang mga kaaway niyang

nakapalibot sa kanya.

⁴Ang mga kidlat

niyaʼy nagliliwanag sa mundo.

Nanginginig sa takot ang mga tao

kapag nakikita ito.

⁵Natutunaw na parang kandila

ang mga kabundukan

sa presensya ng Panginoon ,

ang Panginoon na naghahari

sa buong mundo.

⁶Ipinapahayag ng langit ang kanyang katuwiran,

at nakikita ng lahat ng tao

ang kanyang kaluwalhatian.

⁷Mapapahiya ang lahat ng sumasamba

sa mga diyos-diyosan

at ang mga ipinagmamalaki ang mga ito.

Kayong lahat na mga diyos-diyosan

lumuhod at sambahin ninyo ang Diyos.

⁸Panginoon , narinig ng mga taga-Zion[#97:8 : O Jerusalem.]

at ng mga taga-Juda ang tungkol sa inyong

wastong pamamaraan ng pamamahala,

kaya tuwang-tuwa sila.

⁹Dahil kayo, Panginoon , ang Kataas-taasang Diyos

ay naghahari sa buong mundo.

Higit kayong dakila kaysa

sa lahat ng mga diyos.

¹⁰Kayong mga umiibig sa Panginoon

ay dapat mamuhi sa kasamaan.

Dahil iniingatan ng Panginoon

ang buhay ng kanyang mga tapat na mamamayan

at inililigtas niya sila sa masasama.

¹¹Ang kabutihan ng Diyos

ay sumisinag sa matutuwid

at nagbibigay ito ng kagalakan sa kanila.

¹²Kayong matutuwid, magalak kayo sa Panginoon .

Pasalamatan siya at purihin

ang kanyang pangalan!