Zefanias 1

¹Ito ang salita ng Panginoon na ipinahayag niya kay Zefanias noong si Josias na anak ni Amon ang hari ng Juda. Si Zefanias ay anak ni Cusi na anak ni Gedalias. Si Gedalias naman ay anak ni Amaria na anak ni Ezequias.

Ang Araw ng Paghatol ng Panginoon sa Buong Mundo

²Sinabi ng Panginoon ,

“Lilipulin ko ang lahat ng bagay

na nasa mundo,

³ang mga tao, hayop, ibon at isda.

Mawawala ang lahat ng nag-uudyok sa tao

para magkasala pati ang mga makasalanan.

“Lilipulin ko nga ang lahat ng tao sa mundo.

Ako, ang Panginoon ,

ang nagsasabi nito.

⁴Parurusahan ko

ang mga mamamayan ng Juda,

pati na ang lahat ng mamamayan

ng Jerusalem.

Lilipulin ko ang mga natitirang

sumasamba sa diyos-diyosang si Baal

pati na ang mga paring naglilingkod dito,

upang tuluyan na silang makalimutan.

⁵Lilipulin ko rin ang mga taong umaakyat

sa bubong ng kanilang bahay

para sumamba sa araw,

sa buwan at mga bituin.

Lilipulin ko ang mga sumasamba

at sumusumpang maglilingkod

sa Panginoon ,

pero sumusumpa ring maglilingkod

sa diyos-diyosang si Molec.

⁶Lilipulin ang mga tumatalikod

at hindi dumudulog sa Panginoon .”

⁷Tumahimik kayo sa harapan

ng Makapangyarihang Panginoon ,

dahil malapit na ang araw

ng aking paghatol.

Inihanda ko na ang aking mga mamamayan

para patayin tulad ng hayop na ihahandog.

Pinili ko na ang mga kalaban

na tinawag ko na sasalakay sa Juda.

⁸Sa araw ng paghahandog

para sa Panginoon ,

parurusahan ko ang mga pinuno

at ang mga anak ng hari

pati silang mga nakadamit banyaga.

⁹Parurusahan ko rin sa araw na iyon

ang lahat ng sumasali sa mga seremonya

ng mga diyos-diyosan

at silang mga nagpupuno sa templo

ng kanilang diyos

ng kalupitan at pandaraya.

¹⁰“Sa araw na iyon,”

sabi ng Panginoon ,

“maririnig ang iyakan sa pintuang tinatawag na Isda

ng lungsod ng Jerusalem

at sa bagong bahagi ng lungsod.

Maririnig din ang malakas na ingay

ng mga nagigibang bahay sa mga burol.

¹¹Mag-iyakan kayo,

kayong mga naninirahan

sa mababang bahagi

ng lungsod ng Jerusalem

dahil mamamatay ang lahat

ng inyong mga mangangalakal.

¹²Sa araw ding iyon,

susuyurin kong mabuti ang Jerusalem

at parurusahan ko ang mga taong

nagpapasarap lang sa buhay

at nagsasabi sa kanilang sarili,

‘Walang gagawin ang Panginoon

sa amin mabuti man o masama.’

¹³Aagawin sa mga taong ito

ang kanilang mga pag-aari

at wawasakin ang kanilang mga bahay.

Hindi sila ang titira sa mga bahay

na kanilang itinayo.

At hindi sila ang iinom ng inuming

mula sa ubas na kanilang itinanim.”

¹⁴Malapit na ang nakakatakot

na araw ng paghatol ng Panginoon .

Itoʼy mabilis na dumarating.

Mapait ang araw na iyon,

dahil kahit na ang matatapang na sundalo

ay sisigaw para humingi ng tulong.

¹⁵Sa araw na iyon,

ipapakita ng Diyos ang kanyang galit.

Magiging araw iyon ng pighati

at paghihirap,

araw ng pagkasira

at lubusang pagkawasak.

Magiging maulap at madilim

ang araw na iyon,

¹⁶at maririnig ang tunog ng trumpeta

at sigawan ng mga sundalong sumasalakay

sa mga napapaderang lungsod

at sa matataas na tore nito.

¹⁷“Sinabi ng Panginoon ,

‘Ipaparanas ko ang paghihirap sa mga tao,

at lalakad sila na parang bulag

dahil nagkasala sila sa akin.

Dadaloy na parang tubig ang kanilang dugo,

at mabubulok na parang dumi

ang kanilang bangkay.

¹⁸Hindi sila maililigtas ng kanilang mga pilak at ginto

sa araw na ipapakita ko ang aking poot

na parang apoy na tutupok sa buong mundo.

Sapagkat tuluyan kong wawakasan

ang lahat nang naninirahan sa lupa.’ ”